„Mi kari unu mi mati”

1. Fa yu kan tron mati nanga wan sma?

WAN fu den moro bun fasi fa yu kan tron mati nanga wan sma, na fu du sani makandra nanga en. Te unu e fruteri makandra fa unu e denki èn fa unu e firi, dan unu e tron mati. Ma son sani kan meki en muilek gi wi fu tron bun mati fu Yesus. San na wan tu fu den sani dati?

2. San na a fosi sani di kan meki en muilek gi wi fu tron mati fu Yesus?

² A fosi sani na taki noiti wi miti Yesus. Furu Kresten na ini a ten fu den apostel noiti no ben si Yesus tu. Toku na apostel Petrus ben taki: „Noiti unu no si Krestes, ma toku unu lobi en. Unu no e si en nownow, ma toku unu e bribi na ini en” (1 Petr. 1:8). Disi e sori taki wi kan tron mati fu Yesus aladi noiti wi miti en.

3. San na a di fu tu sani di kan meki en muilek gi wi fu tron mati fu Yesus?

³ A di fu tu sani na taki wi no man taki nanga Yesus. Te wi e begi, wi e taki nanga Yehovah. A tru taki wi e begi na ini a nen fu Yesus, ma wi no e taki nanga en. Fu taki en leti, Yesus no wani taki wi begi en. Fu san ede? Fu di begi abi fu du nanga anbegi, èn wi musu anbegi Yehovah wawan (Mat. 4:10). Toku wi kan sori taki wi lobi Yesus.

4. (a) San na a di fu dri sani di kan meki en muilek gi wi fu tron mati fu Yesus? (b) San wi o luku na ini na artikel disi?

⁴ A di fu dri sani na taki Yesus e libi na hemel èn dati meki wi no man du sani makandra nanga en. Toku wi kan kon sabi furu fu Yesus aladi a no de dyaso nanga wi. Wi o taki fu fo sani di wi kan du fu tron moro bun mati fu en. Ma meki wi luku fosi fu san ede a prenspari fu tron bun mati fu Krestes.

FU SAN EDE WI MUSU TRON MATI FU YESUS?

5. Fu san ede wi musu tron mati fu Yesus? (Luku sosrefi den faki „Te wi de mati fu Yesus, dan wi o tron mati fu Yehovah” nanga „Wi no musu lobi Yesus moro Yehovah”.)

⁵ Wi musu tron mati fu Yesus efu wi wani tron bun mati fu Yehovah. Fu san ede disi de so? Luku tu reide. A fosiwan, na taki Yesus taigi den disipel: „A Tata srefi lobi unu, fu di unu ben lobi mi” (Yoh. 16:27). A ben taki tu: „Nowan sma kan kon na a Tata sondro mi” (Yoh. 14:6). Te wi e pruberi fu tron mati fu Yehovah sondro fu de bun mati fu Yesus, dan a de neleki wi wani go na ini wan oso sondro fu pasa na a doro. Yesus ben gebroiki wan srefi sortu agersitori di a taki dati en „na a doro pe den skapu musu pasa” (Yoh. 10:7). A di fu tu reide na taki Yesus abi den srefi moi fasi leki en Papa. A taigi den disipel fu en: „A sma di si mi, si a Tata tu” (Yoh. 14:9). Sobun, wan prenspari fasi fa wi kan tron mati fu Yehovah, na te wi e kon sabi moro fu Yesus. O moro wi e kon sabi Yesus, o moro wi o lobi en. Èn o moro wi e lobi Yesus, o moro wi o lobi en Papa.

6. San na wan tra reide fu san ede wi musu tron mati fu Yesus? Tyari disi kon na krin.

⁶ Wi musu de mati fu Yesus efu wi wani taki Gado arki den begi fu wi. A no nofo fu taki den wortu „na ini Yesus nen” na a kaba fu den begi fu wi. Wi musu frustan fa Yehovah e gebroiki Yesus fu piki den begi fu wi. Yesus ben taigi den apostel: „Mi o du ala sani di unu e aksi na ini mi nen” (Yoh. 14:13). Na Yehovah wawan e arki den begi fu wi èn na en e piki den. Ma Yehovah gi Yesus a frantwortu fu du san a bosroiti (Mat. 28:18). Sobun, fosi Gado piki den begi fu wi, a e luku efu wi e gi yesi na den rai fu Yesus. Fu eksempre, Yesus taki: „Efu unu e gi sma pardon fu den sondu fu den, dan un Tata na hemel o gi unu pardon tu. Ma efu unu no e gi sma pardon fu den sondu fu den, dan un Tata no o gi unu pardon fu den sondu fu unu” (Mat. 6:14, 15). Sobun, a prenspari taki wi e sori switifasi gi trawan neleki fa Yehovah nanga Yesus e du gi wi!

