Leri fu taki-go-taki-kon moro bun nanga trawan
1. Sortu Bijbel tori wi o go luku, èn fu san ede?
1 Wan moi eksempre di e sori wi fa fu taki-go-taki-kon nanga trawan, na a di fu na apostel Paulus. Tori fu den Apostel 13:16-41 e sori fa a ben e taki nanga sma na ini wan snoga, na Antiokia na ini Pisidia. Te Paulus ben e prati a bun nyunsu, dan a ben hori na prakseri na sortu fasi den arkiman fu en ben kweki èn fa den ben e denki fu sani, so taki a ben kan taki fu sani di ben o hari den prakseri. Meki wi go luku a tori disi, aladi wi e hori na prakseri fa wi kan du a diniwroko fu wi na a srefi fasi fa Paulus ben du en.
2. San wi e leri fu a fasi fa Paulus ben bigin a takimakandra fu en?
2 Taki fu wan sani di den arkiman e bribi: A boskopu di Paulus ben e preiki, ben abi moro furu fu du nanga a prenspari wroko di Yesus abi, namku fu meki den prakseri fu Gado kon tru. Ma Paulus no ben taki fu a sani disi na a bigin fu a takimakandra fu en. Na presi fu dati, a ben taki fu wan sani di en nanga furu fu den Dyu arkiman ben si leki wan tru tori, namku a historia fu a Dyu pipel (Tori. 13:16-22). Na a srefi fasi wi sa man hari sma prakseri te wi e suku fu taki fu wan sani di den e bribi. Kande wi sa musu poti aksi na wan koni fasi, èn wi sa musu arki bun fu kon sabi san prenspari gi den trutru.
3. Fu san ede den arkiman fu Paulus ben feni en muilek fu bribi taki Yesus ben de a pramisi Mesias?
3 Di Paulus ben e taki fu a historia fu den Dyu, dan a memre den arkiman fu en na a pramisi fu Gado, namku taki a ben o meki wan Frulusuman kon fu a famirilin fu David. Ma furu fu den Dyu ben e wakti wan kefalek srudati di ben o frulusu den fu a tiri fu Rome, èn di ben o meki a Dyu pipel kon de moro prenspari leki ala tra pipel. A no de fu taki dati den ben sabi heri bun taki den Dyu kerki fesiman na ini Yerusalem ben weigri fu si Yesus leki a Frulusuman. Den ben sabi tu taki den kerki fesiman ben gi en abra na a tirimakti fu Rome, èn taki den kiri en. Fa Paulus ben o man overtoigi den sma taki Yesus ben de a pramisi Mesias?
4. Fa Paulus ben taki-go-taki-kon na wan koni fasi nanga den Dyu di ben arki en?
4 Taki fu sani di e fiti na den sma di e arki: Fu di Paulus ben sabi fa den arkiman fu en ben e denki, meki a gebroiki den Buku fu Bijbel fu taki-go-taki-kon nanga den fu sani di den ben bribi kaba. Fu eksempre, a ben sori den taki Yesus ben de a bakapikin fu David. A ben sori den tu taki Yesus ben de a sma di Yohanes a Dopuman ben taki fu en. Disi ben hari sma prakseri fu di furu sma ben si Yohanes leki wan profeiti fu Gado (Tori. 13:23-25). Paulus ben sori taki, di den kerki fesiman no ben poti bribi na ini Yesus èn di den meki sma kiri en, dan na so den meki „den sani di den buku fu den Profeiti taki, kon tru” (Tori. 13:26-28). Boiti dati, a sori taki sma ben si nanga den eigi ai taki Yesus opo baka na dede. A poti prakseri tu na pisi fu Bijbel di den arkiman ben sabi, namku den pisi di ben kon tru di Yesus kisi wan opobaka.—Tori. 13:29-37.
5. (a) Fa Paulus ben taki fu sani di ben fiti na den Grikisma? (b) Fa wi kan teki na eksempre fu Paulus te wi e gi kotoigi na ini a kontren fu wi?
5 Na a tra sei, di Paulus ben taki nanga den Grikisma na a Areopagus na ini Ateine, dan a gebroiki wan tra tori fu bigin a takimakandra fu en (Tori. 17:22-31). Ma toku a ben taki fu a srefi boskopu, èn na ala den tu okasi disi a ben abi bun bakapisi (Tori. 13:42, 43; 17:34). Na ini a ten disi sosrefi wi sa abi moro bun bakapisi te wi e suku fu taki fu sani di den arkiman fu wi e bribi, èn te wi e taki fu sani di fiti na a fasi fa den sma kweki èn fa den e denki fu sani.