Mi kisi furu blesi fu di mi leri fu sma di de bun eksempre

Mi gebore na Kanada na ini Kibek City, wan foto na ini a distrikt Kibek pe den e taki Fransitongo. Mi papa Louis nanga mi mama Zélia ben abi switifasi èn den ben lobi mi. Mi papa ben syensyen, ma a ben lobi leisi. Fu di mi ben lobi skrifi, meki mi ben howpu taki wan dei mi ben o man skrifi artikel gi koranti.

Di mi ben abi 12 yari, Rodolphe Soucy, wan man di ben wroko makandra nanga mi papa, ben kon na wi oso nanga wan mati fu en. Den ben de Yehovah Kotoigi. Mi no ben sabi furu fu den Kotoigi èn a bribi fu den no ben hari mi. Toku mi ben lobi fa den ben e gebroiki Bijbel fu piki den aksi fu wi na wan makelek fasi. Mi papa nanga mama ben lobi tu san den ben leri. Dati meki wi bigin studeri Bijbel.

Na a ten dati mi ben go na wan Lomsu skoro. Wanwan leisi mi ben e taki nanga den pikin fu mi klas fu den sani di mi ben leri na ini Bijbel. Ma den skoromeester di ben de priester kon yere a tori. Na presi fu gebroiki Bijbel fu buweisi taki den sani di mi ben e taki no tru, wan fu den taigi a heri klas taki mi e opo misrefi teige Lomsu Kerki! A no ben switi gi mi taki disi pasa, ma a opo mi ai. A yepi mi fu si taki den sani di a skoro ben e leri fu Gado no ben e kruderi nanga Bijbel. Mi kon si taki mi ben musu komoto fu a skoro dati. Mi papa nanga mama ben feni en bun taki mi go na wan tra skoro.

MI LERI FU LOBI A PREIKIWROKO

Mi tan studeri Bijbel, ma mi no ben go na fesi so esi fu di mi ben frede fu preiki oso fu oso. A Lomsu Kerki ben abi furu makti èn den ben gens a preikiwroko fu wi hebi. Maurice Duplessis di ben e tiri a distrikt Kibek, ben e wroko makandra nanga a Lomsu Kerki. Bigi grupu sma ben e fon den Kotoigi èn a ben e horibaka gi den sma dati. Na a ten dati yu ben musu abi furu deki-ati fu go preiki.

Wan brada di yepi mi fu no frede fu preiki ben de John Rae, di ben go na a di fu neigi klas fu Gileadskoro. John ben abi furu ondrofeni, ma a ben abi sakafasi èn a ben makelek fu taki nanga en. A no ben gi mi furu rai, ma a ben de wan bun eksempre gi mi. John no ben man taki Fransitongo bun. Dati meki mi ben wroko furu nanga en na ini a preikiwroko èn mi ben yepi en fu leri taki a tongo. Fu di mi ben de furu nanga John, meki a yepi mi fu teki a bosroiti fu tron wan Yehovah Kotoigi. Mi dopu tapu 26 mei 1951. Dati na tin yari baka di mi miti Yehovah Kotoigi a fosi leisi.

A pikin gemeente fu wi na ini Kibek City ben abi furu pionier. A bun eksempre fu den gi mi deki-ati fu tron pionier tu. Na a ten dati, wi ben e gebroiki soso Bijbel te wi ben preiki. Fu di wi no ben prati tijdschrift, meki wi ben musu leri fu gebroiki Bijbel moro bun. Fu dati ede mi meki muiti fu kon sabi Bijbeltekst di ben o yepi mi fu opo taki gi waarheid. Ma furu sma no ben wani leisi Bijbel efu a no ben de wan Bijbel fu Lomsu Kerki.

Na ini 1952 mi trow nanga Simone Patry, wan sisa fu a srefi gemeente na ini Kibek City. Wi froisi go na Montreal èn na ini wán yari wi kisi wi meisje Lise. Syatu fosi wi trow mi ben tapu nanga a pionierwroko. Ma mi nanga Simone pruberi fu no suku bigi sani na ini a libi, fu di wi ben wani du so furu leki wi man na ini a preikiwroko èn wi ben wani de wan yepi na ini a gemeente.

