Trutru koni e bari bun tranga

1. Fa furu sma e denki fu a koni di de na ini Bijbel? (Odo 1:20, 21)

NA INI furu kondre wi ben gwenti si wi brada nanga sisa e tanapu na presi pe furu sma e pasa. Den e lafu nanga den sma èn den e gi den wan sani fu leisi. Kande yusrefi du a wroko disi kaba. Efu dati de so, dan kande yu ben prakseri a tekst na ini Odo pe skrifi taki koni e bari na strati so taki sma kan yere en sten. (Leisi Odo 1:20, 21.) Wi e feni trutru koni, sobun a koni fu Yehovah, na ini Bijbel nanga den buku fu wi. Disi na a koni di sma abi fanowdu so taki den kan kisi têgo libi. Wi breiti te sma e teki den buku fu wi fu leisi. Ma a no ala sma wani den. Son sma no wani yere san Bijbel e taki. Trawan e lafu wi. Den feni taki Bijbel owru tumusi fu gebroiki now. Sma de tu di e krutu san Bijbel e leri te a abi fu nanga a fasi fa wi musu libi. Den feni taki den sma di e libi leki fa Bijbel e leri, strak tumusi èn taki den sma disi e krutu a fasi fa tra sma e libi. Toku wi lobi-ati Gado, Yehovah e sorgu taki ala sma kan kisi trutru koni. Fa a e du dati?

2. Pe wi kan feni trutru koni na ini a ten disi, ma san furu sma e du?

² Wan fasi fa Yehovah e sorgu taki sma man feni trutru koni, na taki a gi wi en Wortu, Bijbel. Ala sma kan abi wan Bijbel. Fa a de nanga den buku fu wi di e fruklari Bijbel? Yehovah sorgu taki den de fu kisi na ini moro leki 1000 tongo. Den sma di e leisi den buku disi èn di e du san den leri, o kisi wini fu den. Ma furu sma no wani kisi trutru koni. Te den musu teki bosroiti, dan den e frutrow tapu densrefi noso den e arki tra sma. Sonwan fu den e wisiwasi wi srefi fu di wi e du san skrifi na ini Bijbel. Na ini na artikel disi wi o luku fu san ede sma e du so. Ma fosi wi du dati, wi o luku fa wi kan kisi trutru koni fu Yehovah.

SABI FU YEHOVAH NA A BIGIN FU KONI

3. San na trutru koni?

³ Wi kan taki dati wan sma koni te a man gebroiki a sabi di a abi fu teki bun bosroiti. Ma trutru koni wani taki moro leki dati. Bijbel e taki: „Bigi lespeki gi Yehovah na a bigin fu koni. Wan sma abi frustan, soso te a sabi a Moro Santawan” (Odo 9:10). Sobun, te wi musu teki wan prenspari bosroiti, dan wi musu luku fa Yehovah, „a Moro Santawan”, e denki fu a tori. Wi kan kon sabi fa a e denki te wi e ondrosuku san Bijbel nanga den buku fu wi e taki. Te wi e du dati, dan wi e sori taki wi abi trutru koni.​—Odo 2:5-7.

4. Fu san ede na Yehovah wawan kan gi wi trutru koni?

⁴ Na Yehovah wawan kan gi wi trutru koni (Rom. 16:27). Na en abi ala koni. Fu san ede wi kan taki dati? A fosi sani na taki Yehovah meki ala sani èn a sabi ala den sani di a meki heri bun (Ps. 104:24). A di fu tu sani na taki ala sani di Yehovah e du e sori taki a koni (Rom. 11:33). Èn di fu dri, na taki ala ten sma e kisi wini te den e du san Yehovah taki (Odo 2:10-12). Efu wi wani kisi trutru koni, dan wi musu hori den dri sani disi na prakseri te wi e teki bosroiti èn te wi e du tra sani.

