WI MAN STOP BITA-ATI

1 | No lobi a wan sma moro a trawan

Bijbeltekst:

„Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun.”—TORI FU DEN APOSTEL 10:34, 35.

San a wani taki:

Yehovaha Gado no e luku fu sortu kondre noso ras wi de. A no e luku tu sortu kloru noso kulturu wi abi. Na presi fu dati a e luku fa wi de dipi na ini wi ati. Bijbel e taki tu: „Libisma e si soso san na ai e si. Ma Yehovah e si fa na ati de.”—1 Samuel 16:7.

San yu kan du:

Wi no man si san de na ini sma ati, ma toku wi kan du muiti fu de leki Gado èn fu no lobi a wan sma moro a trawan. Suku fu si ibri sma aparti leki fa den de. Efu yu si taki yu e denki takru fu tra sma, kande fu di den de fu wan tra ras noso fu wan tra kondre, dan begi Gado fu yepi yu fu puru a denki dati ini yu ati (Psalm 139:23, 24). Yu kan de seiker taki Gado o yepi yu efu yu taigi en eerlijk fa yu e firi èn efu yu aksi en fu yepi yu fu no teki sei.—1 Petrus 3:12.

a Yehovah na a nen fu Gado.—Psalm 83:18.

„Dati ben de a fosi leisi taki mi ben abi switi demakandra nanga wan weti sma . . . Now mi abi tru brada nanga sisa na heri grontapu.”—TITUS

Wan tori di pasa trutru—TITUS

Leri fu no abi bita-ati moro

Titus ben de na ini wan grupu fu yonguwan di ben e du ogri èn di no ben e gi yesi. A e taki: „Wi ben e go na presi soleki hotel nanga bar pe sma no ben wani taki blakaman kon, soso fu bigin wan feti.” Titus e taki dati na bita-ati ben meki taki a e du den sani disi. A e taki moro fara: „Efu mi ben kisi trobi nanga wan sma, awansi na wan mansma noso wan umasma, ala ten na mi ben de a sma di ben naki fosi.”

Titus bigin kenki di a bigin studeer Bijbel nanga Yehovah Kotoigi. A ben abi furu krakti tapu en di a bigin leisi Bijbel. A pramisi fu Bijbel di naki en ati trutru na taki „dede no o de moro, nowan sari noso krei, noso pen no o de moro.”—Openbaring 21:3, 4.

Na ini a bigin, a ben muilek gi Titus fu no abi bita-ati gi trawan moro. A e taki: „A ben muilek srefisrefi fu kenki a fasi fa mi ben e denki nanga a fasi fa mi ben e tyari misrefi.” Ma a sani di skrifi na ini Tori fu den apostel 10:34, 35 yepi en. A tekst dati e taki dati Gado no lobi a wan sma moro a trawan.

San ben de a bakapisi? Titus taki: „Mi kisi na overtoigi taki den Kotoigi fu Yehovah abi a tru bribi, di mi si taki den lobi makandra awansi fu sortu ras den de. Fosi mi dopu srefi, wan weti brada fu a gemeente gi mi wan kari fu kon nyan na en oso. A sani dati ben de leki wan dren, fu di dati ben de a fosi leisi taki mi ben abi switi demakandra nanga wan weti sma. Now mi abi tru brada nanga sisa na heri grontapu.”