Te yu lobi Yehovah, yu o wani dopu

1-2. Soleki fa Tori fu den apostel 8:27-31, 35-38 e sori, dan fu san ede a heihei man fu Etiopia ben wani dopu?

YU WANI dopu èn tron wan disipel fu Krestes? Furu sma teki a bosroiti dati fu di den lobi Yehovah èn fu di den de nanga tangi gi ala den bun sani di a du gi den. Luku na eksempre fu a heihei man di ben e wroko gi na umakownu fu Etiopia.

² Di a man disi leri na ini Gado Buku taki a ben musu dopu, dan wantewante a du dati. (Leisi Tori fu den apostel 8:27-31, 35-38.) Fu san ede a du dati? A de krin taki a man disi ben lobi Gado Wortu. Di a ben de na ini wan asiwagi, a ben e leisi wan pisi na ini a buku Yesaya. Èn di Filipus ben e taki nanga en, a kisi moro warderi gi san Yesus du gi en. Ma fu san ede a heihei man disi ben go te na Yerusalem? Fu di a ben lobi Yehovah kaba. Fa wi du sabi dati? A man disi ben go na Yerusalem fu anbegi Yehovah. Soleki fa a sori, dan a ben de na ini wan tra bribi sensi a ben pikin. Ma a libi a bribi dati èn a bigin anbegi a tru Gado makandra nanga a pipel fu Yehovah. A lobi di a ben abi gi Yehovah, meki a du wan tra prenspari sani tu. A dopu èn a tron wan disipel fu Krestes.​—Mat. 28:19.

3. Fu san ede a muilek gi son sma fu teki a bosroiti fu dopu? (Luku a faki „San de na ini yu ati?”)

³ Lobi gi Yehovah kan meki taki yu wani dopu. Ma lobi kan tapu yu tu fu du dati. Fa so? Luku wan tu eksempre. Kande yu lobi yu famiri nanga den mati fu yu èn kande yu e broko yu ede taki den no o lobi yu moro efu yu dopu (Mat. 10:37). Noso kande yu lobi du son sani di Gado no lobi kwetikweti èn a muilek gi yu fu tapu nanga den takru gwenti dati (Ps. 97:10). A kan tu taki sensi yu pikin yu e hori son fesa di abi fu du nanga falsi bribi. Kande yu e prakseri o switi a ben de fu hori den fesa dati makandra nanga famiri nanga mati. A sani disi kan meki en muilek gi yu fu no hori fesa di Yehovah no feni bun (1 Kor. 10:20, 21). Sobun, yu musu aksi yusrefi: „Suma mi lobi moro?”

SUMA WI MUSU LOBI MORO?

4. San na a moro prenspari sani di o meki taki yu wani dopu?

⁴ Fosi yu bigin studeri Bijbel nanga Yehovah Kotoigi, dan kande yu ben lobi Bijbel kaba èn kande yu ben lobi Yesus tu. Now di yu e studeri Bijbel nanga Yehovah Kotoigi yu kon lobi moksi nanga den. A no de fu taki dati yu de nanga tangi taki yu kan du den sani disi. Ma lobi gi den sani disi wawan no o meki yu gi yusrefi abra na Yehovah èn dopu. A moro prenspari sani di o meki taki yu wani dopu, na lobi gi Yehovah Gado srefi. Te yu lobi Yehovah moro ala tra sani, dan yu no o meki nowan sani èn nowan sma tapu yu fu dini en. Lobi gi Yehovah o meki taki yu wani dopu èn a o yepi yu tu fu tan gi yesi na en baka te yu dopu.

5. San wi o luku na ini na artikel disi?

⁵ Yesus taki dati wi musu lobi Yehovah nanga wi heri ati, wi heri libi, wi heri frustan nanga ala wi krakti (Mark. 12:30). San o yepi wi fu abi so wan lobi gi Yehovah èn fu lespeki en? Efu wi e prakseri o furu Yehovah lobi wi, dan wi o lobi en tu (1 Yoh. 4:19). Na artikel disi o sori yu san yu kan du fu kon lobi Yehovah èn fu dopu.

6. Soleki fa Romesma 1:20 e sori, dan san na wán fasi fa yu kan kon sabi Yehovah?

⁶ Te yu e luku den sani di Yehovah meki, dan yu o kon sabi en (leisi Romesma 1:20; Openb. 4:11). Te yu e prakseri fa Yehovah meki den bon nanga den meti, dan yu o si o furu koni a abi. Meki muiti fu kon sabi moro fu a moi fasi fa Gado meki yu (Ps. 139:14). Prakseri tu o furu krakti Yehovah poti na ini a son. A son fu wi na wan fu den milyardmilyard stari di a meki (Yes. 40:26).b Te yu e du disi, dan yu o kon abi moro lespeki gi Yehovah. A prenspari fu sabi taki Yehovah abi furu koni nanga krakti. Ma efu yu wani kon lobi Yehovah moro, dan yu musu sabi moro sani fu en.