5. San e pasa fu di furu sma no e agri taki trutru koni e kon fu Yehovah?

⁵ Na ini furu kondre sma e agri taki den sani na grontapu meki na wan heri moi fasi, ma toku den no e bribi taki wan Mekiman de. Tra sma e taki dati den e bribi na ini Gado, ma den feni taki den rai fu Bijbel owru tumusi gi a ten disi èn dati meki den e du san densrefi wani. San na a bakapisi? Yu feni taki grontapu kon tron wan moro bun presi fu di sma e frutrow tapu den eigi koni na presi fu frutrow tapu a koni fu Gado? A de so taki sma de trutru koloku noso den abi wan moi howpu gi a ten di e kon? San wi e si na grontapu tide, e sori taki noiti sani o waka bun gi sma di e frutrow tapu den eigi koni na presi fu frutrow tapu a koni fu Gado (Odo 21:30). Disi e gi wi moro deki-ati fu tan suku trutru koni na Yehovah. A sari taki furu sma no wani du dati. Fu san ede?

FU SAN EDE SMA NO WANI KISI TRUTRU KONI

6. Soleki fa Odo 1:22-25 e sori, dan sortu sma no wani arki trutru koni?

⁶ Furu sma e gi dofusei te den e yere trutru koni „e bari na strati”. Bijbel e sori taki dri grupu sma de di no wani kon koni. Dati na den sma „di no abi ondrofeni”, den „spotuman”, nanga den „don sma”. (Leisi Odo 1:22-25.) Meki wi go luku san e meki taki den sma disi no wani kisi trutru koni, èn meki wi taki tu fa wi kan sorgu taki wi no de leki den.

7. Fu san ede son sma no wani kisi ondrofeni?

⁷ Den sma „di no abi ondrofeni” na den wan di e bribi ala san den yere èn sma kan kori den makelek (Odo 14:15). Nofo tron wi e miti den sma disi na ini a preikiwroko. Fu eksempre, prakseri omeni sma den kerki fesiman nanga politiekman kori. Son sma e skreki te den kon sabi taki den man disi kori den. Ma den sma di Odo 1:22 e taki fu den, no wani kisi ondrofeni. Den lobi a fasi fa den de kaba (Yer. 5:31). Den e du san den srefi feni bun èn den no wani kon sabi san Bijbel e taki. Den no wani hori den wet fu Bijbel tu. Furu fu den sma disi e denki leki wan frow na ini Kanada di ben lobi a kerki fu en èn di ben taigi wan Kotoigi: „Efu a priester fu wi kori wi, dan na en fout, a no wi fout!” Noiti wi wani de leki den sma di e weigri fu kenki!​—Odo 1:32; 27:12.

8. San o yepi wi fu kisi ondrofeni?

⁸ Wi no musu de leki sma di no abi ondrofeni. Bijbel e gi wi a deki-ati fu ’kon de leki bigisma na ini a fasi fa wi e denki’ (1 Kor. 14:20). Wi e kisi ondrofeni te wi e du san Bijbel e leri wi. Safrisafri wi e kon si taki den leri fu Bijbel e yepi wi fu no kon ini problema èn fu teki bun bosroiti. A bun fu luku efu wi e go na fesi na ini a tori disi. Efu yu e studeri Bijbel wan pisi ten kaba èn yu e go na den konmakandra, dan aksi yusrefi fu san ede yu no gi yusrefi abra na Yehovah ete èn teki dopu. Efu yu dopu kaba, dan a de so taki yu e go na fesi na ini a fasi yu e preiki a bun nyunsu èn e hori Bijbelstudie? Den bosroiti di yu e teki e sori taki yu e du san Bijbel e leri? Yu e libi nanga trawan leki fa Yesus ben o du dati? Efu wi si taki wi musu tyari kenki kon na ini son sani, dan meki wi poti prakseri na den wet fu Yehovah di „e meki a sma sondro ondrofeni kisi koni”.​—Ps. 19:7.

9. Fa den „spotuman” e sori taki den no wani arki a koni fu Gado?

⁹ A di fu tu grupu sma di no wani arki a koni fu Gado na den „spotuman”. Son leisi wi e miti den sma disi na ini a preikiwroko. Den lobi spotu trawan (Ps. 123:4). Bijbel ben warskow taki na ini den lasti dei spotuman ben o lai (2 Petr. 3:3, 4). Neleki den man di ben o trow nanga den umapikin fu Lot, son sma na ini a ten disi no e poti prakseri na den warskow fu Gado (Gen. 19:14). Furu sma e lafu trawan di e hori densrefi na den wet fu Gado. Den e spotu den fu di den wani du „den ogri sani di den eigi lostu e meki den du” (Yud. 7, 17, 18). Den sani di Bijbel e taki fu spotuman na precies san sma di fadon komoto na bribi nanga sma di no wani dini Yehovah e du.

