Na wan hondro yari kaba wi e preiki fu a Kownukondre!
1. Sortu deki-ati wi kisi sowan wan hondro yari pasa?
1 „Luku, a Kownu e tiri! Unu na den sma di e fruteri fu en. Fu dati ede, preiki, preiki, preiki fu a Kownu nanga en kownukondre.” Sowan wan hondro yari pasa Brada Rutherford taki den sani disi fu gi a pipel fu Yehovah a deki-ati fu panya a Kownukondre boskopu na ala sei. Èn na dati wi du tu! Neleki den fosi Kresten wi preiki a bun nyunsu fu a Kownukondre „gi ala sma na grontapu” (Kol. 1:23). A yari disi na 100 yari kaba taki a Kownukondre e tiri. San wi du den hondro yari di pasa fu preiki fu Gado Kownukondre? San wi kan du fu tan panya a boskopu disi?
2. Fa den buku fu wi yepi sma fu kon sabi moro fu Gado Kownukondre?
2 San wi du kaba: Bun langa kaba wi e gebroiki den buku fu wi fu preiki fu Gado Kownukondre. Sensi 1939 a prenspari tijdschrift fu wi ben nen: A Waktitoren, A e taki fu Yehovah Kownukondre. A tijdschrift disi e taki furu fu a Kownukondre èn san a o du. Na Ontwaakt! e taki tu dati Gado Kownukondre wawan man lusu den problema fu libisma. Dati meki a no e fruwondru wi taki den tu tijdschrift disi prati moro iniwan tra tijdschrift na grontapu!—Openb. 14:6.
3. San wi gebroiki fu meki a Kownukondre bekènti?
3 A pipel fu Yehovah gebroiki difrenti sani fu preiki fu a Kownukondre. Fosi wi ben gebroiki wagi di abi bigi boksu, radio nanga gramafon-plaat fu preiki. So fasi wi ben kan prati a bun nyunsu gi furu sma aladi furu preikiman no ben de na a ten dati (Ps. 19:4). Na ini den lasti yari wi gebroiki wi website jw.org fu man preiki fu a Kownukondre gi milyunmilyun sma. Èn na so sma di e libi na ini kondre pe wi no man preiki kan yere a boskopu tu.
4. Na sortu tra fasi wi bigin du a preikiwroko?
4 A pipel fu Yehovah du tra sani tu fu preiki a Kownukondre boskopu. Fu eksempre, na ini 1996 wi no ben preiki oso fu oso wawan, ma wi bigin preiki tu na presi pe sma e go koiri, na presi pe sma e wakti bus, èn na presi pe furu wenkri de. No so langa pasa wi bigin preiki na ini bigi foto na den presi pe furu sma e waka pasa. Sosrefi, furu gemeente e preiki pe furu sma e waka pasa na ini den eigi kontren. Den e poti tafra nanga buku na tapu na den presi pe furu sma e waka pasa. Ma na oso-fu-oso preikiwroko e tan a moro prenspari fasi fa wi e meki a Kownukondre bekènti.—Tori 20:20.
5. San furu fu wi o man du na ini a nyun dienstyari?
5 San wi o du na ini a ten di kon: Te a dienstyari o bigin na ini september, dan furu preikiman o bigin nanga a gewoon pionierwroko. Yu kan bigin tu nanga a pionierwroko? Efu yu no man, dan yu o man go wan tu leisi na ini a yepi-pionierwroko? Yehovah o blesi yu te yu o pionier. Efu yu no man èn yu e du ala san yu man fu meki a Kownukondre boskopu bekènti, dan a o blesi yu tu.—Mal. 3:10.
6. Fu san ede a mun oktober 2014 o de wan spesrutu mun?
6 Na ini a mun oktober 2014 a Kownukondre o tiri 100 yari kaba. Fu dati ede A Waktitoren gi a preikiwroko o poti furu prakseri na Gado Kownukondre. Meki wi du ala muiti fu prati a tijdschrift disi gi furu sma! Meki ibriwan fu wi tan ’fruteri ala sma a bun nyunsu fu a Kownukondre fu Gado’.—Tori 8:12.