7. Suma e kisi wini fu a frulusu-ofrandi fu Yesus?

⁷ Soso den sma di de bun mati fu Yesus o kisi wini fu a frulusu-ofrandi fu en. Fa wi du sabi dati? Yesus taki dati a ben o „gi en libi gi den mati fu en” (Yoh. 15:13). Sma di ben e dini Yehovah fosi Yesus kon na grontapu o abi fu kon leri sabi Yesus èn den musu kon lobi en tu. Sma leki Abraham, Sara, Moses nanga Rakab o kisi wan opobaka. Ma srefi den futuboi disi fu Yehovah musu tron mati fu Yesus fu kan kisi têgo libi.​—Yoh. 17:3; Tori 24:15; Hebr. 11:8-12, 24-26, 31.

8-9. (a) Soleki fa Yohanes 15:4, 5 e sori, dan san wi man du fu di wi nanga Yesus na mati? (b) Fu san ede wi musu tan mati fu Yesus?

⁸ Wi abi a grani fu wroko makandra nanga Yesus te wi e preiki a bun nyunsu fu a Kownukondre èn te wi e gi sma leri. Di Yesus ben de na grontapu, a ben de wan leriman. Di a drai go baka na hemel, a tron edeman fu a gemeente èn a tan tiri a preikiwroko. A e warderi a muiti di wi e du fu yepi so furu sma leki wi man fu kon sabi en nanga en Papa. Fu taki en leti, wi kan du a wroko disi soso nanga yepi fu Yehovah nanga Yesus.​—Leisi Yohanes 15:4, 5.

⁹ Gado Wortu e sori krin taki wi musu tan lobi Yesus efu wi wani taki Yehovah feni wi bun. Sobun, meki wi go luku fo sani di wi musu du fu kan tron mati fu Yesus.

FA WI KAN TRON MATI FU YESUS?

10. San na a fosi sani di wi musu du fu kan tron mati fu Yesus?

¹⁰ (1) Kon sabi Yesus. Wi kan kon sabi Yesus te wi e leisi den Bijbel buku Mateyus, Markus, Lukas nanga Yohanes di e taki fu a libi fu Yesus. Te wi e denki dipi fu den tori na ini den buku disi, dan wi o lobi Yesus èn wi o lespeki en fu di a ben sori switifasi gi sma. Fu eksempre, aladi a ben de a Masra fu den disipel, toku a no ben si den leki srafu. Na presi fu dati, a ben fruteri den fa a ben e denki èn fa a ben e firi (Yoh. 15:15). Te den ben e sari, Yesus ben e sari tu èn a ben e krei nanga den (Yoh. 11:32-36). Srefi den feanti fu en ben taki dati a ben de mati fu den sma di ben arki en (Mat. 11:19). Te wi e teki na eksempre fu Yesus, dan wi o tron moro bun mati fu trawan, wi o de koloku èn wi o abi moro warderi gi en.

11. San na a di fu tu sani di wi musu du fu kan tron mati fu Yesus èn fu san ede a prenspari fu du disi?

¹¹ (2) Wi musu denki neleki Yesus èn wi musu tyari wisrefi neleki en. Te wi e kon sabi moro bun fa Yesus e denki èn te wi e teki na eksempre fu en, dan wi o tron moro bun mati fu en (1 Kor. 2:16). Fa wi kan teki na eksempre fu Yesus? Prakseri a tori disi. Yesus no ben prakseri fu plisi ensrefi, ma a ben moro prenspari gi en fu yepi trawan (Mat. 20:28; Rom. 15:1-3). Fu di a ben e denki so, meki ala ten a ben wani yepi trawan èn a ben de klariklari fu gi sma pardon. A no ben mandi te sma ben e taki ogri fu en (Yoh. 1:46, 47). Efu wan sma ben meki wan fowtu na ini a ten di pasa, dan Yesus no ben tan denki takru fu en (1 Tim. 1:12-14). A prenspari fu si trawan neleki fa Yesus e si den, fu di a ben taki: „Ala sma o sabi taki unu na mi disipel, te unu lobi makandra” (Yoh. 13:35). A bun fu aksi yusrefi: „Mi e teki na eksempre fu Yesus? Mi e du ala san mi man fu libi na ini freide nanga mi brada nanga sisa?”