10. Soleki fa Psalm 1:1 e sori, dan fa wi kan sorgu taki wi no e tron spotuman?

¹⁰ Fa wi kan sorgu taki wi no e tron spotuman? Wi musu sorgu taki wi no e bumui nanga sma di e krutukrutu gi ala pikinpikin sani. (Leisi Psalm 1:1.) Disi wani taki wi no musu arki noso leisi sani di e kon fu sma di fadon komoto na bribi. Wi musu luku bun taki wi no e kon abi a gwenti fu krutukrutu. Efu wi e du dati, dan wi o bigin tweifri na a fasi fa Yehovah e du sani èn na den rai di wi e kisi fu na organisâsi fu en. Fu sorgu taki dati no pasa, wi musu aksi wisrefi: ’Mi abi a gwenti fu krutukrutu te na organisâsi e tyari kenki kon noso e fruklari sani tra fasi? Mi e suku fowtu na den brada di e teki fesi?’ Efu wi no e du den sani disi moro, dan Yehovah o prisiri nanga wi.​—Odo 3:34, 35.

11. Fa den „don sma” e si den wet fu Yehovah?

¹¹ A di fu dri grupu sma di no e arki a koni fu Gado, na den „don sma”. Den don fu di den no wani libi soleki fa den wet fu Gado e sori. Den e du san densrefi feni bun (Odo 12:15). Den sma disi no e teri Yehovah, a Gado di abi ala koni (Ps. 53:1). Nofo tron te wi e miti den na ini a preikiwroko, den e haritaki nanga wi fu di wi e lespeki Bijbel. Ma den no man taigi wi san na a moro bun fasi fu libi. Bijbel e taki: „Trutru koni na wan tumusi bigi grani gi wan donman. Na den portu a no o kisi okasi fu opo en mofo taki wan sani” (Odo 24:7). Iya, wan don sma no abi nowan koni rai fu gi wi. Dati meki Yehovah e warskow wi fu „no bumui nanga donman”!​—Odo 14:7.

12. San o yepi wi fu no de leki den don sma?

¹² Wi no de leki den sma di no abi lespeki gi den wet fu Yehovah. Na presi fu dati wi leri fu lobi a fasi fa Yehovah e denki èn wi lobi den wet fu en. Wi kan kisi moro lobi gi den wet fu en te wi e luku a libi fu den sma di e gi yesi na den wet fu en, nanga a di fu den wan sma di no e gi yesi. Luku sortu problema sma e kisi fu di den no e gi yesi na den koni rai fu Yehovah. Dan luku fa yu libi e waka bun fu di yu e gi yesi na den wet fu Gado.​—Ps. 32:8, 10.

13. Yehovah e dwengi wi fu arki den koni rai fu en?

¹³ Yehovah e sorgu taki ala sma kan kisi a koni fu en. Toku a no e dwengi nowan sma fu teki den koni rai fu en. Ma a e sori wi sortu takru bakapisi sma e kisi te den no e arki en (Odo 1:29-32). Den sma di no e arki Yehovah „o pai gi den sani di den du”. Te fu kaba a fasi fa den e libi o tyari furu sari nanga pen kon gi den. Èn te a dei fu Yehovah doro, a o strafu den. Ma Yehovah e pramisi taki ’sani o waka bun gi a sma di e gi yesi na en èn a no abi fu frede taki ogri o miti en’.​—Odo 1:33.

TRUTRU KONI E TYARI WINI KON GI WI

14-15. San wi e leri fu Odo 4:23?

¹⁴ Ala ten wi e kisi wini te wi e gi yesi na den koni rai fu Gado. Soleki fa wi si, dan Yehovah sorgu taki ala sma kan kisi a koni fu en na wan makriki fasi. Fu eksempre, na ini a buku Odo a e gi wi moi rai di kan meki wi libi waka moro bun efu wi e gi yesi na den. Meki wi go luku fo fu den rai disi.

