Yehovah ’meki mi pasi kon reti’

MI PAPA NANGA MAMA E YEPI MI FU WAKA NA TAPU A RETI PASI

Baka 1920, mi papa nanga mama kon na ini waarheid. Den no ben trow ete na a ten dati. Mi gebore na ini 1939. Leki wan yongu boi na ini Ingrisikondre, mi ben gwenti go nanga mi papa nanga mama na den Kresten konmakandra èn baka wan pisi ten mi go tapu a Theokrasia Diniwroko-skoro. Te nanga a dei fu tide mi sabi ete fa mi ben firi di mi ben musu hori mi fosi lezing. Mi ben musu tanapu tapu wan sani so taki sma ben kan si mi baka a kateder. Mi ben abi siksi yari èn mi ben senwe srefisrefi di mi ben si ala den bigisma na ini a zaal.

Wan sani di mi papa ben du fu yepi mi na ini a preikiwroko, na taki a ben skrifi wan syatu boskopu na tapu wan karta so taki mi ben man gebroiki dati fu preiki gi sma. Mi ben abi aiti yari di mi wawan go preiki na wan oso. Mi ben breiti srefisrefi di na ososma leisi a karta fu mi èn di a no draidrai fu teki a buku „God zij waarachtig”. Wantewante mi lon go taigi mi papa di ben de na ini a pasi tu. A preikiwroko nanga den konmakandra ben gi mi furu prisiri. Dati meki mi ben wani dini Yehovah leki furuten preikiman.

Baka di mi papa ben seti wan abonnement gi A Waktitoren gi mi, dan a sani dati yepi mi fu lobi Bijbel moro nanga moro. Solanga den Waktitoren ben doro, mi ben e leisi den. Mi kon kisi moro frutrow na ini Yehovah èn te fu kaba mi gi misrefi abra na en.

Na ini 1950, wi osofamiri ben mag go na a internationaal kongres na ini New York. A thema fu fodewroko 3 augustus, ben de „Zendeling dei”. A dei dati Brada Carey Barber, di tron wan fu den brada fu a Tiri Skin bakaten, ben hori a dopulezing. Mi ben de wan fu den sma di ben o teki dopu. Na a kaba fu a lezing di a brada ben poti den tu aksi, mi opo tanapu, èn mi taki: „Iya!” Mi ben abi 11 yari na a ten dati, ma mi ben sabi taki mi teki wan prenspari bosroiti. Mi ben frede fu go na ini a watra fu di mi no ben man swen. Mi omu go nanga mi na a presi pe mi ben o dopu. A taigi mi taki mi no abi fu broko mi ede, fu di ala sani o waka bun. Ala sani go so gaw taki mi futu no doro gron srefi. A wan brada langa mi gi a trawan, a dati dopu mi, dan en langa mi gi wan sma di puru mi na ini a watra. Sensi a prenspari dei dati, Yehovah tan meki mi pasi kon reti.

MI TEKI A BOSROITI FU FRUTROW TAPU YEHOVAH

Di mi klari skoro, mi ben wani go pionier. Ma den skoro meester fu mi tan gi mi deki-ati fu go na universiteit èn te fu kaba mi go. Ma a no teki langa fosi mi kon si taki mi no ben o man tan na ini a waarheid aladi mi e studeri na universiteit. Dati meki mi bosroiti fu stop. Mi begi Yehovah fu a tori, dan mi skrifi wan brifi gi den skoromeester fu mi taki mi ben o stop. Na a kaba fu a fosi yari dati mi gwe. Mi ben frutrow tapu Yehovah, dati meki mi bigin pionier wantewante.

Na ini yuli 1957, mi bigin nanga a furuten diniwroko na ini a foto Wellingborough. Mi ben seni aksi den brada na a bijkantoro fu Londen efu wan pionier brada ben de nanga suma mi ben kan wroko. Na so mi bigin wroko nanga Brada Bert Vaisey di leri mi furu sani. A ben de wan fayafaya preikiman èn a yepi mi fu meki wan bun schema gi a preikiwroko. Na ini a gemeente pe mi ben de, yu ben abi siksi owru sisa, Brada Vaisey nanga mi. Fu di mi ben e sreka misrefi bun gi den konmakandra èn fu di mi ben e teki prati na den, meki dati tranga a bribi fu mi na ini Yehovah. Den piki di mi ben man gi na den konmakandra, ben gi mi na okasi fu taki fu a bribi fu mi.

