Prisiri nanga a tranga wroko fu yu
1. San kan meki taki wi no du wi diniwroko nanga faya moro?
1 Wan libisma meki na so wan fasi taki a kan „prisiri nanga a tranga wroko fu en” (Preik. 2:24). Ma te wi no e si taki sani e waka bun na ini wi diniwroko, dan wi o lasi-ati èn dati kan meki taki wi no abi prisiri moro èn taki wi no o du wi diniwroko nanga faya moro. San kan yepi wi fu si wi diniwroko na a yoisti fasi?
2. Fu san ede wi no musu fruwakti taki ala sma o wani arki a boskopu fu wi?
2 No fruwakti tumusi furu: Hori na prakseri taki wan tu sma nomo ben arki den sani di Yesus ben leri, ma toku a ben klari a wroko di a ben musu du (Yoh. 17:4). Na ini na agersitori fu a saiman, Yesus ben taki dati furu sma no ben o wani teki a Kownukondre boskopu di de leki siri (Mat. 13:3-8, 18-22). Ma te wi e meki muiti, dan toku wi o man du furu.
3. Fa wi kan gi furu „froktu” srefi te furu sma no e arki te wi e preiki?
3 Na sortu fasi wi kan gi furu froktu: Soleki fa na agersitori fu Yesus e sori, dan den sma di ben o arki a boskopu ben o „gi froktu trutru” (Mat. 13:23). Te wan aleisi pransun e gro kon bigi, dan a no e gi pikin aleisi pransun, ma a e gi aleisi siri. Wan Kresten e meki froktu te a e tan sai moro siri. Sobun, a no soso te a e meki nyun disipel a e du en wroko bun, ma na te a e tan preiki a Kownukondre boskopu. A bakapisi sa de taki wi o „prisiri” awansi sma no e arki. Wi e yepi fu meki a nen fu Yehovah kon santa (Yes. 43:10-12; Mat. 6:9). Wi abi a grani fu „wroko makandra nanga Gado” (1 Kor. 3:9). Yehovah e prisiri nanga den ’ofrandi di wi e tyari gi en nanga wi mofo’.—Hebr. 13:15, 16.
4. Sortu bakapisi a diniwroko fu wi kan abi, sondro taki wi sabi?
4 Boiti dati, a tranga wroko fu wi kan abi bun bakapisi sondro taki wi si dati. A kan de so taki sonwan fu den sma di ben yere a boskopu fu Yesus ben tron en disipel baka di a kaba en diniwroko na grontapu. Na a srefi fasi, den siri fu a Kownukondre kande no e sutu rutu wantewante na ini wan sma ati, ma bakaten a sma kan kon na ini a tru bribi sondro taki wi sabi. Iya, a diniwroko fu wi e tyari furu wini kon. Fu dati ede, meki wi „tan meki furu froktu” èn meki wi sori taki wi na disipel fu Yesus.—Yoh. 15:8.