Wan video di sa tyari sani kon na krin gi yu, èn di sa gi yu deki-ati!
A ben de april 1951. Na ini a kondre di sma ben e kari Sovyet-Unie fosi, den tiriman ben tyari dusundusun Yehovah Kotoigi kon na wan. Den ben tyari papa, mama, nanga pikin kon na wan èn den poti den na ini loko fu tyari den go na Siberia leki katiboman. Fu san ede a tranga Sovyet tirimakti ben abi a fasti bosroiti fu figi den puru? Fa a du kon taki den brada nanga sisa fu wi ben tan na libi èn ben abi bun bakapisi aladi den ben kisi frufolgu na wan ogri-ati fasi so furu yari langa? Yu sa feni den piki tapu den aksi disi te yu sa luku a video Getrouw onder beproevingen — Jehovah’s Getuigen in de Sovjet-Unie. Luku a video disi, èn meki den sani di a e tyari kon na krin, gi yu deki-ati fu tan getrow na Yehovah awinsi san e pasa!
Yu kan gi piki tapu den aksi disi? (1) O ten ben de a fosi leisi taki den tiriman fu Rosiakondre ben gi Yehovah Kotoigi primisi fu du a wroko fu den? (2) Fa a du kon taki dusundusun Kotoigi osofamiri kon de na ini a Sovyet-Unie bifo, èn baka a di fu Tu Grontapufeti? (3) Fa a bribi fu den Kotoigi no ben e kruderi kwetikweti nanga a filosofia fu Lenin? (4) San ben de Operatie Noord, èn sortu marki Stalin ben wani doro nanga yepi fu a sani disi? (5) San ben o pasa nanga den Kotoigi efu den ben o go na ini katibo, èn san den ben musu du efu den no ben wani go na ini katibo? (6) Di sma ben poti den brada nanga sisa fu wi na ini loko fu tyari den go te na Siberia, dan fa den ben gi makandra deki-ati èn san ben fruwondru den sma di ben teki den na ini katibo? (7) Sortu pina den Kotoigi ondrofeni na ini Siberia? (8) Sortu sani a pipel fu Yehovah ben kisi na yeye fasi, èn fu san ede den ben warderi en so furu? (9) Fu san ede den brada nanga sisa fu wi ben de klariklari fu du ala san den man fu kisi buku, aladi den ben kan lasi den libi? Fa den ben abi bun bakapisi aladi den tiriman ben tan meki ala muiti fu no meki taki den kisi den buku? (10) Fa Chroesjtsjov ben tan frufolgu a pipel fu Gado? (11) Fa den tiriman ben pruberi fu pori a bribi fu den pikin fu Kotoigi? (12) San den brada nanga sisa ben kon frustan krin fu a frufolgu di den ben kisi (Jaarboek 2002, bladzijde 203, 204)? (13) Di den tiriman fu a kondre frufolgu na organisâsi fu Gado na ala sortu fasi, dan fa sani ben waka heri tra fasi leki fa den tiriman disi ben prakseri (Jaarboek 2002, bladzijde 220, 221)? (14) Sortu winsi den Kotoigi ben abi di ben e libi na ini a kondre di sma ben kari Sovyet-Unie, èn fa a winsi dati ben kon tru? (15) San ben yepi den brada nanga sisa fu horidoro ondro tesi, èn fa a lasti pisi fu a video e sori taki den wortu di skrifi na ini Yeremia 1:19 de tru? (16) Fruteri fu wan fu den ondrofenitori fu sma di tan getrow di den ben kisi tesi. Fruteri tu fa a sani dati naki yu ati èn fa a gi yu deki-ati.