7. Efu yu wani kon abi moro lobi gi Yehovah, dan fu san yu musu de seiker?

⁷ Yu musu de seiker taki Yehovah lobi yu. A muilek gi yu fu bribi taki a Mekiman fu hemel nanga grontapu sabi yu èn taki a e broko en ede nanga yu? Efu na so yu e firi, dan hori na prakseri taki Yehovah „no de fara fu nowan fu wi” (Tori 17:26-28). A e „ondrosuku na ati fu ala sma” èn neleki fa a pramisi David nanga Salomo, na so a e pramisi yu tu taki ’efu yu e suku en, a o meki yu feni en’ (1 Kron. 28:9). Fu taki en leti, a studeri di yu e studeri Bijbel now e sori taki na Yehovah „hari yu kon” na en (Yer. 31:3). Te yu kon sabi o furu Yehovah du gi yu, dan yu o kon lobi en moro.

8. Fa yu kan sori taki yu lobi Yehovah?

⁸ Wan fasi fa yu kan sori taki yu lobi Yehovah, na fu begi. Yu o kon lobi Yehovah moro te yu e fruteri en san e gi yu broko-ede èn te yu e taki en tangi gi ala san a e du gi yu. Yu matifasi nanga Yehovah o kon moro tranga te yu e si fa a e piki den begi fu yu (Ps. 116:1). Yu o si taki a e frustan fa yu e firi. Ma fu kon moro krosibei na Yehovah, dan yu musu kon sabi fa a e denki. Yu musu kon sabi tu san a e fruwakti fu yu. A wan-enkri fasi fa yu kan kon sabi den sani disi, na te yu e studeri en Wortu, Bijbel.

9. Fa yu kan sori taki yu lobi Bijbel?

⁹ Yu musu kon lobi Gado Wortu, Bijbel. Bijbel wawan e fruteri wi suma na Yehovah èn san a o du gi wi. Yu kan sori taki yu de nanga tangi taki yu abi Bijbel te yu e leisi en ibri dei, te yu e sreka yusrefi ala leisi te a brada noso sisa e kon studeri nanga yu èn te yu e du san yu leri (Ps. 119:97, 99; Yoh. 17:17). Yu e leisi Bijbel ala dei?

10. San na wan moi sani fu Bijbel?

¹⁰ Wan moi sani fu Bijbel, na taki a abi tori fu Yesus na ini èn den sma di skrifi den tori disi ben si furu fu den sani di Yesus du. Dati meki yu kan frutrow den sani di Bijbel e taki fu Yesus. Te yu e kon sabi san Yesus taki èn san a du, dan yu o wani tron wan mati fu en.

11. San kan yepi yu fu kon lobi Yehovah?

¹¹ Kon lobi Yesus. Te yu lobi Yesus, dan yu o kon lobi Yehovah moro. Fu san ede dati de so? Fu di Yesus abi den srefi fasi leki en Papa (Yoh. 14:9). Sobun, o moro yu o kon sabi Yesus, o moro yu o kon sabi Yehovah èn o moro yu o warderi den sani di a du gi yu. Prakseri fa Yesus sori sari-ati gi den sma di trawan ben e wisiwasi fu di den ben pôti, fu di den ben siki èn fu di den ben swaki. Prakseri den moi rai di a e gi yu tu èn fa a libi fu yu e kon moro bun te yu e du san a taki.​—Mat. 5:1-11; 7:24-27.

12. San yu o wani du te yu kon sabi Yesus moro bun?

¹² Yu o kon abi moro lobi gi Yesus te yu e prakseri taki a gi en libi leki wan lusu-paiman, so taki wi kan kisi pardon fu wi sondu (Mat. 20:28). Te yu kon frustan taki Yesus ben de klariklari fu dede gi yu, dan yu o abi berow èn yu o begi Yehovah fu gi yu pardon (Tori 3:19, 20; 1 Yoh. 1:9). Èn te yu kon lobi Yesus nanga Yehovah, dan yu o wani de nanga den sma di lobi den tu.

13. San Yehovah gi yu?

¹³ Kon lobi den sma di lobi Yehovah. Kande yu famiri di no de Kotoigi nanga den mati di yu ben abi fosi, no e frustan fu san ede yu wani dini Yehovah. Kande den o gens yu srefi. Yehovah o yepi yu. A o meki taki den brada nanga sisa na ini a gemeente de leki yu famiri. Efu yu e tan kon makandra nanga den, dan yu o firi a lobi fu den èn den o yepi yu (Mark. 10:29, 30; Hebr. 10:24, 25). A kan taki bakaten den famiri fu yu o kon dini Yehovah makandra nanga yu èn den o gi yesi na en.​—1 Petr. 2:12.

