Kibri yu konsensi
1. San na a nen fu a spesrutu dei konmakandra fu a dienstyari 2013, èn fa a programa o yepi wi?
1 Ala dei wi kan miti nanga sani di kan pori wi konsensi. Fu dati ede a spesrutu dei konmakandra fu a dienstyari 2013, di e bigin 1 september 2012, nen „Kibri yu konsensi” (1 Tim. 1:19). A programa seti spesrutu fu yepi ibriwan fu wi fu poti seryusu prakseri na a fasi fa wi e gebroiki a moi kado disi di wi kisi fu wi Mekiman.
2. Sortu prenspari aksi sa kisi piki na a programa?
2 Suku den piki disi: A programa sa gi piki tapu seibi prenspari aksi di abi fu du nanga wi konsensi:
• San kan pori wi konsensi?
• Fa wi kan meki wi konsensi wroko moro bun?
• San wi kan du fu no abi nowan brudu-paiman?
• Fa a fasi fa wi e denki èn e fiti Bijbel gronprakseri na ini wi libi, e sori sortu sma wi de trutru?
• San kan yepi wi fu no du sani di e trobi a konsensi fu trawan?
• Yonguwan, fa unu kan horidoro te tesi miti unu?
• Sortu blesi wi o kisi te wi e arki a konsensi fu wi di a santa yeye e tiri?
3. Fa a programa o yepi wi?
3 Yehovah kan yepi wi fu kakafutu gi den sani di Satan e pruberi fu du fu pori wi konsensi. Nanga yepi fu a Wortu fu Gado èn nanga yepi fu en organisâsi, wi hemel Tata di lobi wi e taigi wi: „Disi na a pasi. Waka na tapu” (Yes. 30:21). Nanga a programa disi Yehovah e sori wi sortu pasi wi musu waka. Fu dati ede, meki muiti fu de na a heri programa. Poti bun prakseri na a programa èn luku fa yusrefi kan gebroiki den rai di wi kisi. Taki nanga yu osofamiri fu a programa. Te wi e fiti den rai di wi kisi, dan dati sa yepi wi fu „tan abi wan bun konsensi” èn a sa yepi wi fu no meki den prisiri sani fu a grontapu fu Satan pori a matifasi di wi abi nanga Yehovah.—1 Petr. 3:16.