Wi e sori lobi gi Gado te wi e du wi diniwroko
1. San Yesus ben du fu di a lobi Gado?
1 Yesus ben du en diniwroko fu di a ben abi lobi. Ibri pisi fu Yesus en diniwroko ben sori krin taki a abi lobi gi Yehovah. Yesus ben taki: „Fu meki grontapu sabi taki mi lobi a Tata, meki mi e du san a Tata taigi mi fu du” (Yoh. 14:31). Leki bakaman fu Yesus, wi abi a grani tu fu sori dipi lobi gi Gado na ini a diniwroko fu wi.—Mat. 22:37; Ef. 5:1, 2.
2. Fa lobi gi Yehovah abi krakti tapu a diniwroko fu wi?
2 „Meki yu nen kon santa”: Te wi de fayafaya fu teki ibri okasi di wi kisi fu taki nanga trawan fu Yehovah nanga en Kownukondre, dan wi e sori lobi gi Gado. Fu taki en leti, na so wi e yepi fu meki a nen fu en kon santa (Ps. 83:18; Esek. 36:23; Mat. 6:9). Neleki fa a ben de nanga a diniwroko fu Yesus, na so wi e sori nanga yepi fu wi diniwroko ibri leisi baka, taki trutru wi wani Yehovah nen kon santa èn taki a wani fu en pasa.—Mat. 26:39.
3. Na sortu fasi lobi gi Yehovah e yepi wi fu horidoro te wi e kisi problema?
3 Lobi e meki taki wi man horidoro: Lobi gi Yehovah e meki taki wi man horidoro awansi sortu problema wi abi (1 Kor. 13:4, 7). Yesus ben kisi fu du nanga furu muilek situwâsi di ben kan meki taki a tapu nanga en diniwroko. Ma fu di a ben abi bigi lobi gi Yehovah, èn fu di a ben wani du a wani fu En, meki a ben man horidoro na ini den muilek situwâsi dati (Mark. 3:21; 1 Petr. 2:18-23). Wi sosrefi e kisi fu du nanga furu problema, ma a lobi di wi abi gi Gado kan yepi wi fu horidoro. Te wi e teki na eksempre fu Krestes, dan wi no sa frede èn wi o abi a deki-ati fu du ala san wi man na ini wi diniwroko. A kan abi krakti tapu wi te famiri e gens wi, te a gosontu fu wi e go na baka, te wi e kon owru, noso te sma no wani arki wi. Ma den sani dati no e tapu wi fu du wi diniwroko na a moro bun fasi, fu di na so wi e sori lobi gi Yehovah.
4. Sortu grani wi e kisi fu di wi abi lobi gi Yehovah?
4 Lobi tranga, èn a de wan blesi fu sori taki wi lobi Gado nanga wi heri ati, te wi e du wi diniwroko (1 Kor. 13:13). A ten e kon moro krosibei te Yehovah nen o santa fu ala ten. Fosi a ten dati doro, meki a de so taki wi „sori lobi moro nanga moro”.—Fil. 1:9; Mat. 22:36-38.