Yehovah E Gi Krakti
1 San yu e denki fu na apostel Paulus? Te wi e leisi a buku Tori fu den apostel, dan wi e frustan o furu Paulus ben du ini a diniwroko fu Yehovah. Fa Paulus ben man du ala den sani disi? A ben taki: „Gi ala sani mi abi a tranga fu en di e gi mi krakti” (Fil. 4:13). Wi tu kan kisi wini fu a krakti di Yehovah e gi. Fa? Fu di wi e gebroiki siksi sani di a seti gi wi, so taki wi kan kisi nyun krakti baka na yeye fasi.
2 Gado Wortu: Neleki fa wi musu nyan fu kan tan abi krakti na ini wi skin, na so wi musu nyan Gado Wortu so taki wi kan tan na libi na yeye fasi (Mat. 4:4). Bijbel e gi wi a krakti fu man go doro. Fu kan tan fayafaya na ini waarheid, wi musu studeri seryusu èn denki dipi fu den sani di wi leri. Efu a kan wi musu du dati ibri dei.—Ps. 1:2, 3.
3 Begi: A prenspari fu kon krosibei na Yehovah, spesrutu te wi abi spesrutu sani fanowdu. Nanga yepi fu en yeye, a e gi den wan di e aksi en dati na ini begi, nyun krakti baka (Luk. 11:13; Ef. 3:16). Den Buku fu Bijbel e gi wi deki-ati fu „horidoro na ini begi” (Rom. 12:12). Yu e du dati?
4 A Gemeente: Wi e kisi krakti nanga deki-ati tu fu den gemeente konmakandra èn fu a switi demakandra di wi abi drape nanga wi brada nanga wi sisa (Hebr. 10:24, 25). Te wi e broko wi ede nanga wan sani, dan den e gi wi deki-ati èn den e yepi wi na wan lobi-ati fasi.—Odo 17:17; Preik. 4:10.
5 A Preikiwroko: Te wi gwenti fu teki prati na a diniwroko dan dati e yepi wi fu tan poti prakseri na a Kownukondre nanga den blesi fu en. Te wi e yepi trawan fu leri sabi Yehovah, dan wi sa firi moro bun (Tori. 20:35). A no ala sma kan froisi go libi pe den abi moro preikiman fanowdu, noso a no ala sma kan teki a furuten diniwroko, ma toku tra fasi de fa wi kan abi wan bun prati na a diniwroko.—Hebr. 6:10-12.
6 Kresten Opziener: Wi e kisi wini fu a deki-ati nanga a yepi di den owruman e gi. Yehovah poti den fu wei na ipi fu Gado so taki den kan sorgu den (1 Petr. 5:2). Opziener di e reis e bow den gemeente pe den e dini, neleki fa Paulus ben du dati na ini den dei fu en.—Rom. 1:11, 12.
7 Eksempre fu Getrow Sma: A e gi wi deki-ati te wi e luku den bun eksempre fu tra getrow wrokoman, na ini owruten èn na ini a ten disi (Hebr. 12:1). Te yu musu kisi krakti baka, dan fu san ede yu no e leisi wan fu den ondrofenitori di e gi deki-ati di skrifi na ini wi tijdschrift, noso wan raportu di e gi deki-ati fu a Jaarboek, noso wan pisi fu den span tori fu a disiten historia fu Yehovah Kotoigi di skrifi na ini a Verkondigers-buku?
8 Wan brada di abi wan sani fu 95 yari now, ben teki a waarheid leki wan yonkuman. Ala di a ben yongu ete, a bribi fu en ben kisi tesi. Na a fosi presi, sma di ben wroko fayafaya makandra nanga a gemeente ben gowe libi Yehovah organisâsi. Dan yu ben abi na oso-fu oso wroko, di a ben feni wan muilek sani. Ma toku, ala ten a ben frutrow tapu Yehovah. Heri-esi a ben e prisiri na ini a diniwroko. Èn fa a de now? Awinsi a gosontu fu en no bun, toku a de wan memre ete fu a Bethelfamiri na Brooklyn, èn a e dini na ini a Tiri Skin. A no e sari kwetikweti taki a tan na Yehovah organisâsi.
9 Wan sisa di de wan memre fu a Bethelfamiri na ini Ingrisikondre ben dopu di a ben abi 13 yari. A ben bigin pionier nanga en brada a tra yari. A yari baka dati en papa ben poti na strafu-oso fu di a no ben wani teki sei na ini a di fu Tu Grontapufeti. A ben tan poti frutrow tapu Yehovah fu kisi krakti, èn a ben go doro fu dini a tru Gado. Baka wan pisi ten a trow nanga wan getrow brada, èn makandra den ben tan du a wani fu Yehovah. Baka di a trow 35 yari, a masra fu en dede wantronso. Agen a ben kisi krakti fu Yehovah, èn a e tan dini Yehovah te nanga a dei disi, ala di a abi a howpu fu dini fu têgo leki wan memre fu a libisma famiri fu Yehovah na grontapu.
10 Yehovah e yepi den getrow futuboi fu en, èn a e gi den krakti. „A e gi krakti na a sma di weri, èn a sma di no abi dinamik krakti a e gi krakti pasa marki.” Wi kan kisi krakti fu a fonten disi di noiti no e drei, te wi e gebroiki ala den siksi sani di kari na tapusei. Memre taki: „Den wan di e howpu tapu Yehovah, sa kisi krakti baka. . . . Den sa lon èn den no sa kon swaki; den sa waka èn den no sa kon weri” (Yes. 40:29-31). Paulus ben frutrow srefisrefi tapu Yehovah fu kisi krakti, èn so a musu de nanga wi tu.