Meki a Kownukondre boskopu bekènti
1 „Mi musu go fruteri a bun nyunsu fu Gado kownukondre, bika na fu disi Gado ben seni mi kon” (Luk. 4:43). Nanga den wortu disi Yesus ben sori go na a moro prenspari tori fu en diniwroko, namku a Kownukondre fu Gado. A boskopu di wi e meki bekènti na ini a ten disi e taki sosrefi tu fu a Kownukondre, soleki fa disi ben taki na fesi na ini Mateyus 24:14: „Èn a bun nyunsu disi fu a kownukondre sa preiki gi ala sma na heri grontapu, leki wan kotoigi gi ala pipel, èn dan a kaba sa kon.” Sortu waarheid fu Gado Kownukondre sma musu yere?
2 A Kownukondre fu Gado e tiri now na ini hemel èn a sa kon na ini a presi fu ala libisma tirimakti. Didibri ben trowe komoto fu hemel kaba, èn den lasti dei fu a disiten ogri seti fu sani e kon na wan kaba (Openb. 12:10, 12). Na ogri owru seti fu Satan sa kon na en kaba krinkrin, èn Gado Kownukondre no sa seki. A sa tan fu têgo.—Dan. 2:44, Hebr. 12:28.
3 A Kownukondre sa gi den sma di e gi yesi ala sani di den abi fanowdu. A sa puru ala pina di e kon fu orloku, ogridu, kwinsi nanga pôtifasi (Ps. 46:8, 9; 72:12-14). Nyanyan sa de pasa marki gi ala sma (Ps. 72:16; Yes. 25:6). Siki sa de wan fositen sani (Yes. 33:24; 35:5, 6). Te libisma sa gro go miti volmaaktifasi, dan a grontapu sa kenki kon tron wan paradijs, èn libisma sa libi makandra na ini wánfasi.—Yes. 11:6-9.
4 A fasi fa wi e libi now e sori efu wi wani de borgu fu a Kownukondre fu Gado. A Kownukondre boskopu musu abi krakti na tapu a heri fasi fa wi e libi, èn sosrefi a musu abi krakti na tapu den marki fu wi èn na tapu den moro prenspari sani na ini wi libi. Fu gi wan eksempre, aladi wi abi a plekti fu sorgu gi wi osofamiri, toku wi no musu broko wi ede tumusi nanga materia gudu fu di disi kan puru wi prakseri na den Kownukondre afersi (Mat. 13:22; 1 Tim. 5:8). Na presi fu dati, wi musu gi yesi na a frumane fu Yesus di e taki: „Fu dati ede, tan suku fosi a kownukondre nanga en regtfardikifasi, èn ala den tra sani disi unu sa kisi tu.”—Mat. 6:33.
5 Now di a ten de ete, dan a de tumusi prenspari taki sma yere a Kownukondre boskopu èn du san den yere. Meki wi yepi den sma disi fu di wi e „taki sani fu overtoigi sma fu a kownukondre fu Gado”.—Tori. 19:8.