Yu man si sortu fasi Gado abi?

Te yu e luku wan moi bromki, den stari na loktu, noso wan bigi sula, dan yu e si dati leki sani di Gado meki? Den sani na wi lontu e sori krin sortu fasi Yehovah abi (Ro 1:20). Te wi e teki ten fu prakseri den sani di wi e si nanga wi ai, dan wi man si a makti, a lobi, a koni nanga a retidu fu Gado, èn wi man si tu taki a lobi fu gi sani.​—Ps 104:24.

San na wan tu fu den sani di yu e si ibri dei? Srefi te yu e libi na ini wan foto, yu man si sani di Yehovah meki, soleki fowru noso bon. Te wi e teki ten fu luku den sani di Yehovah meki, dan dati kan yepi wi fu no broko wi ede so furu moro, wi o man poti prakseri na den moro prenspari sani, èn wi o de seiker taki Yehovah man sorgu gi wi fu ala ten (Mt 6:25-32). Efu yu abi pikin, dan yepi den fu kon si den tumusi moi fasi fu Yehovah. Te wi e kon abi moro warderi gi den sani di Yehovah meki, dan wi o tron moro bun mati fu en.​—Ps 8:3, 4.

LUKU A FELEM DEN SANI DI GADO MEKI E SORI A MAKTI FU EN​—LETI NANGA KLORU. BAKA DATI, PIKI DEN AKSI DISI:

• Fa a du kon taki wi man si kloru?

• Fu san ede a gersi leki son sani e kenki kloru te yu e luku den fu wan tra sei noso te den e buweigi?

• Fu san ede wi e si difrenti kloru na hemel?

• Te yu e luku den sani di Gado meki, dan sortu moi kloru yu e si?

• Fu san ede wi musu teki ten fu luku den sani di Gado meki?