Baka tin yari fosi, mi bigin prakseri baka fu tron wan pionier. Na ini 1962 mi go na a Kownukondre Diniwroko-skoro gi owruman di ben hori wán mun langa na Betel na ini Kanada. Mi ben de na ini wan kamra nanga wan brada di nen Camille Ouellette. Aladi Camille ben trow èn a ben abi pikin, toku a ben e preiki fayafaya èn dati ben naki mi ati. Na a ten dati yu no ben abi furu brada nanga sisa na ini Kibek di ben abi pikin èn di ben e pionier. Ma na dati Camille ben wani du. A ben e gi mi deki-ati fu luku a situwâsi fu mi baka. Baka wan tu mun nomo, mi si taki mi ben kan pionier baka. Son sma no ben si dati leki wan koni sani, ma toku mi bigin pionier fu di mi ben de seiker taki Yehovah ben o yepi mi.

WI DRAI GO BAKA NA KIBEK CITY LEKI SPESRUTU PIONIER

Na ini 1964 mi nanga Simone tron spesrutu pionier èn den brada seni wi go na Kibek City, a foto pe wi kweki. Wi dini drape wan tu yari. Na a ten dati lanti no ben gens a preikiwroko so furu moro, ma toku son sma ben e gens wi ete.

Wan satra bakadina skowtu hori mi na ini Sainte-Marie, wan pikin foto krosibei fu Kibek City. A skowtu tyari mi go na a skowtu-oso èn a poti mi na strafu-oso fu di mi ben e preiki sondro wan vergunning. Bakaten den tyari mi go na fesi wan krutuman di ben nen Baillargeon. Furu sma ben e frede a man disi. A aksi mi suma ben o de mi afkati. Di mi taigi en taki na Glen Howa a skreki, dan a taki: „A man dati! No mang!” Glen How ben de wan brada di ben de afkati èn furu sma ben sabi en. A wini furu krutu-afersi gi Yehovah Kotoigi na a ten dati. Syatu baka dati, a krutubangi bosroiti taki mi no ben abi fu go na fesi krutu moro fu di mi no ben du wan ogri.

Fu di sma ben e gens a wroko fu wi na ini Kibek, meki a ben muilek fu feni bun presi fu hori konmakandra. A pikin gemeente fu wi feni wan owru garage di ben kowru srefisrefi na ini winter. Den brada ben abi wan sani fu hori a kamra waran. Nofo tron wi ben e kon wan tu yuru fosi a konmakandra bigin, dan wi ben sidon na makandra e fruteri ondrofenitori.

A moi fu si fa a preikiwroko go na fesi na ini den yari di pasa. Na ini den yari baka 1960 yu ben abi wan tu pikin gemeente nomo na ini Kibek City, a kontren fu Côte-Nord èn a kontren fu Gaspé. Now furu brada nanga sisa de na ini den kontren disi èn den e kon makandra na ini moi Kownukondre zaal.

WI BIGIN DU A KRINGWROKO

Mi nanga Simone bigin du a kringwroko na ini 1970. Baka dati na ini 1973 mi tron distrikt-opziener. Na ini den yari dati mi leri furu fu lepi brada soleki Laurier Saumurb nanga David Splane.c Baka ibri bigi konmakandra mi nanga David ben taigi makandra fa wi ben kan gi leri moro bun. Mi e memre taki wan leisi David taigi mi: „Léonce, mi ben lobi a lasti lezing fu yu. A ben bun, ma mi ben kan hori dri lezing nanga ala den sani di yu taki!” Mi ben abi a gwenti fu taki fu tumusi furu sani na ini den lezing fu mi. Mi ben musu leri fu no taki fu sani di no de fanowdu.

Den distrikt-opziener ben abi a frantwortu fu gi a kring-opziener deki-ati. Ma furu preikiman na ini Kibek ben sabi mi bun. Furu tron den ben wani wroko nanga mi na ini a preikiwroko te mi ben go na den gemeente. Mi ben lobi preiki nanga den, ma mi no ben meki nofo ten gi a kring-opziener. Wan leisi wan kring-opziener taigi mi na wan switi fasi: „A bun taki yu abi ten gi den brada nanga sisa, ma no frigiti taki disi na mi wiki. Mi musu kisi deki-ati tu!” A rai disi yepi mi fu du mi wroko moro bun.

Na ini 1976 wan sari sani miti mi. Mi lobi wefi Simone ben kon siki èn a dede. A ben de wan bun wefi fu di a ben broko en ede nanga tra sma èn a ben lobi Yehovah trutru. Fu di mi ben de furu na ini a preikiwroko, meki dati yepi mi na ini a muilek ten disi. Mi e taki Yehovah tangi taki a yepi mi na a ten dati. Bakaten mi trow nanga Carolyn Elliott, wan fayafaya pionier sisa di e taki Ingrisitongo. A ben kon na Kibek fu dini pe moro preikiman ben de fanowdu. Carolyn abi switifasi èn a e broko en ede nanga trawan, spesrutu nanga den sma di e syensyen èn di e firi leki den wawan de. A yepi mi furu na ini a kringwroko.

