Fa fu preiki moro bun​—Te a de fanowdu fu tapu nanga wan Bijbelstudie di no e go na fesi

FU SAN EDE A PRENSPARI: Sma musu kari a nen fu Yehovah efu den wani kisi frulusu (Ro 10:13, 14). Toku a no ala sma di e studeri Bijbel wani hori densrefi na den wet fu Yehovah. Dati meki wi e luku bun fa wi e gebroiki wi ten. Wi e du ala muiti fu yepi den wan di wani tyari kenki kon na ini den libi fu plisi Yehovah. Ma efu wi e studeri wan moi pisi ten kaba nanga wan sma èn a no e go na fesi srefisrefi, dan a bun fu stop a studie. A moro bun fu gebroiki wi ten fu yepi den wan di Yehovah e hari kon na a organisâsi fu en (Yoh 6:44). A no de fu taki dati efu baka wan pisi ten a sma e sori taki a „abi a yoisti denki fu man kisi têgo libi”, dan wi kan bigin a studie baka nanga en.​—Tor 13:48.

FA FU DU DATI:

• Prèise a studenti taki a wani kon sabi a tru leri finifini.​—1Ti 2:4

• Sori en fu san ede a prenspari fu du san a leri.​—Lu 6:46-49

• Taki na wan switifasi nanga en fu na agersitori di Yesus ben fruteri fu a man di ben e sai siri. Aksi en fu luku san e tapu en fu go na fesi.​—Mt 13:18-23

• Taigi en na wan lespeki fasi fu san ede yu e stop a studie

• Taigi en taki ten na ten yu o kon luku en fu gi en deki-ati èn taki yu kan studeri baka nanga en efu a e du muiti fu go na fesi

LUKU A FELEM, ÈN BAKA DATI PIKI DEN AKSI DISI:

• Fa a takimakandra tyari kon na krin taki a studenti no ben e go na fesi?

• Fa a preikiman yepi a studenti fu kon frustan taki a musu tyari kenki kon?

• Fa a preikiman sori a studenti taki a kan studeri baka nanga en baka wan pisi ten?