Teki a bun eksempre fu den profeiti—Yona
1. Sortu moi fasi Yona ben abi?
1 San yu e prakseri te yu e denki fu a profeiti Yona? Son sma e si en kande leki wan fredeman noso wan man di no abi firi gi trawan. Ma a de krin fu si taki a abi sakafasi, deki-ati èn a ben de klariklari fu gi ensrefi. Fa wi kan „teki a bun eksempre” fu Yona di ben abi moi fasi?—Yak. 5:10.
2. Fa wi kan sori taki wi abi sakafasi neleki Yona?
2 Sakafasi: Na a bigin Yona lowe go na a tra sei, na presi fu go pe Gado ben taigi en fu go. Disi no e fruwondru wi fu di sma ben sabi taki den Asiriasma ben abi a gwenti fu du ogri-ati sani nanga tra sma, èn den ben e kari Ninefei „a foto di e kiri sma” (Nah. 3:1-3). Ma Yehovah ben piri-ai gi Yona èn Yona ben sori taki a abi sakafasi fu di a ben du a wroko baka di Yehovah gi en ete wan okasi (Odo 24:32; Yona 3:1-3). Aladi a ben lon gowe fosi, toku a du san Yehovah wani (Mat. 21:28-31). Wi abi a fasti bosroiti tu fu preiki a bun nyunsu srefi te wi kisi piri-ai noso te wi musu preiki na ini wan muilek kontren?
3. O ten a de fanowdu fu abi deki-ati èn san wi musu de klariklari fu gi na ini a diniwroko?
3 A ben abi deki-ati èn a ben de klariklari fu du a wroko: Di Yona kon si taki a takru bosroiti di a teki ben kan meki den tra sma na ini a sipi lasi den libi, a ben de klariklari fu dede gi den (Yona 1:3, 4, 12). Bakaten di a ben du a preikiwroko na ini Ninefei, dan a waka te na mindri a foto. Kande a ben suku wan bun presi fu fruteri sma a krutu boskopu fu Yehovah. Den sani dati e sori taki a no ben e frede, ma a ben de wan profeiti fu Gado di abi deki-ati! (Yona 3:3, 4) Fa a de nanga wi na ini a ten disi? Wi abi a deki-ati fanowdu di Gado e gi fu tan preiki te sma e gens wi (Tori 4:29, 31). Wi musu de klariklari fu gi wi ten nanga den gudu fu wi fu du a preikiwroko.—Tori 20:24.
4. Fu san ede wi musu teki ten fu denki fu den bun eksempre fu den profeiti fu Yehovah?
4 Ibri leisi te yu e leisi wan tori fu wan fu den profeiti fu Yehovah, dan a ben o bun fu poti yusrefi na ini a situwâsi fu en. Aksi yusrefi: ’San mi ben o du? Fa mi kan teki a bun eksempre fu en?’ (Heb. 6:11, 12) Na ini Wi Kownukondre diniwroko di o kon, wi o luku tra bun sani di wi kan leri fu tra reti-ati profeiti fu Yehovah.