Yehovah e yepi den wan di e frutrow na en tapu
1 Furu sma e si moni, makti, nanga libisma koni leki prenspari sani di kan meki taki sani waka bun nanga den (Ps. 12:4; 33:16, 17; 49:6). Ma Bijbel e gi den wan di abi frede gi Yehovah èn di e frutrow na en tapu a dyaranti taki „[Yehovah] na den yepiman èn a skilt fu den” (Ps. 115:11). Meki wi luku tu fasi fa wi musu sori taki wi e frutrow tapu Yehovah.
2 Leki Kresten dinari: Te wi musu hori wan prati na ini a gemeente, noso te wi musu gi leri na ini a preikiwroko, dan wi musu frutrow tapu wi Gado. Prakseri na eksempre di Yesus gi. Aladi a ben de a Manpikin fu Gado, toku a no ben e frutrow tapu en eigi koni, noso en eigi krakti, ma a ben e frutrow dorodoro tapu en hemel Tata (Yoh. 12:49; 14:10). A no de fu taki dati wi musu frutrow moro tapu wi hemel Tata! (Odo 3:5-7) Soso te Yehovah e blesi den opregti muiti fu wi, dan den sa gi en glori èn den sa meki taki trawan kisi wini fu dati.—Ps. 127:1, 2.
3 Wi e sori taki wi e frutrow tapu Yehovah te wi e aksi en na ini begi fu tiri wi èn fu yepi wi nanga en santa yeye (Ps. 105:4; Luk. 11:13). Boiti dati, wi e sori taki wi e frutrow tapu Gado te wi e gebroiki en Wortu, Bijbel, fu gi leri. A boskopu di skrifi na ini Bijbel abi a krakti fu doro na ati fu sma èn fu meki sma kenki den libi (Hebr. 4:12). Te wi e ’dini leki sma di e bow tapu a krakti di Gado e gi’, dan Yehovah e kisi glori.—1 Petr. 4:11.
4 Te wi abi problema: Wi musu suku yepi na Yehovah tu te wi e kisi kwinsi èn te wi abi problema (Ps. 46:1). Fu eksempre, a kan taki wan wrokobasi no wani gi wi fri ten fu man go na wan konmakandra, noso a kan taki wi abi fu du nanga wan muilek situwâsi na ini na osofamiri-libi fu wi. Wi e sori taki wi e frutrow tapu Yehovah te wi e begi opregti èn te wi e fiti a rai di a e gi wi nanga yepi fu en Wortu, nanga en organisâsi (Ps. 62:8; 119:143, 173). Te den futuboi fu Yehovah e du dati, dan den e si taki a e yepi den na ini den libi.—Ps. 37:5; 118:13, 16.
5 Yehovah srefi e gi wi a dyaranti: „Blesi fu a man di gosontu èn tranga na skin fasi, di e poti en frutrow na ini Yehovah, èn di kon frutrow tapu Yehovah srefi” (Yer. 17:7). Meki wi sori na ini ala san wi e du taki wi e frutrow na en tapu!—Ps. 146:5.