Aksi di opo kon

◼ San den pikin fu wi musu leri fu tron lepi Kresten?

Kresten papa nanga mama e du furu muiti fu kweki den pikin nanga „a leri èn nanga den rai fu Yehovah” (Ef. 6:4). Fu eksempre, papa nanga mama si taki a e tyari wini kon te den e luku a deitekst ibri mamanten nanga den pikin fu den. A kan taki te den e hori na Osofamiri Anbegi noso na wan tra okasi, den e luku wan felem èn e taki fu en. Den e taki fu spesrutu artikel di abi fu du nanga yonguwan, den e plèi den tori di den e leisi na ini Bijbel, noso den e oefen sani nanga den pikin fu den. Ma efu wi wani taki den pikin „tron lepi sma”, dan wi musu leri den moro dipi Bijbel tori.​—Hebr. 6:1.

Luku san wi e leri den sma di wi e miti na ini a preikiwroko. Te wi preiki gi a sma a fosi leisi noso te wi e go baka na en, dan wi e pruberi fu bigin wan Bijbelstudie nanga a buku San Bijbel e leri wi trutru? Te wi kaba nanga a buku dati, dan wi e go doro nanga a buku Meki Gado tan lobi yu. Fu san ede wi e du dati? A Bijbel leri-buku e yepi den studenti fu kon sabi den moro prenspari tori fu Bijbel. A Gado lobi-buku e leri den fa den kan fiti den rai fu Bijbel na ini den aladei libi. Te Bijbel studenti e studeri den tu buku disi, dan den o „tanapu steifi” èn den o abi wan tranga bribi (Kol. 2:6, 7). A no ben o bun tu fu studeri den buku disi nanga den pikin fu wi? Den musu kon leri tu san na a lusu-paiman, a Kownukondre, èn san e pasa nanga den dedewan. Den pikin musu sabi fu san ede Gado e gi pasi taki sma e pina. Den musu man buweisi tu taki wi e libi na ini den lasti dei. Den musu bribi nanga den heri ati taki Yehovah Kotoigi e anbegi Yehovah na a yoisti fasi. Den yonguwan musu frustan den gronprakseri fu Bijbel tu èn den musu kon abi a koni „fu man si sani krin” (Hebr. 5:14). A no de fu taki dati papa nanga mama musu luku o owru a pikin de èn o furu a man frustan. Ma furu pikin man leri dipi tori fu Bijbel te den de pikinpikin ete.​—Luk. 2:42, 46, 47.