Wan yepi gi osofamiri
1. Fa a Sabat di ben hori ibri wiki ben tyari wini kon gi den osofamiri na ini Israel?
1 A Sabat ben de wan lobi-ati seti fu Yehovah di ben tyari wini kon gi osofamiri. Den Israelsma ben man rostu fu a tranga wroko di den ben e du ala dei èn den ben abi ten fu prakseri fu a bun-ati fu Yehovah nanga a matifasi di den abi nanga en. Papa nanga mama ben kan gebroiki na okasi disi bun fu leri den pikin a Wet, so taki a ben kan de na ini den ati (Deut. 6:6, 7). A Sabat ben gi a pipel fu Yehovah na okasi ibri wiki fu poti prakseri na a anbegi fu den.
2. San a Sabat e leri wi fu Yehovah?
2 A no de fu taki dati Yehovah no feni en fanowdu moro taki osofamiri e hori a Sabat. Ma a wet dati e leri wi wan sani fu wi Gado. Ala ten a e broko en ede trutru nanga a pipel fu en èn a e sorgu taki den kisi wini fu di den abi wan bun matifasi nanga en (Yes. 48:17, 18). Wan fasi fa Yehovah e sori taki a e broko en ede nanga wi na wan lobi-ati fasi, na taki a seti na Osofamiri Anbegi.
3. San na a marki fu a neti fu na Osofamiri Anbegi?
3 San na a marki fu a neti fu na Osofamiri Anbegi? Na ini yanuari 2009, a Gemeente Bijbelstudie bigin hori tapu a srefi neti leki a Theokrasia Diniwroko-skoro nanga a Diniwroko Konmakandra. Wan reide fu san ede a sani disi ben kenki, na fu gi osofamiri na okasi fu kon abi wan moro bun matifasi nanga Yehovah leki osofamiri. Disi ben o meki taki den poti wan spesrutu neti ibri wiki gi na Osofamiri Anbegi. Ibri osofamiri ben kisi a deki-ati fu skoifi na osofamiri studie fu den tapu a neti di den ben hori a bukustudie fosi, efu dati kan. Den kan gebroiki a ten disi fu hori Bijbel takimakandra sondro fu hasti densrefi èn fu studeri sani di na osofamiri abi fanowdu.
4. Na osofamiri musu hori a studie fu den wán yuru nomo? Fruklari disi.
4 Di wi ben musu go na a Gemeente Bukustudie, dan wi ben abi ten fanowdu fu sreka wisrefi, fu go na a presi pe a bukustudie ben hori, èn go so moro fara. Gi furu fu wi, a ben de so taki te wi ben e go na a konmakandra disi, dan wi ben e gebroiki moro leki a wán yuru nomo di a konmakandra ben e hori. Nanga a kenki disi di tyari kon na a konmakandra fu wi, wi abi a neti disi now fu anbegi Yehovah leki osofamiri. Fu dati ede, wi no abi fu hori na Osofamiri Anbegi wán yuru nomo. Na presi fu dati, wi musu denki san wi osofamiri abi fanowdu èn san den no man du. Baka dati wi kan bosroiti omeni ten wi o gebroiki fu doro a marki fu na Osofamiri Anbegi.
5. Wi musu gebroiki ala a ten fu hori takimakandra? Fruklari disi.
5 Wi musu gebroiki ala a ten fu hori takimakandra? Te trowpaar nanga osofamiri di abi pikin e taki nanga makandra fu wan Bijbel tori, dan den e gi makandra deki-ati (Rom. 1:12). Na so fasi na osofamiri e kon moro krosibei fu makandra. Fu dati ede, Bijbel takimakandra musu de a moro prenspari pisi fu na Osofamiri Anbegi. Ma toku ibri memre fu na osofamiri kan gebroiki ten tu fu studeri nanga ensrefi. Fu eksempre, baka te na osofamiri abi wan takimakandra, dan den kan tan sidon makandra aladi ibriwan fu den e go doro fu studeri nanga ensrefi. Kande a kan go doro fu sreka ensrefi gi den konmakandra noso fu leisi den tijdschrift. Son osofamiri bosroiti fu no leti a telefisi a heri neti dati.
6. Fa den takimakandra kan hori?
6 Fa fu hori den takimakandra. A no ala ten na osofamiri o abi fu hori wan aksi nanga piki takimakandra. Furu osofamiri e hori na Osofamiri Anbegi fu den na a srefi fasi leki den mindriwiki konmakandra fu wi, fu sorgu taki ala sma de fayafaya èn fu sorgu taki ala sma e feni en moi. Den e taki fu difrenti pisi èn den e hori dati na difrenti fasi. Fu eksempre, kande den e leisi Bijbel makandra, kande den e sreka densrefi gi wan pisi fu a konmakandra, èn kande den e oefen san den o taki na ini a preikiwroko. Bladzijde 6 e gi wi wan tu eksempre fu sani di wi kan du.
