Gebroiki a website fu wi fu gi den pikin fu yu leri
1. Fu san ede wi poti a pisi di nen „Kinderen” na tapu a website fu wi?
1 A website fu wi jw.org meki gi ala sma, awansi den yongu noso owru. A pisi fu a website di nen „Kinderen” (go na a pisi di nen „Wat de Bijbel leert” > „Kinderen”) e yepi pikin-nengre nanga den papa nanga mama fu abi wan bun matifasi nanga makandra èn nanga Yehovah (Deut. 6:6, 7). Fa yu kan gebroiki a pisi disi fu gi den pikin fu yu leri?
2. Fa wi kan feni tori fu studeri nanga den pikin di abi difrenti yari?
2 Fiti yusrefi: Ala pikin no de a srefi (1 Kor. 13:11). Fa wi kan feni tori fu studeri nanga den pikin di abi difrenti yari? Aksi yusrefi: ’San den pikin fu mi lobi? O furu den o man frustan? O langa den o man tan arki?’ Efu a pikin no owru moro dri yari, dan yu kan taki fu tori di de fu feni na a pisi di nen „Mijn eerste Bijbellessen”. Tra osofamiri lobi den Bijbel tori na a pisi di nen „Om met je kinderen te lezen”. Luku den tra fasi fa yu kan gebroiki a website.
3. Fa papa nanga mama kan gebroiki den tori nanga den studieproject na a faki di nen „Projecten voor gezinsaanbidding”?
3 „Projecten voor gezinsaanbidding”: Den sani disi kan yepi papa nanga mama fu studeri nanga den pikin. Druk a faki pe yu kan download èn leisi „Handleiding voor ouders” di e sori fa yu kan gebroiki den tori disi fu gi yu pikin leri. Go na „werkbladen” pe den pikin kan poti kloru na den prenki, èn na so fasi yu kan gi yu yongu pikin leri. Yepi den bigi pikin fu yu fu gebroiki den „studieproject”. Ibri „studieproject” abi fu du nanga a srefi Bijbel tori noso lès di yu kan gebroiki gi pikin di abi difrenti yari. Na so fasi ibriwan fu den pikin kan abi wan prati na a Osofamiri Anbegi.
4. San wi kan feni na a pisi fu a website di nen „Tron wan mati fu Yehovah”?
4 Tron wan mati fu Yehovah: Den video, singi, nanga den tra sani na a pisi disi fu wi website, e yepi papa nanga mama fu leri den yongu pikin a Wortu fu Gado (Deut. 31:12). Ibri syatu video gi pikin-nengre e leri den wan prenspari sani. Den prenki di abi sani na ini di den pikin musu suku fu feni, e sori o prenspari den sani de di den pikin leri. Fu di furu pikin-nengre lobi fu singi èn fu di singi kan yepi den pikin fu no frigiti san den leri, meki doronomo wi e poti Kownukondre singi nanga singi di de spesrutu gi pikin-nengre na tapu a website.
5. Fu san ede papa nanga mama musu aksi Yehovah meki a yepi den fu leri den pikin den tru tori fu Bijbel?
5 Papa nanga mama, Yehovah wani taki unu musu de bun papa nanga mama gi den pikin fu unu. Fu dati ede, aksi en fu yepi yu fu leri den pikin den tru tori fu Bijbel (Krut. 13:8). Nanga a yepi fu Yehovah, yu kan leri den pikin fu yu fu kon ’koni, so taki den kan kisi frulusu fu di den e bribi na ini Krestes Yesus’.—2 Tim. 3:15; Odo 4:1-4.