14. Soleki fa 1 Yohanes 5:3 e sori, dan san yu kon si fu den wet fu Yehovah?

¹⁴ Leri fu lobi den wet fu Yehovah. Fosi yu kon sabi Yehovah, dan kande yu srefi ben bosroiti san bun èn san no bun. Ma now yu kon si taki den wet fu Yehovah moro bun (Ps. 1:1-3; leisi 1 Yohanes 5:3). Prakseri den rai di Bijbel e gi masra, wefi, papa, mama nanga pikin (Ef. 5:22–6:4). Yu kon abi wan moro bun osofamiri-libi fu di yu e gi yesi na den rai dati? Yu kon tron wan moro bun sma fu di yu e gi yesi na den rai fu Yehovah di e sori suma yu musu teki leki mati? Yu kon moro koloku now? (Odo 13:20; 1 Kor. 15:33) A no de fu taki dati a piki tapu den aksi disi na „iya”.

15. San kan yepi yu fu fiti den rai fu Bijbel?

¹⁵ Son leisi a kan muilek gi yu fu sabi fa yu musu fiti Bijbel rai na ini yu libi. Dati meki na organisâsi fu Yehovah e meki buku nanga tra sani di kan yepi yu fu kon sabi san bun èn san no bun (Hebr. 5:13, 14). Te yu e studeri den sani disi, dan yu o si taki Bijbel abi rai di kan yepi yu na ini ala situwâsi na ini yu libi. Disi o meki taki yu o wani kon na ini Yehovah en organisâsi tu.

16. Fa Yehovah orga en pipel?

¹⁶ Kon lobi na organisâsi fu Yehovah èn horibaka gi en. A pipel fu Yehovah e kon makandra na ini gemeente èn en Manpikin Yesus na a edeman fu den gemeente (Ef. 1:22; 5:23). Yesus gi wan pikin grupu man di salfu nanga santa yeye a frantwortu fu orga a wroko di den disipel fu en musu du na ini a ten disi. Yesus kari a grupu disi „a koni srafu di de fu frutrow”. Den brada disi e si en leki wan prenspari sani fu yepi yu fu kon abi wan moro bun matifasi nanga Gado èn fu tan krosibei na en (Mat. 24:45-47). Wan fu den fasi fa a koni srafu e yepi yu, na taki den e sorgu taki lepi brada e poti leki owruman na ini den gemeente. Den owruman disi kan gi yu rai èn den kan kibri yu (Yes. 32:1, 2; Hebr. 13:17; 1 Petr. 5:2, 3). Den owruman e du ala san den man fu trowstu yu èn fu yepi yu fu kon moro krosibei na Yehovah. Ma wan fu den moro prenspari sani di den kan du gi yu, na fu sori yu fa yu kan yepi tra sma fu kon sabi Yehovah.​—Ef. 4:11-13.

17. Soleki fa Romesma 10:10, 13, 14 e taki, dan fu san ede wi e leri tra sma fu Yehovah?

¹⁷ Yepi tra sma fu kon lobi Yehovah. Yesus taigi den bakaman fu en fu leri tra sma fu Yehovah (Mat. 28:19, 20). Yu no musu du a wroko disi soso fu di Yesus taigi wi fu du en. Te yu kon lobi Yehovah moro, dan yu o firi leki den apostel Petrus nanga Yohanes di ben taki: „Wi no man tapu fu taki fu den sani di wi si èn di wi yere” (Tori 4:20). Yu o de koloku te yu yepi wan sma fu kon lobi Yehovah. Prakseri fa a preikiman Filipus ben firi di a yepi a man fu Etiopia fu frustan Gado Wortu èn fu dopu! Te yu e teki na eksempre fu Filipus èn te yu e du a preikiwroko di Yesus gi wi, dan dati o sori taki yu wani tron wan Yehovah Kotoigi. (Leisi Romesma 10:10, 13, 14.) Te yu de so fara, dan yu o poti a srefi aksi leki a man fu Etiopia: „San e tapu mi fu dopu?”​—Tori 8:36.

18. San wi o luku na ini a tra artikel?

¹⁸ A moro prenspari bosroiti di yu kan teki, na fu dopu. Fu di a de so wan prenspari bosroiti, meki yu musu prakseri bun san a wani taki fu dopu. San yu musu sabi fu dopu? San yu musu du fosi yu dopu èn baka te yu dopu? A tra artikel o piki den aksi disi.