7. Fa papa nanga mama musu hori na Osofamiri Anbegi?
7 Na sortu fasi papa nanga mama musu hori na Osofamiri Anbegi? Na osofamiri fu yu sa leri sani moro bun te na Osofamiri Anbegi e hori na wan lobi-ati fasi èn te den e firi bun fu de drape. Kande yu kan studeri son leisi na dorosei efu a weer moi. Yu kan teki pauze te dati de fanowdu. Son osofamiri e dringi wan switi sani baka na Osofamiri Anbegi. Papa nanga mama musu luku bun taki den no e gebroiki a neti disi fu piri-ai gi den pikin. Kande den o gebroiki pikinso fu a ten fu taki fu wan spesrutu sani di no bun noso fu wan problema di den si. Ma efu a de wan tori di kan hati den firi fu yu pikin, dan a ben o moro bun fu taki nanga en wawan fu a sani disi na wan tra dei fu a wiki. Na so fasi yu no abi fu meki a firi syen na fesi en brada nanga sisa. Na Osofamiri Anbegi no musu soi èn a no musu de tumusi seryusu, ma a musu de wan okasi di e sori taki wi e anbegi a koloku Gado.—1 Tim. 1:11.
8, 9. Fa osofamiri-edeman musu sreka densrefi?
8 Fa na osofamiri-edeman kan sreka ensrefi? Na osofamiri o kisi furu wini te na edeman fu na osofamiri e sreka ensrefi na fesi gi ibri neti te den o hori na Osofamiri Anbegi. A o luku fu sortu sani den o taki èn san na a moro bun fasi fu taki fu dati (Odo 21:5). A ben o bun efu a masra e taki fosi nanga en wefi fu a sani disi (Odo 15:22). Un osofamiri-edeman, fu san ede unu no e aksi un pikin wanwan leisi fu sortu sani den ben o wani taki? Te yu e du dati, dan yu o kon si san den lobi èn nanga sortu sani den e broko den ede.
9 Nofo tron a de so taki osofamiri-edeman no o abi fu gebroiki bun furu ten fu sreka densrefi. A no de fu taki dati na osofamiri o lobi en te unu e du son sani ibri wiki, èn na edeman no o abi fu kon nanga wan nyun sani ibri leisi baka. A ben o bun efu a sreka ensrefi baka ibri studie, fu di den sani di en osofamiri abi fanowdu, o de bun ete na en prakseri. Son osofamiri-edeman e skrifi na tapu wan pisi papira san den o du na a Osofamiri Anbegi èn den e plak dati na wan presi pe na osofamiri kan si en makriki, soleki na a ijskasi. Disi o meki taki na osofamiri o de fayafaya èn den o sabi san den kan fruwakti. Boiti dati, den o abi ten fu sreka densrefi gi a studie efu dati de fanowdu.
10. Fa den sma di e libi den wawan kan gebroiki a neti fu na Osofamiri Anbegi?
10 Fa a de efu mi de mi wawan? Den sma di e libi den wawan kan gebroiki a neti fu na Osofamiri Anbegi fu studeri nanga densrefi. Wan bun fasi fa den kan du dati na fu leisi Bijbel, sreka gi den konmakandra, èn leisi den Waktitoren nanga Ontwaakt! Son preikiman abi wan spesrutu tori di den e studeri tu. Wanwan leisi den kan aksi wan tra preikiman noso osofamiri fu kon makandra nanga den fu abi wan moi Bijbel takimakandra di e gi den deki-ati.
11, 12. San na wan tu fu den wini te wi e hori na Osofamiri Anbegi ibri wiki?
11 San na den wini di wi o kisi te wi e hori na Osofamiri Anbegi ibri wiki? Den sma di e teki prati na a tru anbegi nanga den heri ati, e kon moro krosibei na Yehovah. Boiti dati, osofamiri di e anbegi Yehovah makandra e kon moro bun nanga makandra. Wan trowpaar ben skrifi sortu blesi den kisi: „Wi e pionier leki trowpaar di no abi pikin, èn wi e angri trutru fu hori na Osofamiri Anbegi. Wi e firi leki wi e kon moro krosibei na makandra èn na wi hemel Tata. Now, te wi e wiki mamanten tapu a dei te wi e hori na Osofamiri Anbegi fu wi, dan wi e taigi makandra: ’Ai, tide neti wi o abi wi Osofamiri Anbegi!’”
12 A seti fu na Osofamiri Anbegi de wan yepi tu gi osofamiri di abi furu fu du. Wan mama di no abi masra èn di e kweki tu manpikin, aladi a e du a gewoon pionierwroko, ben skrifi: „Fosi, wi ben e hori wi osofamiri studie wanwan leisi fu di mi ben weri. Mi no ben sabi fa fu fiti en na ini a schema fu wi. Fu dati ede mi e skrifi unu fu taki un tangi trutru gi a seti fu na Osofamiri Anbegi. Now wi e hori wi osofamiri studie ibri wiki èn wi e kisi wini fu dati.”