Fu di mi no ben wani go na ini a legre, meki mi ben abi fu koti strafu wan syatu pisi ten. Di mi komoto na strafu mi miti Barbara, wan spesrutu pionier. Di wi trow na ini 1959, wi ben de klariklari fu go awinsi pe den ben o seni wi go. A fosi presi pe den ben seni wi go, ben de Lancashire, na a noord-westsei fu Ingrisikondre. Na ini yanuari 1961, mi kisi a kari fu go na a Kownukondre Diniwroko-skoro na Londen Betel, di ben o hori wán mun. Na a kaba fu a skoro den poti mi fu du a kringwroko. Mi no ben fruwakti a sani dati srefisrefi. Tu wiki langa mi waka nanga wan kring-owruman di ben abi ondrofeni, na ini a foto Birmingham. Barbara ben mag kon nanga mi tu. Te fu kaba wi go baka na a toewijzing fu wi na Lancashire nanga Cheshire.

NOITI A NO HATI MI TAKI MI FRUTROW TAPU YEHOVAH

Di wi ben de nanga fakansi na ini augustus 1962, wi kisi wan brifi fu a bijkantoro. Den ben seni wan formulier kon gi wi fu kan go na a Gileadskoro! Baka di wi begi fu a tori, dan mi nanga Barbara skrifi wi nen nanga tra sani na tapu a formulier, dan wi seni en go baka na a bijkantoro esi-esi. Feifi mun baka dati wi ben de na pasi fu go na Brooklyn, New York, fu de na a di fu 38 klas fu Gileadskoro. Drape wi ben o kisi leri fu Bijbel tin mun langa.

Na a Gileadskoro wi no leri nomo fu Gado Wortu èn fa a pipel fu en orga, ma wi leri tu fa brada nanga sisa na heri grontapu e dini Yehovah. Wi ben man leri furu fu den tra studenti na ini a klas fu wi fu di wi ben yongu ete. A ben de wan grani fu wroko makandra ibri dei nanga Brada Fred Rusk, di ben de wan fu den leriman fu wi. Wan prenspari sani di a leri mi, na fu sorgu taki den rai di mi e gi, e komoto fu Bijbel ala ten. Wan tu fu den brada di ben gi les na a skoro ben de brada di ben abi ondrofeni soleki Brada Nathan Knorr, Brada Frederick Franz, nanga Brada Karl Klein. Wi alamala leri furu fu na eksempre fu Brada A.  H. Macmillan, di ben abi sakafasi. A leri wi fa Yehovah yepi a pipel fu en na ini den muilek yari di den brada nanga sisa fu wi kisi tesi na a pisi ten fu 1914 te go miti 1919.

WI KISI WAN TRA TOEWIJZING

Fosi a skoro kaba, Brada Knorr taigi mi nanga Barbara taki den ben o seni wi go na Burundi, na ini Afrika. Ne wi lon go na a bibliotheek fu go luku na ini a yaribuku omeni preikiman ben de na Burundi na a ten dati. Wi no ben feni notinoti fu a kondre dati! Disi ben wani taki dati wi ben o go na wan presi pe nowan sma no ben preiki ete èn wi no ben sabi furu fu Afrika. Now wi bigin frede! Ma di wi begi fayafaya, dan wi kisi wisrefi.

Ala sani ben de tra fasi na ini Burundi: a weer, a kulturu, nanga a tongo. Now wi ben abi fu leri Fransitongo. Wi no ben abi wan presi fu tan tu. Tu dei baka di wi doro, Brada Harry Arnott, di ben de na ini a srefi Gilead klas leki wi, kon luku wi di a ben go baka na a toewijzing fu en na ini Sambia. A yepi wi fu suku wan apartement, di wi gebroiki bakaten leki a fosi zendeling-oso. Ma syatu baka dati, lantiman di no ben sabi Yehovah Kotoigi bigin gens wi. Di wi bigin lobi a wroko fu wi, lanti taigi wi taki wi no ben o man tan na ini a kondre sondro wan wroko-vergunning. A sari taki wi ben abi fu gwe libi Burundi fu go wroko na wan tra kondre. Disi leisi den brada seni wi go na Uganda.

