Fa wi kan gi kotoigi na famiriman?
1. Fu san ede wi musu handri nanga koni te wi e gi kotoigi na famiriman?
1 Nowan tra sani kan gi wi moro prisiri, leki fu go na ini a nyun grontapu nanga den lobiwan fu wi di e dini Yehovah makandra nanga wi! Te wi e gi kotoigi na den famiriman fu wi, dan a moi howpu disi kan kon tru. Ma efu wi wani du dati na wan fasi di e meki den firi bun, dan wi musu handri nanga koni. Wan kring-opziener ben taki: „Den sma di e kisi den moro bun bakapisi, na den wan di e gi kotoigi na so wan fasi taki pikinpikin den e hari a prakseri fu den famiriman fu den.” Fa wi kan du dati?
2. Te wi e broko wi ede trutru nanga den famiriman fu wi, dan fa dati kan yepi wi fu du sani di sa hari a prakseri fu den?
2 Taki fu sani di e hari den prakseri: Prakseri bun na fesi san yu kan du fu kan hari a prakseri fu den famiriman fu yu (Odo 15:28). Nanga sortu sani den e broko den ede? Sortu problema den abi? Kande yu kan sori den wan artikel, noso yu kan sori den wan moi tekst di e taki fu wan spesrutu sani di den lobi. Efu den famiriman fu yu e tan fara, dan kande yu kan gi den kotoigi nanga yepi fu wan brifi, noso yu kan bel den. Sai siri fu waarheid sondro fu taki tumusi furu sani, èn abi a frutrow taki Yehovah sa meki den siri gro.—1 Kor. 3:6.
3. Fa den sani di den famiriman fu wi wani kon sabi fu wi, kan meki taki wi sa man gi den kotoigi?
3 Di Yesus ben yagi wan ogri yeye komoto fu wan man, dan a ben taigi a man disi: „Go na oso na den famiriman fu yu, èn fruteri den ala sani di Yehovah du gi yu èn fu a sari-ati di a ben sori yu” (Mark. 5:19). Prakseri fa disi ben meki den famiriman fu a man disi fruwondru! Aladi yu no abi fu ondrofeni so wan kefalek sani, toku a kan taki den famiriman fu yu sa wani kon sabi san yu, nanga den pikin fu yu e du. Te yu e taki fu wan lezing di yu hori na a Theokrasia Diniwroko-skoro, na wan kongres pe yu ben go, den sani di yu ben si na Bethel, noso wan spesrutu sani di yu ben ondrofeni, dan dati kan gi yu na okasi fu fruteri den moro fu Yehovah nanga na organisâsi fu en.
4. Nanga san wi musu luku bun te wi e gi kotoigi na famiriman?
4 Wi musu abi koni: Te wi e gi kotoigi na famiriman, dan wi musu sorgu taki wi no e fruteri den tumusi furu na a srefi ten. Wan brada e memre ete fa a ben de di a bigin studeri Bijbel, èn a e taki: „Mi ben e furu mi mama ede nanga wan heri ipi sani di mi ben leri na ini Bijbel, èn furu tron disi ben meki taki wi ben e hari taki, spesrutu mi nanga mi papa.” Srefi te wan famiriman e sori taki a wani kon sabi moro fu a Bijbel boskopu, toku yu musu gi piki na wan fasi di sa meki taki a sma wani kon sabi moro (Odo 25:7). Ala ten yu musu sori lespeki, switifasi, èn pasensi, neleki fa yu ben o du te yu ben o taki nanga wan sma na ini a preikiwroko.—Kol. 4:6.
5. San wi musu du efu famiriman no wani arki te wi e gi kotoigi na den?
5 Na wan okasi, den famiriman fu Yesus ben e denki taki a ben lasi en frustan (Mark. 3:21). Ma bakaten, wan tu fu den kon tron bribiman (Tori. 1:14). Efu den famiriman fu yu no wani arki te yu e gi den kotoigi fu a fosi leisi, dan yu no musu lasi-ati. A situwâsi fu den, èn a fasi fa den e si sani kan kenki. Tan suku tra okasi pe yu kan fruteri den wan sani di sa hari den prakseri. A kan taki yu sa man yepi den fu bigin waka tapu a pasi fu têgo libi, èn dati sa gi yu furu prisiri.—Mat. 7:13, 14.