Teki a bun eksempre fu den profeiti—Habakuk
1. Fu san ede wi kan frustan fa a profeiti Habakuk ben firi?
1 Grontapu e kon ogri moro nanga moro èn disi kan meki wi firi neleki Habakuk di ben aksi Yehovah: „Fu san ede yu e meki mi si takrudu? Fu san ede yu e tan luku nomo fa sma e du ogri?” (Hab. 1:3; 2 Tim. 3:1, 13) Te wi e poti prakseri na a boskopu fu Habakuk èn a tranga bribi fu en, dan dati o yepi wi fu horidoro aladi wi e wakti a krutudei fu Yehovah.—2 Petr. 3:7.
2. Fa wi kan sori taki wi abi bribi na ini a ten disi?
2 Sori taki yu abi bribi: Na presi taki Habakuk ben e sidon sari nomo fu den ogri di ben e pasa, a ben tan na ai èn a ben abi furu fu du (Hab. 2:1). Yehovah gi a profeiti a dyaranti taki den sani di a pramisi o kon tru na a yoisti ten èn taki „a reti-ati sma o tan libi fu di a abi bribi” (Hab. 2:2-4). San disi wani taki gi Kresten di e libi so krosibei fu a kaba? Na presi fu tan luku nomo o ten a kaba o kon, a moro prenspari sani na fu abi a tranga bribi taki a kaba o kon seiker. Te wi abi bribi, dan wi o tan na ai èn wi o poti a diniwroko na a fosi presi na ini wi libi.—Hebr. 10:38, 39.
3. Fu san ede wi musu tan abi prisiri na ini a diniwroko fu Yehovah?
3 Prisiri na ini a diniwroko fu Yehovah: Te Gok fu Magok o kon feti nanga a pipel fu Yehovah, dan a bribi fu wi o kisi tesi (Esek. 38:2, 10-12). Te feti de, dan dati e tyari problema kon, srefi gi den sma di wini a feti. Kande nyanyan no de fu feni, sma kan lasi san den abi èn kande a libi e kon moro tranga gi den. San wi o du te den sortu problema disi miti wi? Habakuk ben sabi taki problema ben o kon, ma a no meki noti tapu en fu tan abi prisiri na ini a diniwroko fu Yehovah (Hab. 3:16-19). „A prisiri di Yehovah e gi” o yepi wi tu fu horidoro te wi o kisi tesi na ini a ten di e kon.—Neh. 8:10; Hebr. 12:2.
4. Fa wi kan prisiri now kaba èn na ini a ten di e kon?
4 Den sma di Yehovah o kibri na a krutudei fu En, o tan leri fa Gado wani taki den musu libi (Hab. 2:14). Den sma di kisi wan opobaka o leri moro tu fu Yehovah. Fu dati ede, meki wi gebroiki ibri okasi fu taki fu Yehovah èn fu den tumusi moi sani di a du!—Ps. 34:1; 71:17.