Suma na a Kownu fu Gado Kownukondre?

• Gado ben o poti en leki Kownu. „Na mi, iya, na mi srefi poti a kownu fu mi.” Mi o „gi yu den kondre fu grontapu leki gudu” èn mi o „gi yu heri grontapu, so taki a kan de fu yu”.​—Psalm 2:6, 8.

• A ben o de wan bakapikin fu Kownu David. „Wan pikin gebore gi wi. Wi kisi wan manpikin . . . Na ala sei a o abi makti leki wan granman èn ala ten sani o waka bun te a e sidon na tapu a kownusturu fu David èn te a e tiri en kownukondre di o tan fu têgo.”​—Yesaya 9:6, 7.

• A ben o gebore na ini Betlehem. „Ai, Betlehem . . . fu yu wan sma o kon di o tron tiriman . . . A o abi furu makti te na a moro farawe presi fu grontapu.”​—Mika 5:2, 4.

• Sma no ben o lobi en èn den ben o kiri en. „Sma spotu en èn wi si en leki wan soso sani. . . . Den dyuku en fu wi sondu ede. Den pina en fu den ogri di wi du.”​—Yesaya 53:3, 5.

• A ben o kisi wan opobaka èn a ben o kisi glori. „Yu no o libi mi na ini Grebi. Yu no o meki a sma di tai hori na yu, tan na ini a grebi-olo. . . . Te mi de na yu reti-anusei, dan mi o prisiri fu ala ten.”​—Psalm 16:10, 11.

Yesus Krestes na a moro bun Tiriman

Yesus Krestes na a wan-enkri sma fu suma wi kan taki dati en na a moro bun Tiriman. Fu taki en leti, wan engel ben taigi Maria, a mama fu Yesus: „Gado o gi en a kownusturu fu en papa David . . . èn en Kownukondre o tan fu ala ten.”​—Lukas 1:31-33.

Yesus noiti no tron Tiriman dyaso na grontapu. Na presi fu dati, a de Kownu fu Gado Kownukondre na hemel èn a o tiri libisma dyaso na grontapu. Fu san ede a de a moro bun Tiriman? Luku san a du di a ben de na grontapu.

• Yesus ben broko en ede nanga sma. Yesus ben yepi mansma nanga umasma, yonguwan nanga owruwan, pôtisma nanga gudusma, èn sma fu difrenti kulturu (Mateyus 9:36; Markus 10:16). Wan gwasiman ben begi Yesus: „Efu yu wani nomo, yu kan meki mi kon krin.” Fu di Yesus ben sari a man, meki a dresi en.​—Markus 1:40-42.

• Yesus leri wi fa wi kan du a wani fu Gado. A ben taki: „Unu no kan dini Gado èn dini Gudu na a srefi ten.” A gi sma deki-ati tu fu du gi trawan san den wani taki trawan du gi den. A sori sma taki Gado e luku san wi e du èn taki a e luku srefi fa wi e denki èn fa wi e firi. Sobun, efu wi wani taki Gado feni wi bun, dan wi musu basi den firi di wi abi dipi na ini wi ati (Mateyus 5:28; 6:24; 7:12). Yesus ben sori krin taki efu wi wani de koloku trutru, wi musu kon sabi fosi san Gado wani taki wi du èn wi musu du dati tu.​—Lukas 11:28.

• Yesus leri wi fa fu sori lobi gi trawan. Yesus ben taki èn du sani di naki sma ati trutru. „Ala den sma fruwondru fu a fasi fa a ben gi leri. Bika a ben e gi den leri leki wan sma di kisi makti fu Gado” (Mateyus 7:28, 29). A ben leri sma: „Lobi un feanti.” A ben begi srefi gi sonwan fu den sma di sorgu taki a dede. A taki: „Mi Tata, gi den pardon, bika den no sabi san den e du.”​—Mateyus 5:44; Lukas 23:34.

A de krin taki Yesus na a moro bun Tiriman gi grontapu. A lobi libisma èn a o man yepi den trutru. Ma o ten a o bigin tiri?