Fa begi kan yepi yu?

Pamela ben abi kanker èn a go suku datrayepi. Ma a begi Gado tu fu yepi en na ini a muilek situwâsi dati. Begi yepi en?

Pamela e taki: „Di mi ben e kisi datrayepi, mi ben e frede srefisrefi. Ma te mi ben begi Yehovah Gado, dan mi ben e kon rustig èn mi no ben e frede moro. Mi skin e hati mi ete, ma begi e yepi mi fu no lasi-ati. Te sma e aksi mi fa mi e firi, mi e taigi den taki mi no e firi bun, ma mi de koloku!”

Ma wi no abi fu wakti teleki wi kisi wan seryusu siki noso wan seryusu problema fosi wi begi Gado. Wi alamala e kisi problema, awinsi na pikinwan noso bigiwan, èn nofo tron wi e suku yepi. Begi kan yepi wi?

Bijbel e taki: „Trowe yu hebi na tapu Yehovah, dan en srefi o horibaka gi yu. Noiti a o gi pasi taki wan reti-ati sma degedege” (Psalm 55:22). A sani disi e trowstu wi trutru! Sobun, fa begi kan yepi yu? Te yu e begi Gado na wan fasi di a feni bun, dan a o gi yu san yu abi fanowdu fu pasa den problema fu yu.—Luku a faki „San begi kan du gi yu”.

San begi kan du gi yu?

Yu no o broko yu ede

„Begi Gado ala ten . . . Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan nanga yepi fu Krestes Yesus” (Filipisma 4:6, 7). Te yu e fruteri Gado den broko-ede fu yu, dan a o yepi yu fu de rustig èn fu teki koni bosroiti te yu de na ini muilek situwâsi.

Yu o kisi koni fu Gado

„Efu wan fu unu e mankeri koni, dan meki a tan aksi Gado fu dati, bika te Gado e gi sma sani, a e du dati nanga en heri ati èn sondro fu suku fowtu na den. Sobun, Gado o gi a sma a koni dati” (Yakobus 1:5). Te wi de na ini muilek situwâsi, wi kan teki don bosroiti son leisi. Efu yu e begi Gado fu gi yu koni, dan a kan yepi yu fu memre den furu bun rai na ini en Wortu, Bijbel.

Yu o kisi krakti nanga trowstu

„Mi man du ala sani nanga yepi fu a sma di e gi mi krakti” (Filipisma 4:13). Fu di Yehovah na a Almakti Gado, meki a kan gi yu a krakti di yu abi fanowdu fu man pasa den problema fu yu noso fu horidoro te yu e kisi tesi (Yesaya 40:29). Bijbel e kari Yehovah „a Gado fu ala trowstu” tu. A kan trowstu wi „te wi de na ini ala sortu banawtu”.—2 Korentesma 1:3, 4.