Fu di wi ben frutrow tapu Yehovah, meki wi no ben frede fu go na Uganda sondro wan visum. Wan brada fu Kanada, di ben go yepi nanga a preikiwroko na ini Uganda, ben man taki nanga wan lantiman drape fu a situwâsi fu wi. Na so den gi wi wan tu mun fu seti den papira fu wi fu kan tan na ini a kondre. A sani dati sori wi taki Yehovah ben e yepi wi.

A situwâsi na ini Uganda ben de heri tra fasi leki a situwâsi na ini Burundi. Na ini Uganda sma ben e preiki kaba, aladi 28 Kotoigi nomo ben de na ini a heri kondre. Na ini a kontren wi miti furu sma di ben e taki Ingrisitongo. Ma heri esi wi kon frustan taki efu wi wani yepi den sma drape fu go na fesi, dan wi ben o abi fu leri a tongo fu awinsi wán fu den lo drape. Wi bigin preiki na ini a kontren fu Kampala, pe furu sma e taki Lugandatongo. Dati meki wi bosroiti fu leri a tongo dati. A teki wan tu yari fosi wi ben man taki a tongo na so wan fasi dati wi ben man preiki bun gi sma. Safrisafri wi ben kon frustan moro bun san den Bijbelstudenti fu wi ben abi fanowdu fu man go na fesi. Di den studenti fu wi kon si taki wi ben wani yepi den trutru, dan den bigin fruteri wi fa den ben e denki fu den sani di den ben e leri.

WI GO PREIKI NA DIFRENTI PRESI

A prisiri di wi ben abi fu yepi sma di ben abi sakafasi fu kon sabi a waarheid, ben kon moro bigi, di wi kisi wan grani di wi no ben fruwakti. Den brada ben aksi wi fu du a kringwroko na ini a heri kondre. A bijkantoro na ini Kenia ben seni wi go na difrenti presi na ini a kondre, fu go luku pe spesrutu pionier ben de tranga fanowdu. Difrenti leisi sma drape, di no ben sabi Yehovah Kotoigi ete, sori switifasi gi wi. Den gi wi wan switikon èn den bori nyanyan gi wi srefi.

Bakaten wi ben musu go du kringwroko na tra presi. Na Kampala mi teki wan loko èn baka tu dei mi doro na a lanpe fu Mombasa, na Kenia, pe mi teki wan sipi go na den Seisyel-èilanti na ini na India Se. Bakaten, fu 1965 te go miti 1972, Barbara kon nanga mi te mi ben e go na den Seisyel-èilanti. Na ini den yari dati, den tu preikiman di ben de drape tron wan grupu èn a grupu dati tron wan gemeente te fu kaba. Tra leisi baka, den brada ben seni mi go na Eritrea, Etiopia, nanga Sudan.

A situwâsi na ini Uganda kenki baka di srudati teki a kondre abra. Den problema di ben kon na ini den yari baka dati, ben sori mi o prenspari a de fu gi yesi na lanti soleki fa Bijbel e leri (Mark. 12:17). Wan pisi ten, ala trakondre sma di ben e libi na ini Uganda ben musu go skrifi den nen na a skowtu-post di ben de krosibei fu pe den ben e tan. Wi du dati wantewante. Wan tu dei baka dati, di mi nanga wan tra zendeling brada ben e rèi na ini Kampala, skowtu kon na wi. Wi ben frede srefisrefi! Den taigi wi taki wi na spion, dan den meki wi rèi go na a edekantoro fu den skowtu. Drape wi fruteri den taki wi no e suku trobi, wi na zendeling. Wi taigi den taki wi ben gi wi nen kaba na a skowtu-post, ma den no ben wani yere noti. Ne den teki wi poti na ini skowtu wagi, dan den rèi wi go na a skowtu-post na ini a birti pe a zendeling-oso de. Wi ben breiti srefisrefi di a skowtu di ben e skrifi sma nen, taigi den tra skowtu fu lusu wi meki wi gwe, fu di a ben sabi taki wi ben poti wi nen drape kaba.

