Teki na eksempre fu sma di ben abi bribi
1. San wi o bigin studeri na a Gemeente Bijbelstudie na ini a wiki fu 19 oktober?
1 Na ini a wiki fu 19 oktober 2015, wi o bigin studeri a buku Teki na eksempre fu sma di ben abi bribi na a Gemeente Bijbelstudie. A buku disi e taki fu a bribi fu 14 man nanga uma di kari na ini Bijbel. Den tori skrifi na so wan fasi taki a de neleki yu man si den reti-ati sma disi na yu fesi. Disi o yepi wi fu si den leki trutru sma di ben kisi problema aladi den ben e dini Yehovah. A buku disi e yepi wi tu fu si san wi kan leri fu den tori disi èn fa wi kan fiti dati na ini wi libi.—Hebr. 6:12.
2. Taki fu wan tu spesrutu sani fu a buku Teki na eksempre fu sma di ben abi bribi.
2 Spesrutu sani na ini a buku: A buku abi karta di e yepi wi fu sabi o ten èn pe ibri sma di kari na ini den tori ben e libi. Boiti dati, na a kaba fu ibri kapitel wan pisi de di nen „Prakseri den sani disi . . . ”. Den aksi di skrifi na a pisi disi o yepi wi fu denki dipi fu den sani di wi leri èn fu fiti den na ini wi libi. A buku abi furu moi prenki tu di e yepi wi fu si fa sani ben de na ini a ten dati.
3. Fa wi kan kisi wini te wi e studeri a buku disi?
3 Fa yu kan kisi wini: A brifi fu a Tiri Skin di de na a bigin fu a buku e gi wi a deki-ati disi: „Prakseri fa a ben o de te yu ben de drape. Pruberi fu si èn fu yere san ben e pasa. Pruberi fu firi fa den sma na ini Bijbel ben e firi, pruberi fu si san den ben e si.” Disi no wani taki dati wi musu go denki ala sortu sani. Ma wi musu pruberi fu si san Bijbel e taki fu den sma disi so taki wi kon sabi den moro bun. Efu wi wani du dati, dan wi musu teki ten fu denki dipi fu den tori disi (Neh. 8:8). Efu a studie e bigin na mindri fu wan kapitel, dan a fesiman o teki 30 te go miti 60 sekonde fu taki fosi san wi ben leri a wiki na fesi. Efu a pisi „Prakseri den sani disi . . . ” no de na ini a studie, dan a fesiman kan poti wán noso tu aksi na a kaba fu luku baka san wi leri.
4. Fu san ede wi musu studeri a Teki eksempre-buku?
4 Ibri dei a grontapu disi e suku fu swaki wi bribi na ala sortu fasi. A buku disi nanga den artikel na ini A Waktitoren di nen „Abi bribi neleki den” na presenti fu Yehovah di e yepi wi fu tranga wi bribi (Yak. 1:17). Meki wi go doronomo na a Gemeente Bijbelstudie èn meki wi gi piki te wi o studeri a buku disi makandra. Te wi du dati, dan wi o kisi furu wini!