Ala sma na ini a gemeente kan yepi trawan fu tron wan disipel
1 Wan sma no e tron wan disipel fu di wán preikiman nomo e yepi en. Yehovah kan gebroiki ala ’sma di e wroko makandra nanga En’ fu yepi bijbelstudenti fu tron moro bun mati fu en (1 Kor. 3:6-9). Wi alamala kan yepi nyunwan te wi e gi piki komoto fu wi ati na den Kresten konmakandra, èn te wi e tyari wisrefi na wan bun fasi. Na so sma man si krin taki wi abi a yeye fu Gado (Yoh. 13:35; Gal. 5:22, 23; Ef. 4:22, 23). San wi kan du moro fu yepi nyunwan?
2 Sani di wi kan du leki gemeente: Wi alamala kan sori taki wi e broko wi ede nanga den sma di e bigin kon na den konmakandra, fu di wi e go na den fu gi den wan switikon, èn fu di wi e taki nanga den bifo èn baka a konmakandra. Wan man di ben prakseri a fosi leisi di a ben kon na a gemeente, ben taki: „Tapu wán dei mi miti so furu sma di ben sori trutru lobi gi mi, aladi mi no ben sabi den srefi. Noiti mi miti den sortu sma dati na ini a kerki pe mi ben go sensi mi pikin-nengreten. A ben de krin gi mi taki mi feni a tru bribi.” A man disi dopu seibi mun baka di a go na a konmakandra fu a fosi leisi.
3 Prèise wan bijbelstudenti nanga yu heri ati te a e go na fesi fu di a e du den sani di a e leri. A de so taki sma e gens en fu di a e studeri Bijbel? A e kon na den konmakandra doronomo? A teki deki-ati fu gi piki na den konmakandra? A de so taki a bigin hori lezing na a Theokrasia Diniwroko-skoro, noso taki a bigin teki prati na a preikiwroko? Prèise en fu di a e go na fesi. Disi sa gi en krakti èn a sa gi en deki-ati.—Odo 25:11.
4 Sani di a sma kan du di e hori a bijbelstudie: Son preikiman ben man yepi den bijbelstudenti fu den fu kon leri sabi tra sma na ini a gemeente, fu di den aksi tra preikiman fu kon nanga den na a studie. No draidrai fu gi a studenti wan kari fu kon na den gemeente konmakandra. Te a e bigin kon na den konmakandra, dan yu musu yepi en fu kon leri sabi tra brada nanga sisa tu. A de so taki a e du muiti fu tapu nanga wan takru gwenti, soleki a smoko di a e smoko tabaka? A de so taki wan sma na ini en osofamiri e gens en fu di a e studeri Bijbel? Kande a kan kisi yepi te a e taki nanga wan preikiman di ondrofeni den srefi sani dati tu.—1 Petr. 5:9.
5 Den nyunwan abi deki-ati fanowdu fu a gemeente, so taki den man tan go na fesi na ini a tru anbegi èn den man tan dini Gado. Wi alamala kan yepi den fu tron moro bun mati fu Gado te wi e sori taki wi trutru e broko wi ede nanga den.