San a diniwroko fu wi e du

1. Fa Yehovah e si a diniwroko fu wi, èn fa libisma e si dati?

¹ Gado Wortu e taki fu Kresten leki den e waka na ini wan prodowaka fu winiman na ini a diniwroko fu Yehovah (2 Kor. 2:14-16). Te wi e yepi sma fu kisi sabi fu Gado, dan a diniwroko fu wi de leki switismeri di Gado e feni bun. A switi bun nyunsu e hari son sma, ma trawan e drai baka gi en. Ma a no fu di furu sma e drai baka gi a bun nyunsu, meki dati wani taki dati a wroko di wi e du na fu soso. Poti prakseri san a diniwroko fu wi e du.

2. San wi kan sori nanga a diniwroko fu wi?

² A e gi Yehovah glori: Satan feni taki libisma e dini Yehovah soso fu di den e kisi wini fu dati (Yob 1:9-11). A Kresten diniwroko e gi wi na okasi fu sori taki wi e dini Gado na wan opregti fasi. Furu preikiman e tan gi yesi na a komando fu preiki èn fu tan meki disipel, awansi den de na ini muilek situwâsi noso awansi sma no wani arki den. Te wi e tan horidoro na a loyaal fasi disi, dan dati e meki Yehovah en ati e prisiri!​—Odo 27:11.

3. Fu san ede a de tumusi prenspari taki wi tan meki a nen fu Gado bekènti èn sosrefi den sani di a abi na prakseri?

³ Boiti dati, a diniwroko fu wi abi fu du sosrefi nanga a kontru fu den sani di Gado abi na prakseri. Fu di a grontapu fu Satan o kisi pori na ini a ten di e kon, meki Yehovah taki: „Den pipel sa musu fu sabi taki mi na Yehovah” (Esek. 39:7). Ma fu meki den pipel sabi disi, a de tumusi prenspari taki den futuboi fu Gado tan meki a nen fu en bekènti, èn sosrefi den sani di a abi na prakseri. Den musu meki en bekènti gi „ala kondre, lo, tongo, nanga pipel”.​—Openb. 14:6, 7.

4. Fa a preikiwroko e sori suma sa kisi krutu?

⁴ A e sori suma sa kisi krutu: A preiki di wi e preiki a bun nyunsu e sori sosrefi suma sa kisi krutu. Na apostel Paulus ben taki dati Krestes Yesus sa puru atibron na tapu „den sma di no sabi Gado èn na tapu den sma di no e gi yesi na a bun nyunsu fu wi Masra Yesus” (2 Tes. 1:8, 9). Sma sa kisi krutu akruderi a fasi fa den e handri te den yere a bun nyunsu. Disi na wan hebi frantwortu gi den futuboi fu Gado! Efu wi no wani kisi brudu-paiman, dan wi no musu tapu fu meki a Kownukondre boskopu bekènti di e kibri sma libi.​—Tori. 20:26, 27.

5. Fa a sari-ati fu Gado de fu si na ini wi diniwroko?

⁵ A muiti di wi e tan du fu yepi sma fu kisi a bun-ati fu Gado, e sori taki Yehovah abi sari-ati trutru (1 Tim. 2:3, 4). Fu di wi sabi taki a libi fu sma e kenki doronomo, meki wi e go na den ibri tron baka fu gi den a deki-ati fu suku Yehovah now di ten de ete. Te wi e du disi, dan wi e sori ’trutru sari-ati’ neleki wi Gado, di ’no wani nowan sma fu lasi libi, ma di wani taki ala sma musu kisi berow’.​—Luk. 1:78; 2 Petr. 3:9.

6. Fa wi e kisi wini te wi e tan du a diniwroko fu Yehovah fayafaya?

⁶ Wisrefi e kisi wini: Te wi e tan du a diniwroko fu Yehovah fayafaya, dan dati e kibri wi. A e yepi wi fu tan ’hori bun na prakseri taki a dei fu Yehovah e kon’, èn a e yepi wi fu no doti wisrefi nanga den sani fu na ogri grontapu sistema fu disiten (2 Petr. 3:11-14; Tit. 2:11, 12). Fu dati ede, meki wi ’tanapu kánkan, sondro fu degedege, èn ala ten wi musu abi furu fu du na ini a wroko fu Masra’, fu di wi sabi taki a muiti di wi e du na ini a Kresten diniwroko no de fu soso.​—1 Kor. 15:58.