Yu kan de wan leriman!
1. Sortu spesrutu grani ibri Kownukondre preikiman abi?
1 Wan fu den moro moi pisi fu a diniwroko, na te wi e leri sma den tru tori fu Bijbel. Te wi e si taki wan sma e arki a Kownukondre boskopu èn te wi e yepi en fu kon krosibei na a Moro Heiwan fu hemel nanga grontapu, dan dati na wan heri moi sani fu ondrofeni (Yak. 4:8). Ibri Kownukondre preikiman musu wani gi leri na wan sma di e angri fu sabi san tru, èn a musu wani si taki a sma e tyari prenspari kenki kon na den fasi fu en, na a fasi fa a e denki, èn na a fasi fa a e tyari ensrefi.—Mat. 28:19, 20.
2. Fu san ede son sma e draidrai kande fu hori wan bijbelstudie, èn san kan yepi den sma disi?
2 Frutrow tapu Yehovah: Na ini owruten, getrow futuboi fu Yehovah, no ben feni densrefi bun nofo fu du a wroko di Yehovah gi den fu du. Fu di man soleki Moses, Yeremia, Amos nanga tra sma di no ben de prenspari, ben frutrow tapu Yehovah Gado, meki den no ben e tweifri moro, ma den ben man du a prenspari wroko di Yehovah gi den fu du (Ex. 4:10-12; Yer. 1:6, 7; Amos 7:14, 15). Na apostel Paulus sosrefi ben kisi „deki-ati”. Fa so? Ensrefi e taki dati na ’Gado gi en deki-ati’ (1 Tes. 2:2). Iya, wi alamala kan abi a frutrow taki Yehovah sa yepi wi, èn taki a sa gi wi a koni nanga a krakti di wi abi fanowdu fu hori bijbelstudie di e go na fesi.—Yes. 41:10; 1 Kor. 1:26, 27; 1 Petr. 4:11.
3, 4. Sortu leri wi e kisi so taki wi man gi trawan leri fu Gado Wortu?
3 Teki leri: Yehovah Gado, wi Gran Leriman, seti sani fu wi kisi leri doronomo so taki wi kan de leriman di bun dorodoro (Yes. 54:13; 2 Tim. 3:16, 17). Teki a leri disi fu Yehovah, fu di yu o du ala san yu man fu frustan Bijbel moro bun èn fu leri sma den tru tori fu Bijbel na wan moro bun fasi. Spesrutu na a Theokrasia Diniwroko-skoro nanga a Diniwroko Konmakandra wi e leri fa fu de bun leriman. Ma a no de fu taki dati na ala den gemeente konmakandra wi e kisi leri fa fu gebroiki Gado Wortu.
4 Du muiti fu sabi fa yu kan meki sma kon frustan den dipi tru tori fu Bijbel, na wan makriki fasi. A Diniwroko-skoro-buku e taki na tapu bladzijde 227: „Yusrefi musu frustan bun san a tori fu yu wani taki, bifo yu kan meki trawan frustan en.” Te wi e gi piki na den konmakandra, dan dati e yepi wi fu hori prenspari tori na prakseri, èn wi sa man gebroiki den sani dati bakaten. Fu dati ede, sreka yusrefi bun èn kon abi a frutrow moro nanga moro taki yu man gi sma leri tu.
5. Sortu tra yepisani wi abi na ini a gemeente, so taki wi kan tron moro bun leriman?
5 A no de fu taki dati, sensi di wi leki preikiman bigin du a preikiwroko, wi ben leri fa fu du dati fu di wi ben wroko makandra nanga trawan na ini a preikiwroko (Luk. 10:1). Efu a kan, yu kan go na bijbelstudie makandra nanga preikiman di abi ondrofeni, soleki den pionier, owruman noso den opziener di e go na den difrenti gemeente. Luku fa den e tyari difrenti tru tori fu Bijbel kon na krin nanga yepi fu makriki agersitori èn tra yepisani na ini den publikâsi di wi e gebroiki fu studeri nanga sma. Aksi den san yu kan du fu tron wan moro bun leriman (Odo 1:5; 27:17). De nanga tangi gi a leri disi di yu e kisi fu brada nanga sisa, fu di te yu e luku en bun, a leri disi komoto fu Gado.—2 Kor. 3:5.
6. San de prenspari efu yu wani tron wan leriman fu Gado Wortu?
6 Poti yu frutrow tapu Yehovah, èn kisi wini fu a leri di a gi. Begi Gado so taki yu kan go na fesi ini a tori disi (Ps. 25:4, 5). Yu sosrefi kan ondrofeni a prisiri fu yepi wan sma fu tron leki yu. Iya, yu kan yepi wan sma fu tron wan leriman fu Gado Wortu!