Sori taki yu e broko yu ede nanga trawan—Fu di yu e sori switifasi
1 „Yehovah abi switifasi” (Ps. 145:8). Aladi en na A Moro Heiwan fu hemel nanga grontapu, toku a e sori switifasi gi sondu libisma, a e hori den na prakseri, èn a e handri na wan lespeki fasi nanga den (Gen. 13:14; 19:18-21, 29). Te wi e sori switifasi neleki fa Gado e du dati, dan a fasi fa wi o preiki a bun nyunsu, o hari sma moro (Kol. 4:6). Disi no wani taki nomo dati wi musu taki na wan lespeki fasi.
2 Te wi e preiki oso fu oso: San wi musu du te wi e miti wan ososma na wan momenti te a no man taki nanga wi, noso te a abi furu fu du? A bun fu hori a situwâsi fu a sma na prakseri èn fu no taki langa nanga a sma. Wi kan aksi a sma tu efu wi kan go na en wan tra leisi. Efu sma no wani den buku fu wi, dan wi e sori switifasi te wi no e dwengi den fu teki den buku. Te wi e hori trawan na prakseri, dan wi o sori lespeki gi den sani di den abi. Fu eksempre, wi kan tapu a portu noso a doro fu a sma te wi e gowe, èn wi kan leri den pikin fu wi fu du dati tu. Efu sma no de na oso, dan wi kan libi wan tijdschrift noso wan traktaat gi den na baka. Ma wi musu poti a tijdschrift noso a traktaat na so wan fasi taki sma di e waka pasa no e si en. Iya, te wi abi switifasi, dan wi o handri nanga sma neleki fa wi wani taki den musu handri nanga wi.—Luk. 6:31.
3 Te wi e du stratiwroko: Te wi e du stratiwroko, dan wi e sori switifasi te wi no e tapu a pasi gi sma so taki den no man waka pasa, èn te wi no e tanapu na ini grupu na fesi wenkri. Wi wani hori a situwâsi fu sma na prakseri tu. Disi wani taki, dati wi wani taki soso nanga den sma di man taki wan tu miniti nanga wi, na presi fu pruberi fu taki nanga den wan di trutru no abi ten. Son leisi, tumusi furu babari de na strati. Dati meki wi o abi fu taki moro tranga so taki a sma kan yere san wi e taki. Ma toku wi musu du dati na wan lespeki fasi, fu di wi no wani poti prakseri na wisrefi.—Mat. 12:19.
4 Te wi e gi kotoigi nanga yepi fu telefon: Te wi e hori trawan na prakseri, dan wi o gi kotoigi nanga yepi fu telefon na wan presi pe furu babari no de. Wi e sori taki wi abi bun maniri te wi e fruteri a sma wantewante fa wi nen èn fu san ede wi bel en. Te wi e hori a telefon na so wan fasi taki a sma e yere wi bun èn te wi e taki nanga switifasi, dan dati sa yepi wi fu meki trawan taki nanga wi fu wan Bijbel tori di sa gi den deki-ati (1 Kor. 14:8, 9). Te wi e sori switifasi, te wi e hori trawan na prakseri, èn te wi e sori lespeki na den difrenti fasi disi, dan wi e sori switifasi neleki fa Yehovah, wi Gado, e du dati.