Wi o gi wan bun kotoigi
1. Boiti a lezing di o hori, sortu tra sani kan abi krakti tapu den sma di e kon na a Memrefesa? Fruklari dati.
1 O ten wi o du dati? Tapu a neti fu a Memrefesa. Wi du furu muiti fu gi sma wan kari fu kon makandra nanga wi na a Memrefesa. Den sani di den fisitiman o yere, a no den wan-enkri sani di kan abi krakti na den tapu. Baka di wan uma ben go na a Memrefesa, dan a ben taki spesrutu fu den sani di a ben si. A ben taki fa ala sma ben abi switifasi gi makandra èn a ben lobi a moi krin gebow di friwani wrokoman ben bow èn ondrow. Fu dati ede, boiti a takiman, wi alamala kan abi wan prati na a gi di wi e gi kotoigi tapu a moro prenspari okasi na ini a yari.—Ef. 4:16.
2. Fa ibriwan fu wi kan gi kotoigi na den fisitiman?
2 Taki den fisitiman odi na wan switi fasi: Te wi e lafu nanga den fisitiman èn te wi e taki den odi na wan switi fasi, dan dati o de wan kotoigi gi den (Yoh. 13:35). Srefi efu yu no man taki nanga ala sma, toku yu kan taigi den sma di e sidon krosibei fu yu, fa yu nen (Hebr. 13:1, 2). Luku efu yu e si sma di no sabi nowan sma drape. A kan de so taki den kisi wan kari na a ten di wi ben prati den papira gi sma. Kande yu kan aksi: „Disi na a fosi leisi taki yu kon dyaso?” Aksi den fu sidon sei yu, èn taigi den taki yu o breiti fu gi piki tapu iniwan aksi di den abi. Efu a gemeente fu yu musu gowe esi-esi so taki wan tra gemeente kan gebroiki a zaal, dan kande yu kan taigi a sma: „Mi ben sa wani sabi fa yu ben feni a programa. Wan fasi de fa mi kan miti yu?”
3. Fa wi kan gi den preikiman di no e preiki moro, wan switikon?
3 Gi den preikiman di no e preiki moro, wan switikon: A no de fu taki dati preikiman di no e preiki moro o de drape, èn sosrefi den wan di e kon soso wán leisi wan yari na a Memrefesa. Gi den sma disi wan switikon èn sori den taki yu breiti trutru fu si den (Rom. 15:7). Baka dati, den owruman kan go na den oso fu gi den deki-ati fu abi demakandra baka nanga a gemeente. Wi e begi taki furu fu den sma di e kon na a Memrefesa o wani gi Gado glori fu den sani di den yere fu en, ma sosrefi fu den ’bun wroko fu wi di densrefi si’.—1 Petr. 2:12.