1921—Wán hondro yari pasa

A WAKTITOREN fu 1 yanuari 1921 ben poti na aksi disi gi den sma di ben e ondrosuku Bijbel fayafaya: „Sortu prenspari wroko wi o du a yari disi?” Fu piki na aksi disi a Waktitoren ben taki fu Yesaya 61:1, 2, di memre den taki den ben kisi a frantwortu fu preiki. „Yehovah salfu mi fu fruteri den safri-ati sma bun nyunsu. . . . Mi musu fruteri ala sma fu a ten te Yehovah o sori sma bun-ati èn fu a dei fu wi Gado en atibron.”

PREIKIMAN DI BEN ABI DEKI-ATI

Fu man du a prenspari wroko disi, den Bijbel Ondrosukuman ben o abi fu preiki nanga deki-ati. Boiti taki den ben o abi fu fruteri den safri-ati sma a „bun nyunsu”, den ben o abi fu fruteri den ogri sma tu „fu a dei fu wi Gado en atibron”.

Brada J. H. Hoskin, di ben e libi na ini Kanada, ben e preiki nanga deki-ati, aladi sma ben e gens en. Na a bigin fu a yari 1921, a miti wan domri fu a Methodist Kerki. Na a bigin fu a takimakandra Brada Hoskin taki: „Mi ben o lobi en efu mi nanga yu ben kan taki fu Bijbel èn awinsi wi no e agri nanga ala sani, toku dati no abi fu de wan probleem.” Ma sani no waka soleki fa Brada Hoskin ben howpu. A e taki: „Baka di wi taki wan tu miniti nomo, a domri naki a doro tapu so tranga, taki mi ben prakseri taki a grasi fu a doro ben o fadon broko.”

A domri bari gi mi: „Saide yu no e go preiki gi den heiden? Go taki nanga den!” Brada Hoskin no piki en noti. Ma di a gwe a prakseri na ensrefi: ’A no nanga wan heiden mi ben e taki dan?’

A tra dei di a domri ben e hori kerki, a no ben kaba nanga a tori. Brada Hoskin taki: „A warskow den sma fu a kerki taki den musu luku bun nanga mi fu di noiti ete so wan bigi bedrigiman ben kon na ini a foto. A taigi den tu taki eigenlijk den ben musu sutu mi.” Ma a sani disi no tapu Brada Hoskin fu preiki èn a ben man taki nanga furu sma. A taki: „Sonwan fu den sma ben e bari gi mi: ’Wi sabi taki yu na wan man fu Gado!’ Den ben e taigi mi tu taki den ben kan yepi mi efu mi ben abi wan sani fanowdu.”

BUKU DI YEPI SMA FU STUDERI

Fu di den Bijbel Ondrosukuman ben wani yepi sma fu kon frustan Bijbel moro bun, meki den ben gwenti poti Bijbel aksi nanga piki na ini a tijdschrift di wi sabi now leki Ontwaakt! Bijbel aksi ben de di papa nanga mama ben kan luku nanga den pikin fu den. Den ben musu taki fu den sani disi nanga den pikin fu den ibri tron baka èn den ben musu yepi den fu feni den piki na ini Bijbel. Aksi soleki: „Omeni buku Bijbel abi?”, ben e leri pikin wan tu prenspari sani fu Bijbel. Tra aksi soleki: „A de so taki ala tru Kresten musu fruwakti taki sma o frufolgu den?”, ben e yepi den yonguwan fu tron preikiman di abi deki-ati.

Yu ben abi tra Bijbel aksi nanga piki tu gi sma di ben sabi sani fu Bijbel kaba. Den piki tapu den aksi dati ben de fu feni na ini a buku Studies in the Scriptures. Dusundusun sma leri furu fu den aksi disi, ma te fu kaba na organisâsi taki dati den aksi disi no ben o kon moro. Fu san ede?

WAN NYUN BUKU!

A buku *The Harp of God*

Wan fu den karta di ben e sori sortu pisi a sma ben musu leisi

Wan tu fu den karta nanga den aksi

Den brada di ben e teki fesi, ben frustan taki nyun sma di ben wani sabi moro fu Bijbel ben musu leri den Bijbeltori wan-fru-wan. Fu dati ede den meki a buku The Harp of God (A harpu fu Gado) na ini november 1921. Sma di ben teki a buku disi ben e kisi na okasi fu studeri en. A sani disi yepi furu sma fu kon sabi „san Gado o du fu meki libisma libi fu têgo”. Fa den ben e studeri a buku disi?

Te a sma ben teki wan buku, dan a ben e kisi wan pikin karta tu di ben e sori en sortu pisi fu a buku a ben musu leisi. A tra wiki a ben e kisi wan karta baka nanga difrenti aksi di ben abi fu du nanga a pisi di a ben leisi. Na a kaba fu a karta dati den ben e skrifi sortu pisi a ben musu leisi gi a tra wiki.

Twarfu wiki langa den studenti ben e kisi wan nyun karta ibri wiki. Brada nanga sisa fu a gemeente na ini a birti disi ben e seni den karta disi gi den. Furu tron den sma di ben e seni den karta ben de owrusma noso sma di no ben man wroko oso fu oso. Fu eksempre, Anna K. Gardner, fu Millvale, Pennsylvania, na Amerkankondre, e taki: „Di den brada meki The Harp of God, dan mi sisa Thayle, di no ben man waka so bun, ben kan yepi tu nanga a wroko fu seni den karta nanga den aksi, gi tra sma.” Te a studenti ben kaba nanga ala den les dati, dan wan sma fu a gemeente ben e go na en fu yepi en fu kon sabi moro fu Bijbel.

