„No frede”
1. Neleki Yeremia, sortu problema wi kan abi tu?
1 Di Yeremia kisi a wroko fu dini leki wan profeiti, dan a ben feni taki a no bun nofo fu du a wroko. Ma Yehovah gi en a dyaranti fu „no frede”, èn na wan switi fasi a gi en a krakti fu du a wroko dati (Yer. 1:6-10). Na ini a ten disi, wi kan syensyen noso wi kan feni taki wi no bun nofo fu du wi diniwroko. Disi kan meki taki wi no e du so furu na ini a diniwroko. Wi kan frede son leisi fu gi kotoigi, fu di wi no sabi fa sma o handri noso fa den o denki fu wi. San wi kan du fu no frede, èn sortu blesi wi o kisi fu dati?
2. Fa a sreka di wi e sreka wisrefi na fesi o yepi wi fu no frede so furu moro te a abi fu du nanga a diniwroko?
2 Sreka na fesi: Te wi e sreka wisrefi bun, dan wi no o frede so furu moro. Fu eksempre, te wi luku na fesi san wi o taigi wan sma di e pruberi fu tapu a takimakandra, dan wi o de srekasreka fu sabi fa wi o handri te sma e du dati (Odo 15:28). A ben o bun fu oefen na a Osofamiri Anbegi fa fu handri na ini muilek situwâsi di kan opo kon na skoro, noso na ini a diniwroko.—1 Petr. 3:15.
3. Fa a frutrow di wi e frutrow tapu Yehovah, o yepi wi fu no frede?
3 Frutrow tapu Yehovah: Wan sani di o yepi wi trutru fu no frede moro, na te wi e frutrow tapu wi Gado. Yehovah gi wi a dyaranti taki a o yepi wi (Yes. 41:10-13). Nowan tra sma kan gi wi a dyaranti disi, a no so? Boiti dati, Yesus gi wi a dyaranti taki srefi efu wi de na ini wan situwâsi di wi no ben fruwakti, dan a santa yeye fu Gado o yepi wi fu gi kotoigi na wan bun fasi (Mark. 13:11). Sobun begi Yehovah doronomo fu aksi en fu kisi a santa yeye fu en.—Luk. 11:13.
4. Sortu blesi wi o kisi te wi e horidoro na ini a diniwroko aladi wi kisi fu du nanga muilek situwâsi?
4 Den blesi di wi o kisi: Te wi e horidoro na ini a diniwroko aladi wi e kisi fu du nanga muilek situwâsi, dan wi e kisi a deki-ati fu pasa den tesi di wi o kisi na ini a ten di e kon. Wi o abi deki-ati fu gi kotoigi sondro fu frede. Disi e sori taki wi abi a santa yeye (Tori. 4:31). Boiti dati, te Yehovah e yepi wi fu no frede moro, dan wi e tranga a bribi fu wi èn wi e frutrow moro tapu Yehovah di e yepi wi (Yes. 33:2). Wi o kisi prisiri èn wi o de koloku fu di wi sabi taki wi e plisi wi hemel Tata (1 Petr. 4:13, 14). Fu dati ede, meki a de so taki wi no frede moro fu meki a Kownukondre boskopu bekènti, èn meki wi abi a frutrow ala ten taki Yehovah o yepi wi!