12. San na a di fu dri sani di wi musu du fu tron mati fu Yesus, èn fa wi kan du dati?

¹² (3) Wi musu horibaka gi den brada fu Krestes. Efu wi e horibaka gi den salfu brada fu Yesus, dan wi e horibaka tu gi Yesus (Mat. 25:34-40). A moro prenspari fasi fa wi kan horibaka gi den salfuwan, na te wi e du ala muiti fu preiki a bun nyunsu fu a Kownukondre èn fu meki disipel, soleki fa Yesus taigi wi fu du (Mat. 28:19, 20; Tori 10:42). Soso nanga a yepi fu den „tra skapu”, den brada fu Krestes man du a preikiwroko na heri grontapu (Yoh. 10:16). Efu yu na wan fu den tra skapu, dan ibri leisi te yu e du a wroko disi, yu no e sori lobi soso gi den salfu brada, ma yu e sori lobi tu gi Yesus.

13. Fa wi kan fiti a rai fu Yesus di skrifi na Lukas 16:9?

¹³ Wi e tron mati tu fu Yehovah nanga Yesus te wi e gi moni fu horibaka gi a wroko di den gi wi fu du. (Leisi Lukas 16:9.) Fu eksempre, wi kan gi moni fu horibaka gi a wroko di e du na heri grontapu. Nanga a moni dati den brada e orga a preikiwroko na farawe presi, den e bow konmakandra presi nanga bijkantoro, den e sorgu gi den presi dati èn den e yepi den wan di kisi fu du nanga rampu. Wi kan gi moni tu fu yepi tapu den kostu fu wi eigi gemeente èn wi kan yepi sma di de na nowtu (Odo 19:17). Disi na difrenti fasi fa wi kan horibaka gi den brada fu Krestes.

14. Soleki fa Efeisesma 4:15, 16 e sori, dan san na a di fu fo sani di wi musu du fu kan tron mati fu Yesus?

¹⁴ (4) Horibaka gi den seti fu Yehovah en organisâsi. Wi e tron moro bun mati fu Yesus, na edeman fu a gemeente, te wi e wroko makandra nanga den brada di abi a frantwortu fu yepi wi. (Leisi Efeisesma 4:15, 16.) Fu eksempre, now wi e pruberi fu gebroiki den Kownukondre zaal moro bun. Dati meki son gemeente ben musu moksi tron wán gemeente èn a kontren fu son gemeente kon moro bigi noso moro pikin. A seti disi meki taki na organisâsi no e meki so furu kostu moro èn den kan gebroiki den bijdrage gi tra sani. Na a tra sei, son preikiman ben abi fu tyari kenki kon. Den preikiman dati dini furu yari langa na ini wan gemeente èn den ben kon lobi den brada nanga sisa drape. Ma now den musu froisi go na wan tra gemeente. A no de fu taki dati Yesus breiti te a e si fa den disipel disi e horibaka gi a seti disi!

WI KAN DE MATI FU YESUS FU TÊGO

15. Fu san ede wi kan taki dati wi o tron moro bun mati fu Yesus na ini a ten di e kon?

¹⁵ Den wan di salfu nanga santa yeye o tiri makandra nanga Yesus na ini Gado Kownukondre. Den abi a howpu fu de nanga Yesus. Den o si en, den o taki nanga en èn den o du sani makandra nanga en fu têgo (Yoh. 14:2, 3). Yesus o sorgu tu gi den wan di abi a howpu fu libi na grontapu. Aladi den no o si Yesus, den o tron moro bun mati fu en èn den o kisi a libi di Yehovah nanga Yesus wani gi den.​—Yes. 9:6, 7.

16. Sortu blesi wi e kisi fu di wi na mati fu Yesus?

¹⁶ Te wi e teki a kari di Yesus gi wi fu tron en mati, dan wi o kisi furu blesi. Fu eksempre, a e sori lobi gi wi èn a e yepi wi nownow kaba. Wi abi na okasi fu libi fu têgo. Èn fu di wi na mati fu Yesus, meki wi o kisi a moro moi blesi: Wi o tron mati fu Yehovah, a Papa fu Yesus. A de wan bigi grani fu de mati fu Yesus!