WAN PRENSPARI YARI

Na ini yanuari 1978 den brada aksi mi fu de wan leriman na a fosi Pionierskoro di ben o hori na ini Kibek. Mi ben senwe fu di noiti mi ben go na a Pionierskoro èn noiti mi ben si a buku srefi. Ala sani ben nyun gi mi èn gi den studenti. Koloku taki na ini a fosi klas disi yu ben abi furu pionier di ben abi ondrofeni. Aladi mi ben de a leriman, toku mi leri furu fu den studenti.

Bakaten na ini 1978 a „Zegevierend geloof” internationaal kongres ben hori na ini na Olympisch Stadion fu Montreal. Disi ben de a moro bigi kongres di hori na ini Kibek. Moro leki 80.000 sma ben de drape. Mi ben abi a frantwortu fu taki nanga den nyunsuman di ben wani sabi moro fu a kongres. Mi taki nanga furu fu den èn mi ben breiti taki den skrifi furu bun sani fu wi. Te yu luku ala den interview di wi hori na tapu telefisi èn na tapu radio, dan a pasa 20 yuru èn den nyunsuman ben skrifi hondrohondro artikel tu. Disi meki taki furu sma kon sabi moro fu Yehovah nanga en pipel.

WI GO DINI NA INI WAN TRA KONTREN

Wan bigi kenki ben kon gi mi na ini 1996. Sensi mi ben dopu mi dini na ini Kibek pe den e taki Fransitongo. Ma now mi ben musu go dini na ini wan distrikt na ini Toronto pe sma e taki Ingrisitongo. Mi no ben denki taki mi ben o man du a wroko disi èn mi ben frede fu hori lezing na ini a brokobroko Ingrisitongo fu mi. Mi ben abi fu begi moro èn mi ben abi fu frutrow moro tapu Yehovah.

Na ini a bigin mi ben frede fu wroko na ini a kontren dati, ma na ini den tu yari di mi dini na ini Toronto mi ben abi furu prisiri. Nanga pasensi Carolyn yepi mi fu taki Ingrisitongo moro bun èn den brada nanga sisa ben e gi mi deki-ati tu. Esi-esi wi meki nyun mati.

Mi ben musu sreka furu sani gi den kring konmakandra di ben hori tapu satra nanga sonde. Ma toku mi ben lobi go na ini a preikiwroko ala freida neti fosi a kring konmakandra. Mi ben e preiki wán yuru langa. Kande son sma ben e denki: ’Fu san ede yu e go na ini a preikiwroko wan dei fosi a kring konmakandra? So furu sani de fu sreka.’ Ma den moi takimakandra di mi ben abi nanga sma na ini a preikiwroko ben meki mi firi switi. Te nanga now mi e firi bun te mi e preiki.

Na ini 1998 mi nanga Carolyn ben musu go dini baka na Montreal leki spesrutu pionier. Wan tu yari langa mi ben kisi a frantwortu fu orga a preikiwroko na presi pe furu sma de èn mi ben musu taki nanga nyunsuman fu yepi sma fu no bribi den lei di sma e fruteri fu Yehovah Kotoigi. Mi nanga Carolyn lobi preiki gi sma fu tra kondre di froisi kon na Kanada. Furu fu den sma disi lobi den sani di den e leri fu Bijbel.

Te mi e prakseri den 68 yari di mi dopu, dan mi si taki Yehovah blesi mi trutru. Mi breiti taki now mi lobi du a preikiwroko èn taki mi yepi furu sma fu kon sabi waarheid. Di den pikin fu mi meisje Lise kon bigi, en nanga en masra tron gewoon pionier. A e gi mi furu prisiri te mi e si fa a e du a preikiwroko fayafaya. Mi de nanga tangi trutru gi den brada nanga sisa di ben de bun eksempre gi mi èn di gi mi koni rai di yepi mi fu abi wan bun matifasi nanga Yehovah èn fu du difrenti wroko gi en. Mi si taki wi kan tan du san na organisâsi fu Yehovah e aksi wi fu du, soso te wi e frutrow tapu a santa yeye fu Yehovah (Ps. 51:11). Mi e taki Yehovah tangi taki a gi mi a moi grani fu prèise en nen!​—Ps. 54:6.