Wi musu abi pasensi na ini wi diniwroko
1. Fa Yehovah sori taki a abi pasensi nanga libisma?
1 Gado abi furu pasensi nanga libisma (Ex. 34:6; Ps. 106:41-45; 2 Petr. 3:9). Wan fu den moro bun eksempre di e sori taki Gado lobi wi èn taki a abi pasensi nanga wi, de fu si na den sani di abi fu du nanga a Kownukondre preikiwroko di e du na heri grontapu. Yehovah abi pasensi nanga libisma pikinmoro 2000 yari kaba, èn toku a e tan hari reti-ati sma kon na en (Yoh. 6:44). Fa wi kan abi pasensi neleki Yehovah, na ini wi diniwroko?
2. Fa wi kan sori taki wi abi pasensi te wi e wroko na ini a kontren fu wi?
2 Na oso-fu-oso preikiwroko: Wi abi pasensi neleki Yehovah, te wi e „tan” preiki na ini kontren pe sma no sori ete taki den wani kon leri sabi Gado (Tori. 5:42). Wi e sori taki wi abi pasensi fu di wi e horidoro te sma no wani arki, te den e spotu wi, èn te den e gens wi na ini a preikiwroko (Mark. 13:12, 13). Wi e sori pasensi tu, te wi e tan du muiti fu fruteri sma den tru tori fu Bijbel srefi, te furu sma no de na oso.
3. Fu san ede wi musu abi pasensi te wi e tyari gobaka èn te wi e hori Bijbelstudie?
3 Den Bijbelstudie: Te wi prani wan sani, dan wi musu abi pasensi fu meki a gro. Wi kan sorgu a sani bun, ma wi no kan meki a gro moro esi (Yak. 5:7). Na so a de tu, te wan sma e kon leri sabi Gado. So wan sma e go na fesi safrisafri (Mark. 4:28). Den Bijbelstudenti fu wi kan feni en muilek fu no bribi den falsi kerki leri moro noso fu tapu nanga gwenti di no e kruderi nanga Bijbel. Wi no musu dwengi den fu tyari kenki kon, soso fu di wi wani den fu go na fesi esi-esi. Wi musu abi pasensi fu gi a yeye fu Gado na okasi fu wroko tapu na ati fu a studenti.—1 Kor. 3:6, 7.
4. Fa pasensi o yepi wi fu gi bun kotoigi na den famiriman fu wi di no de na bribi?
4 Famiriman fu wi di no de na bribi: Aladi wi wani taki den famiriman fu wi di no de na bribi e kon leri sabi den tru tori fu Bijbel, toku wi e sori taki wi abi pasensi fu di wi e wakti a yoisti momenti fu fruteri den fu a bribi fu wi. Wi o luku bun tu taki wi no e bruya den, fu di wi e taki fu tumusi furu sani (Preik. 3:1, 7). Na a srefi ten, wi kan sori den nanga den sani di wi e du, sortu krakti a tru anbegi abi na wi tapu. Boiti dati, wi o de srekasreka fu taki fu a bribi fu wi na wan safri fasi èn nanga bigi lespeki (1 Petr. 3:1, 15). Iya, te wi e sori taki wi abi pasensi na ini wi diniwroko, dan wi o abi moro bun bakapisi èn wi o plisi wi hemel Tata.