No Frede fu Preiki!
1 Te wi e sreka wisrefi fu go preiki oso fu oso, dan moro furu a tyalensi no de na ososma di kande no sa wani arki. Ma a moro bigi tyalensi na taki wi musu komoto na wi oso fu go preiki. Den firi taki wi no koni nofo kan meki taki wi e frede fu taki fu waarheid nanga ala sortu sma (1 Tim. 2:4). Ma wi no musu frede fu preiki a bun nyunsu. Fu san ede?
2 A De a Boskopu fu Yehovah: Nanga Bijbel Yehovah meki wi kon sabi en wortu. Te wi e tyari a boskopu disi go gi trawan, dan wi e fruteri den, den prakseri fu en, no di fu wisrefi (Rom. 10:13-15). Te sma no wani arki a Kownukondre boskopu dan fu taki en leti, den no wani arki Yehovah. Ma wi no e lasi-ati. Wi de seiker taki a boskopu disi o naki na ati fu den wan di e angri fu si wan kenki kon ini a grontapu situwâsi èn di so srefi sabi den yeye nowtu.—Esek. 9:4; Mat. 5:3, 6.
3 Yehovah E Hari Sma Kon: Kande wan sma di no ben wani arki wi fosi wani arki now bika a situwâsi fu en kenki èn en ati kon safu. A kan taki Yehovah e sori taki a feni so wan sma bun èn a e ’hari en kon’ (Yoh. 6:44, 65). Te disi e pasa, wi wani de klariklari fu Yehovah gebroiki wi èn fu teki a tiri di den engel e gi wi fu feni den sortu sma disi.—Openb. 14:6.
4 Gado E Gi Wi En Yeye: Santa yeye e meki taki wi man taki „sondro frede ini a makti fu Yehovah” (Tori. 14:1-3). Te wi e hori na prakseri taki wi abi a tranga krakti disi di e horibaka gi wi, dan wi no sa draidrai fu taki fu waarheid nanga birtisma, sma di e wroko nanga wi, sma di e sidon nanga wi na ini a srefi klas, famiriman, noso sma di kisi hei leri noso gudu sma.
5 Yesus Ben Leri Wi Fa fu Du Dati: Yesus ben e gebroiki aksi di ben meki sma denki, a ben gebroiki makriki agersitori, èn a ben e rideneri fu Bijbel. Nanga en heri ati a ben fruklari a waarheid na wan makriki èn moi fasi. Tide den fasi disi fa Yesus ben gi leri, na den moro bun fasi ete (1 Kor. 4:17). A kan taki wi e preiki ini wan tra situwâsi, ma a krakti Kownukondre boskopu e tan a srefi wan.
6 Wi abi a grani taki Yehovah e gebroiki wi fu yepi sma na wan aparti èn prenspari fasi. Wi no musu frede fu du dati! Meki wi abi deki-ati èn gi Yehovah pasi fu „opo wan doro gi wi gi a wortu”, so dati wi kan taki fu a bun nyunsu nanga trawan.—Kol. 4:2-4.