Wrokoman fu difrenti kondre na grontapu e bow Kownukondre zaal na ini wan tu kondre fu Europa
1 Na ini den lasti someni tenti yari a wroko fu Yehovah Kotoigi ben tapu na ini wan tu kondre fu Europa. Dati ben de so tu nanga wan tu kondre fu na owstusei fu Europa. Furu tron, lanti na ini den kondre dati ben poti hebi wet soso fu tapu a wroko. A ben muilek fu hori publiki konmakandra, èn fu gebroiki Kownukondre zaal leki konmakandra presi ben de wan sani di pikinmoro no ben man kwetikweti. Ma ini den lasti yari „Yehovah du wan bigi sani nanga san a du nanga wi. Wi kon de nanga prisiri”.—Ps. 126:3.
2 Na ini a bigin fu 1983, a gens di sma ben gens a wroko fu Yehovah Kotoigi ben kon moro mendri. Na a ten fu 1989, Polen nanga Hongaria ben gi Yehovah Kotoigi primisi fu du a diniwroko fu den. Na ini 1991, Yehovah Kotoigi ben kisi primisi fu skrifi den nen na lantibuku na ini Rosiakondre. Sensi a ten dati a wroko go na fesi na ini Rosiakondre nanga den kondre di fositen ben de wan pisi fu a Sovyet Unie. Na a pisi ten fu maart 1996 te go miti oktober 1998, a Tiri Skin ben feni en bun fu leni moni na den bijkantoro di e hori ai tapu 11 kondre na ini Europa. Den bijkantoro ben aksi fu bow 359 Kownukondre zaal.
3 Te yu e luku den fowtow na tapu na inibere pisi fu a Kownukondre diniwroko disi, dan yu musu prakseri dipi fu den bigi èn wondru sani di Yehovah du gi a pipel fu en (Ps. 136:4). Yu sa prisiri fu sabi taki den brada e gebroiki a moni di den kisi fu a bradafasi na heri grontapu, na wan tumusi bun fasi. A sani disi e sori san Yesus ben taki soleki fa a skrifi na Yoh. 13:35: „Na a fasi disi ala sma o sabi taki unu na mi disipel, te unu lobi makandra.”
4 Rumeinia na wan fu den kondre na ini Europa di kisi wini fu den sani di seti fu yepi gemeente di no abi furu moni fu bow Kownukondre zaal. Na ini a kondre dati 36 Kownukondre zaal bow sensi yuli 2000. Fu di den brada e gebroiki a srefi bowtekening gi furu fu den Kownukondre zaal, dan na ini Ukraini den bow 61 konmakandra presi na ini a yari 2001, èn na ini a yari 2002 den bow ete 76 zaal. Nanga moni di sma poti na ini a Kownukondre zaal fonsu, hondrohondro Kownukondre zaal ben bow na ini Bulgaria, Krowâsia, Masedonia, Moldafia, Rosiakondre, nanga Serfia nanga Montenegro.
5 Na ini son kondre a no makriki fu bow Kownukondre zaal èn a ben teki furu muiti fosi den brada ben kan bigin bow. Nofo tron a ben teki furu ten bifo den brada ben kan bigin bow. Sosrefi, fu bow wan Kownukondre zaal na ini a pisi dati fu Europa e kostu moro furu leki te yu wani bow wan zaal na ini furu kondre fu Afrika noso fu Zuid-Amerika. Ma fu di moro sma e bigin fu anbegi Yehovah, meki a de fanowdu fu bow hondrohondro Kownukondre zaal ete na ini kondre fu Europa, pe den gemeente no abi furu moni!
6 A moi srefisrefi fu si fa moro furu Kownukondre zaal e bow! Furu ondrofeni e sori taki sma di e tan na ini a birti pe den Kownukondre zaal disi e bow, e kisi wan tumusi bun kotoigi. Na ini son kontren, a fasi fa den brada ben de klariklari fu hori densrefi na den tirilin fu lanti di abi fu du nanga a bow fu Kownukondre zaal, ben naki na ati fu den lantiman.
7 Yesaya ben taki na fesi fu a ten disi pe a tru anbegi sa kon moro furu. Nanga yepi fu a profeiti, Gado ben taki na fesi: „Misrefi, Yehovah, sa meki a go moro esi te a ten gi dati doro” (Yes. 60:22). Trutru, Yehovah sori taki den lasti tin yari na a ten gi a tru anbegi fu gro na ini Owstu-Europa. Meki Yehovah go doro fu tyari moro blesi kon tapu a muiti di wi e du fu horibaka gi a Kownukondre zaal fonsu, so taki moro furu Kownukondre zaal kan bow na ini furu kondre pe den gemeente no abi nofo moni. A sa yepi meki a tru anbegi gro na ini furu kondre fu Europa èn taki wan moro bigi kotoigi kan gi na „ala sei fu grontapu”.—Tori. 13:47.
[Prenki na tapu bladzijde 3]
Wan Kownukondre zaal di abi difrenti konmakandra-presi na ini Moskow, Rosiakondre
[Prenki na tapu bladzijde 4-6]
Nyun Kownukondre zaal na ini Owstu-Europa
Strumika, Masedonia
Darufar, Krowâsia
Bitola, Masedonia
Sokal, Lviv Distrikt, Ukraini
Sofia, Bulgaria
Krasnooktyabrskiy, a kontren fu Maykop, Rosiakondre
Bački Petrofak, Serfia nanga Montenegro
Plofdif, Bulgaria
Tlumak, Ifano-Frankifsk Distrikt, Ukraini
Rafa-Ruska, Lviv Distrikt, Ukraini
Stara Pazofa, Serfia nanga Montenegro
Zenica, Bosnia nanga Hersegofina
Sokal Lviv, Distrikt, Ukraini
Zhydachivl Lviv Distrikt, Ukraini