13. San yu musu du efu yu wani taki yu osofamiri kisi wini fu a seti disi?
13 Neleki a Sabat, na so a neti fu na Osofamiri Anbegi na wan presenti fu wi hemel Tata, di kan yepi osofamiri (Yak. 1:17). Efu den osofamiri na ini Israel ben wani kisi wini èn efu den ben o wani kisi wan moro bun matifasi nanga Yehovah, dan den ben musu gebroiki a dei fu a Sabat bun. Na so a de tu taki efu osofamiri wani kisi wini, dan den musu gebroiki a neti fu na Osofamiri Anbegi na wan bun fasi (2 Kor. 9:6; Gal. 6:7, 8; Kol. 3:23, 24). Te yu osofamiri e gebroiki a seti disi bun, dan unu o man taki a srefi sani disi leki a psalm skrifiman: „Ma a bun gi mi fu kon krosibei na Gado. Na a Moro Hei Masra Yehovah mi e si leki mi kibripe. Dati meki mi o fruteri sma ala san yu du.”—Ps. 73:28.
[Prenspari pisi na tapu bladzijde 5]
Na Osofamiri Anbegi no musu soi èn a no musu de tumusi seryusu, ma a musu de wan okasi di e sori taki wi e anbegi a koloku Gado
[Faki na tapu bladzijde 6]
KIBRI A PAPIRA DISI
Wan tu sani di yu kan du na a Osofamiri Anbegi
Bijbel:
• Leisi wan pisi makandra fu a leisipisi fu Bijbel fu ibri wiki. Son pisi na ini Bijbel skrifi na so wan fasi taki wan sma kan leisi neleki en e fruteri a tori, èn den trawan kan leisi neleki den na den difrenti sma na ini a tori.
• Neleki na ini wan drama, un kan plèi wan tori di unu leisi na ini Bijbel.
• Meki ibri memre fu na osofamiri leisi wan pisi fu wan kapitel na ini Bijbel na fesi èn meki a skrifi wán noso tu aksi di a abi fu a tori. Baka dati, unu kan luku den aksi fu ibriwan sma makandra.
• Ibri wiki unu kan skrifi wan Bijbeltekst na tapu wan karta èn pruberi fu memre en èn fruklari en. Kibri den difrenti karta disi èn luku den baka ibri wiki fu si omeni Bijbeltekst yu kan memre ete.
• Arki a CD fu Bijbel, èn leisi tu na ini yu eigi Bijbel.
Konmakandra:
• Sreka unsrefi makandra gi wan pisi fu den konmakandra.
• Oefen den Kownukondre singi di wi o singi na ini a wiki dati.
• Efu wan sma abi wan lezing na a Theokrasia Diniwroko-skoro noso wan demonstrâsi na a Diniwroko Konmakandra, dan taki nanga makandra fa a kan du dati, noso oefen en na fesi na osofamiri.
Sani di na osofamiri abi fanowdu:
• Luku den tori na ini den buku Jonge mensen vragen noso Teki leri fu a Bigi Leriman.
• Oefen nanga makandra fa fu handri te wan spesrutu problema opo kon na skoro.
• Papa nanga mama kan du neleki den na den pikin, èn den pikin kan du neleki den na papa nanga mama. Meki den pikin go ondrosuku wan tori èn baka dati den kan taki-go-taki-kon nanga den papa nanga mama fu a tori dati.
A preikiwroko:
• Oefen nanga makandra fa fu hori wan pristeri tapu satra nanga sonde.
• Taki fu marki di na osofamiri kan poti so taki den kan du moro na ini a preikiwroko na a ten fu a Memrefesa noso te den abi fakansi.
• Gi ibri memre fu na osofamiri wan tu miniti fu ondrosuku fa fu gi piki tapu difrenti aksi di sma kan poti na ini a preikiwroko, èn baka dati oefen nanga makandra.
Tra sani di yu kan du:
• Leisi wan artikel makandra fu wan nyun tijdschrift.
• Meki ibri memre fu na osofamiri leisi wan artikel na fesi di a feni moi na ini den nyun tijdschrift, èn meki a fruteri fu dati.
• Wanwan leisi yu kan gi wan preikiman noso wan trowpaar a kari fu kon makandra nanga unu te unu e hori na Osofamiri Anbegi, èn kande yu kan interview den.
• Luku wan fu den video fu wi èn taki fu en.
• Taki nanga makandra fu den artikel „Jonge mensen vragen” noso „Voor gezinsbespreking” na ini na Ontwaakt!
• Taki nanga makandra fu den artikel „Leri den pikin fu yu” noso „Gi den yonguwan” na ini A Waktitoren.
• Leisi èn taki fu wan pisi fu a Jaarboek noso fu wan publikâsi di wi ben kisi na a lasti distrikt kongres.
• Baka te unu go na wan kongres noso wan bigi konmakandra, dan taki fu den moro prenspari sani di ben kon na fesi.
• Luku sani di Yehovah meki, soleki bromki nanga meti, èn taki nanga makandra san dati e leri wi fu Yehovah.
• Meki wan sani makandra soleki wan pikin ark, wan pikin tempel, noso wan karta.