Yu kan kisi têgo blesi fu wi Mekiman

Gado pramisi a profeiti Abraham taki wan fu den bakapikin fu en ben o meki taki „ala den pipel fu grontapu” kisi blesi (Genesis 22:18). Suma ben o de a bakapikin dati?

Sowan 2000 yari pasa, Gado gi Yesus, di ben de wan bakapikin fu Abraham, a makti fu du bigi wondru. Den wondru dati ben e sori taki a sani di Gado pramisi Abraham ben o kon tru nanga yepi fu Yesus.​—Galasiasma 3:14.

Den wondru di Yesus du yepi sma fu kon si taki na en ben de a sma di Gado ben o gebroiki fu blesi libisma. Den wondru dati ben e sori tu fa Gado ben o gebroiki en fu blesi libisma fu ala ten. Luku fa den wondru fu Yesus sori sortu moi fasi a ben abi.

A ben abi safu-ati​—Yesus ben dresi den sikisma.

Wan leisi wan gwasiman begi Yesus fu yepi en. A taigi Yesus taki efu a ben wani nomo a ben kan meki a kon betre. Dati meki Yesus fasi a man èn a taki: „Mi wani.” Wantewante a gwasi komoto na a man en skin.​—Markus 1:40-42.

A ben lobi gi sma sani​—Yesus gi sma nyanyan.

Yesus no ben wani taki sma de nanga angribere. Difrenti leisi, a du wondru pe a meki wan tu brede nanga wan tu pikin fisi kon moro furu so taki a ben man gi dusundusun sma nyanyan (Mateyus 14:17-21; 15:32-38). Baka di den sma nyan den bere furu, bun furu nyanyan ben tan abra ete.

A ben e firi gi trawan​—Yesus wiki den dedewan.

Wan uma di en masra ben dede kaba ben sari fu di en wan-enkri manpikin dede. A no ben abi nowan sma moro fu sorgu en. Di Yesus si na uma, dan a „firi sari gi en” èn a wiki a manpikin fu en.​—Lukas 7:12-15.