Na a ten dati den srudati ben gwenti tapu den pasi. Te wi ben musu pasa na den presi dati wi ben frede, spesrutu te den srudati ben dringi sopi drungu. Ibri leisi te den ben stop wi, wi ben begi èn wi ben e firi fa Yehovah ben yepi wi te den ben meki wi pasa sondro taki ogri miti wi. A sari taki na ini 1973, lanti ben taki dati ala zendeling fu tra kondre ben musu gwe libi Uganda.

Baka dati wi go dini na wan tra kondre. Disi leisi den seni wi go na Ivoorkust, na West-Afrika. Dati ben de wan bigi kenki gi wi. Wi ben abi fu kon gwenti wan nyun kulturu, wi ben musu taki soso Fransitongo baka èn wi ben musu leri libi nanga zendeling fu tra kondre. Ma toku wi ben si baka fa Yehovah ben yepi wi, fu di wi si fa furu reti-ati sma ben arki a bun nyunsu èn kon na ini waarheid. Wi ala tu si fa Yehovah meki den pasi fu wi kon reti fu di wi frutrow na en tapu.

A SITUWÂSI FU MI KENKI

Ma wan dei datra ben kon si taki Barbara ben abi kanker. Wi no ben fruwakti a sani dati srefisrefi. Wi drai go baka na Europa omeni leisi fu go suku datrayepi. Ma na ini 1983 wi kon frustan taki wi no ben o man tan dini na ini Afrika moro. A sani dati hati wi srefisrefi!

A siki fu Barbara kon moro ogri di wi ben e dini na Londen Betel èn te fu kaba a dede. A Betelfamiri ben de wan bigi yepi gi mi. Wán trowpaar spesrutu yepi mi na ini a muilek situwâsi fu mi èn na so mi ben man tan frutrow tapu Yehovah. Bakaten mi ben kon miti wan sisa di ben kon yepi na Betel èn di ben de wan spesrutu pionier fosi. A ben lobi Yehovah srefisrefi. Mi nanga Ann trow na ini 1989 èn sensi a ten dati wi e dini na Londen Betel.

Fu 1995 te go miti 2018, mi ben abi a grani fu dini leki wan brada di e teki presi gi na edekantoro (fosi den ben e kari den brada disi zone-opziener). Mi go na 60 difrenti kondre. Na ini ibri kondre mi si nanga mi eigi ai fa Yehovah e blesi den futuboi fu en na ini ala sortu situwâsi.

Na ini 2017, na edekantoro seni mi go baka na Afrika. Mi ben breiti taki mi ben man tyari Ann go na Burundi fu a fosi leisi èn wi no ben man bribi di wi si fa a wroko ben go na fesi. A ben moi fu si taki na ini a srefi strati pe mi ben preiki oso fu oso na ini 1964, wan moi Betel-oso de now. Èn now moro leki 15.500 preikiman de na ini a kondre.

Mi ben breiti srefisrefi di mi kon sabi na sortu kondre mi ben musu go na ini 2018. Wan fu den kondre tapu a lijst ben de Ivoorkust. Di wi doro na ini a Abidjan, a moro bigi foto fu a kondre, dan a ben de neleki mi ben doro baka na oso. Di mi luku a telefon lijst fu Betel fu si suma ben e tan na ini a kamra sei mi, dan mi si a nen Sossou. Dati ben de a nen fu wan brada di mi ben sabi. Mi ben sabi ete taki a ben dini leki foto opziener di mi ben de na ini Abidjan. Ma a no ben de a brada dati. A ben de wan tra Sossou, a manpikin fu en.

Yehovah du san a pramisi. Den problema di miti mi leri mi taki te wi e frutrow tapu Yehovah, dan a e meki wi pasi kon reti trutru. Now mi e tan waka na tapu a pasi di e tyari mi go na têgo libi na ini a nyun grontapu.​—Odo 4:18.