Kownukondre preikiwroko e meki sma tan libi!
1 A wroko disi na a moro prenspari wroko di sma e du na grontapu nownowde. Yehovah Gado, Yesus Krestes, nanga den furu dusun engel poti ala den prakseri na a wroko disi. San na a wroko disi èn fu san ede a de prenspari? Na a Kownukondre preikiwroko èn a e meki sma tan na libi!—Rom. 1:16; 10:13, 14.
2 Son sma e prakseri taki wi ben sa kan yepi trawan moro bun efu wi ben o pruberi fu meki a grontapu di de lontu wi tron wan moro bun presi fu libi. Wan lo sma e du furu muiti so taki vrede kan kon, den e du muiti fu dresi siki èn den e pruberi fu meki na ekonomia kon moro bun. Ma san sa yepi sma trutru?
3 Wan wroko di de tumusi prenspari: A Kownukondre boskopu wawan e meki wi kon sabi a marki fu a libi, fa a du kon taki libisma e pina èn san na a wan-enkri trutru howpu gi a tamara. A bun nyunsu e yepi sma fu tron mati fu Yehovah èn na so den e kisi „a vrede fu Gado, di pasa ala suma frustan” (Fil. 4:7). A Kownukondre boskopu wawan e leri sma san den musu du te den miti nanga problema na ini a libi. A boskopu disi e tyari kon na krin tu san wi musu du fu kan tan na libi te na ogri grontapu disi sa kisi pori na ini a ten di e kon (1 Yoh. 2:17). Iya, na wan warti sani trutru fu du ala san wi man na ini a Kownukondre preikiwroko!
4 Fu gi wan eksempre: Den sma fu wan dorpu e sribi, aladi wan rampu de fu miti den fu di wan dan o broko heri esi. San na a moro bun sani di wi kan du fu yepi den? Wi ben o yepi den efu wi ben sa teki watra puru nanga embre na a sei fu a dan di de fu broko? Wi ben o yepi den efu wi ben sa du sani fu meki a dorpu disi di o kisi pori, kon moro moi? Kwetikweti! San wi musu du, na fu wiki den sma fu a dorpu. Wi musu warskow den gi a rampu di de fu miti den èn wi musu yepi den fu lowe gi a kefar disi! Den sma ini a ten disi di e sribi na yeye fasi de na ini bigi kefar (Luk. 21:34-36). Fu di a seti fu sani sa pasa gowe heri esi, dan meki wi du ala muiti fu preiki fayafaya gi someni sma leki wi man!—2 Tim. 4:2; 2 Petr. 3:11, 12.
5 Tan du a wroko disi: Meki wi prakseri fa wi kan miti moro opregti sma nanga a bun nyunsu. Wi kan miti den na oso, na strati, wi kan preiki gi den nanga yepi fu telefon èn wi kan preiki gi den te wan okasi de fu du dati. A wroko di Yehovah gi wi fu du na a moro prenspari wroko di wi kan du. Efu wi e du a wroko disi fayafaya, dan wi ’sa frulusu wisrefi nanga den wan di e arki wi’.—1 Tim. 4:16.