WROKO DI BEN DE FU DU ETE

Na a kaba fu a yari 1921 Brada J. F. Rutherford seni wan brifi gi ala den gemeente. Na ini a brifi a ben taki dati a yari dati den ben preiki „a Kownukondre boskopu na moro presi èn gi moro sma leki iniwan yari na fesi”. A ben taki tu: „Ma moro wroko de fu du ete. Gi trawan deki-ati fu yepi nanga a moi wroko disi.” Na dati den Bijbel Ondrosukuman du. Na ini a yari 1922 den preiki a Kownukondre boskopu fayafaya èn nanga deki-ati.

Mati di abi deki-ati

Fu di den Bijbel Ondrosukuman ben lobi makandra, meki den ben e yepi makandra tu. Leki fa na ondrofenitori di e kon now e sori, den ben de trutru mati „di gebore fu te nowtu de”.—Odo 17:17.

Tapu tudewroko 31 mei 1921, wan feti broko na ini Tulsa, na Oklahoma, na ini Amerkankondre (sma ben kari en a Tulsa Race Massacre). A sani disi pasa baka di den ben poti wan blakaman na strafu-oso, fu di den ben feni taki a ben du ogri nanga wan weti frow. Di wan grupu fu moro leki 1000 wetiman go feti nanga wan moro pikin grupu blakaman, dan a feti disi doro te na ini a birti fu Greenwood pe moro furu blakaman ben e tan. Drape den bron moro leki 1400 oso nanga bisnis fu sma èn den fufuru ala den sani fu den. Lanti ben taki 36 sma dede, ma a kan taki hondrohondro sma lasi den libi.

Brada Richard J. Hill, wan blaka brada di ben de wan Bijbel Ondrosukuman ben e libi na ini Greenwood. A fruteri san pasa: „A neti di a feti broko, wi ben e hori konmakandra leki fa wi ben gwenti. Baka a konmakandra wi ben e yere gon e sutu na ini a foto fu Tulsa. Di wi go sribi wi ben man yere den gon ete.” Ma dridewroko mamanten 1 yuni, a situwâsi kon moro ogri. „Wan tu sma kon taigi wi taki efu wi no ben wani taki ogri miti wi, dan wi ben musu go na a bigi theater na ini a foto wantewante.” Dati meki Brada Hill, en wefi, nanga den feifi pikin fu den go suku kibri drape. Na ini a gebow dati den srudati di lanti ben seni fu tapu a feti ben e kibri sowan 3000 blaka man nanga uma.

Na a srefi ten dati Brada Arthur Claus, di ben de wan wetiman, teki wan bosroiti di ben e sori taki a ben abi deki-ati trutru. A taki: „Di mi yere taki sma ben e fufuru sma sani èn ben e bron oso na ini a heri kontren fu Greenwood, dan mi bosroiti fu go luku fa a e go nanga mi bigi mati Brada Hill.”

Arthur Claus ben e gebroiki The Harp of God fu studeri nanga 14 pikin

Di Brada Arthur doro na a oso fu Brada Hill, a miti wan wetiman di ben e hori gon gi en. A man disi di ben de wan buurman èn wan mati fu Brada Hill, ben prakseri taki Arthur ben de wan fu den sma di ben e waka e fufuru sma sani. A bari gi en: „San yu e du na ini a man dyari?”

Arthur taki: „Efu mi no ben piki a man bun, a ben o sutu mi. Mi fruteri en taki mi na wan mati fu brada Hill èn taki mi ben kon na en oso omeni leisi kaba.” Arthur nanga a buurman ben man sorgu taki sma no du noti nanga a oso fu Brada Hill.

Te fu kaba, Arthur kon yere taki Brada Hill nanga en osofamiri ben de na a theater. Den taigi Arthur taki na Generaal Barrett ben abi a frantwortu drape. Solanga a generaal no ben teken wan papira, nowan sma ben mag komoto drape. Arthur fruteri: „A no ben makriki fu miti a generaal. Ma di mi miti en mi fruteri en san mi ben wani du èn a aksi mi: ’Yu o sorgu a famiri disi? Yu o gi den ala san den abi fanowdu?’ A no de fu taki dati mi pramisi en taki mi ben o du dati.”

Nanga a papira disi Arthur go esi-esi na a theater. Di a gi a ofisiri drape a papira, a man bari: „San! Na a generaal srefi teken a papira disi. Yu sabi taki yu na a fosi sma di kon teki sma dyaso?” Fosi yu denki, den feni Brada Hill nanga en osofamiri. Den alamala dyompo go na ini a wagi fu brada Arthur, dan a rèi den tyari go na en oso.

Brada Claus sorgu taki notinoti no pasa nanga Brada Hill nanga en osofamiri. Na eksempre fu en sori krin taki a no ben frede fu sori lobi gi en brada nanga sisa. A sani disi ben naki na ati fu tra sma tu. Brada Arthur fruteri: „A buurman di ben yepi mi fu sorgu taki noti no pasa nanga den sani fu brada Hill ben kisi moro lespeki gi Kotoigi. Wan tu tra sma ben wani sabi moro fu a bun nyunsu fu a Kownukondre, fu di den ben kon si taki wi no e desko sma fu tra ras èn taki na mindri a pipel fu Gado nowan sma no hei moro trawan.”