¹⁵ Kibri yu ati. Bijbel e taki: „Kibri yu ati, moro iniwan sani di de fu kibri, bika na drape den rutu fu a libi de” (Odo 4:23). Fu man kibri wi trutru ati, wi musu nyan gosontu nyanyan, wi musu oefen wi skin bun èn wi musu tapu nanga gwenti di no bun. Wi kan du wan srefi sortu sani fu kibri wi agersi ati. Wi musu leisi Gado Wortu ibri dei, wi musu sreka wisrefi èn go na den konmakandra, èn wi musu teki prati na den. Wi musu go ibri tron baka na ini a preikiwroko tu. Boiti dati, wi musu wai pasi gi takru gwenti. Sobun, wi musu luku bun nanga iniwan sani di kan pori wi denki, sani soleki felem, poku èn sosrefi takru kompe.

16. Fu san ede Odo 23:4, 5 e yepi wi na ini a ten disi?

¹⁶ De tevrede nanga san yu abi. Bijbel e gi wi a rai disi: „No wroko tranga soso fu kon gudu. . . . Yu meki yu ai luku a gudu, aladi a no de drape trutru? Fosi yu denki, a e kisi frei leki den di fu wan aka èn a e frei go na loktu” (Odo 23:4, 5). Moni nanga den gudu kan lasi gwe wantronso. Toku gudu sma èn srefi den pôtiwan e feti baka moni na ini a ten disi. Dati meki nofo tron den e du sani di e tyari porinen kon gi den, di e broko den osofamiri èn di no bun gi a gosontu fu den (Odo 28:20; 1 Tim. 6:9, 10). Ma fu di wi e gi yesi na den koni rai fu Gado, meki wi no e broko wi ede tumusi nanga moni. Dati e yepi wi fu no abi bigi-ai, ma wi de tevrede èn wi de koloku.​—Preik. 7:12.

17. Fa wi kan kon abi „a tongo fu den koniwan” soleki fa a skrifi na Odo 12:18?

¹⁷ Denki fosi yu taki. Efu wi no luku bun, wi kan hati trawan firi nanga den sani di wi e taki. Bijbel e taki: „Sma de di e taki sani sondro fu denki, neleki na dyuku den e dyuku trawan nanga wan feti-owru, ma a tongo fu den koniwan na dresi” (Odo 12:18). Wi e sorgu taki freide de te wi no e waka e taki fu den fowtu fu trawan (Odo 20:19). Efu wi wani meki den sani di wi e taki trowstu sma na presi fu hati den, dan wi musu furu wi ati nanga Gado Wortu (Luk. 6:45). Te wi e denki dipi fu san Bijbel e taki, dan den wortu fu wi o de leki wan ’peti watra’ di e kowru sma ati.​—Odo 18:4.

18. Fa Odo 24:6 e yepi wi fu du wi preikiwroko moro bun?

¹⁸ Teki den rai di wi e kisi fu na organisâsi. Bijbel e gi wi a moi rai disi di kan yepi wi: „Koni rai o meki yu feti wan bun feti èn furu raiman o tyari frulusu kon” (Odo 24:6). Fa a tekst disi kan yepi wi fu preiki èn fu gi sma leri moro bun? Na presi taki wi e du a preikiwroko leki fa wi wani, wi e pruberi fu teki den rai di wi e kisi. Wi e kisi koni rai tapu den konmakandra pe brada nanga sisa di abi ondrofeni e hori lezing nanga demonstrâsi. Na so wi e leri fu den. Boiti dati, Yehovah organisâsi e gi wi someni bun wrokosani, soleki buku nanga felem di e yepi sma fu frustan Bijbel. Yu e gebroiki den sani disi bun?

19. Fa yu e denki fu den koni rai di Yehovah e gi wi? (Odo 3:13-18)

¹⁹ Leisi Odo 3:13-18. Wi de nanga furu tangi gi den bun rai di Gado Wortu e gi wi! Wi no ben o de koloku efu wi no ben abi den rai fu Gado. Na ini na artikel disi, wi taki fu koni rai di wi e feni na ini a buku Odo. Ma a no de fu taki dati Yehovah e gi wi koni rai na ini a heri Bijbel. Meki a de so taki ala ten wi e teki den rai di Yehovah e gi wi. Wi no e span nanga a fasi fa grontapu e si Gado Wortu, ma wi de seiker taki ’den sma di e grabu koni hori, o de koloku’.