Tan waka baka Yesus te yu dopu

1-2. Sortu blesi wan sma e kisi baka te a dopu?

WI E prisiri srefisrefi te wi tron wan Kotoigi fu Yehovah fu di wi teki dopu. Den sma di abi a grani disi ben o agri nanga den wortu fu a psalm skrifiman David, di ben taki: „Koloku fu a sma di yu e kari fu kon krosibei na yu [Yehovah], so taki a kan tan na ini den fesidyari fu yu oso.”​—Ps. 65:4.

² Sortu sma Yehovah e tyari kon na ini den fesidyari fu en? Soleki fa na artikel na fesi ben sori, dan a e hari den sma kon na en di e sori taki den wani tron mati fu en (Yak. 4:8). Te yu gi yusrefi abra na Yehovah èn yu e dopu, dan yu e kon moro krosibei na en na wan aparti fasi. Yu kan de seiker taki baka te yu dopu a ’o blesi yu so te, taki yu no o mankeri nowan sani’.​—Mal. 3:10; Yer. 17:7, 8.

3. Sortu seryusu frantwortu Kresten abi te den gi densrefi abra na Gado èn teki dopu? (Preikiman 5:4, 5)

³ Te yu dopu, dan a no de fu taki dati disi na a bigin nomo. Baka te yu dopu, yu o du ala san yu man fu tan dini Yehovah soleki fa yu pramisi èn yu o gi yesi na en srefi te yu e kisi tesi fu du sani di no bun noso te problema miti yu. (Leisi Preikiman 5:4, 5.) Fu di yu na wan disipel fu Yesus, meki yu o du ala san yu man fu waka baka na eksempre fu en èn fu hori yusrefi na den komando fu en (Mat. 28:19, 20; 1 Petr. 2:21). Na artikel disi o yepi yu fu du dati.

„TAN WAKA NA [YESUS] BAKA” AWINSI PROBLEMA NANGA TESI E MITI YU

4. Na sortu fasi den disipel fu Yesus e tyari wan „pinapostu”? (Lukas 9:23)

⁴ No denki taki a libi fu yu o de sondro problema baka te yu dopu. Fu taki en leti, Yesus ben sori krin taki den disipel fu en ben o tyari wan „pinapostu”. Te yu luku en bun, den ben o du dati „ibri dei baka”. (Leisi Lukas 9:23.) Ma a de so taki Yesus ben wani taigi den bakaman fu en taki den ben o pina doronomo? Kwetikweti! Fu taki en leti, a ben wani sori den taki den no ben o kisi blesi w’wan, ma taki den ben o kisi tesi tu. A kan tu taki wan tu fu den tesi dati ben o hebi srefisrefi.​—2 Tim. 3:12.

5. Sortu blesi Yesus pramisi den wan di ben o du ala san den man fu dini Yehovah?

⁵ Kande yu famiri gens yu, noso kande yu ben kan abi moro moni nanga gudu, ma yu besroiti fu poti Gado Kownukondre na a fosi presi na ini yu libi (Mat. 6:33). Efu dati de so, dan yu kan de seiker taki Yehovah sabi ala san yu du gi en (Hebr. 6:10). Kande yu ondrofeni a sani disi di Yesus ben taki: „Ibri sma di gowe libi en oso, noso en brada, noso en sisa, noso en mama, noso en papa, noso en pikin, noso en gron fu mi ede èn fu a bun nyunsu ede, o kisi wán hondro tron moro leki san a abi na ini a ten disi. A o kisi oso, brada, sisa, mama, pikin, nanga gron èn a o kisi frufolgu tu. Ma na ini a ten di e kon a o kisi têgo libi” (Mark. 10:29, 30). A de krin taki den blesi di yu kisi warti moro den sani di yu libi na baka.​—Ps. 37:4.

6. Fu san ede yu o abi fu tan kakafutu gi den „lostu fu a skin” baka te yu dopu?

⁶ Ma baka te yu dopu, yu o abi fu kakafutu ete gi den „lostu fu a skin” (1 Yoh. 2:16). Disi de so fu di yu abi sondu ete. Son leisi yu ben kan firi leki na apostel Paulus di ben skrifi: „Na ini mi ati mi e prisiri trutru nanga a wèt fu Gado, ma mi e si taki wan tra wèt de na ini mi skin, èn a e feti nanga a wèt fu mi frustan. A wèt dati na a sondu di de na ini mi skin, èn a e basi mi” (Rom. 7:22, 23). Kande yu e firi brokosaka fu di yu musu kakafutu gi takru lostu. Ma te yu e prakseri san yu pramisi Yehovah di yu gi yusrefi abra na en, dan dati o gi yu a krakti fu kakafutu gi tesi. A pramisi dati o yepi yu te yu e kisi tesi fu du sani di no bun. Fa so?

7. Te yu gi yusrefi abra na Yehovah, dan fa dati o yepi yu fu tan gi yesi na en?

⁷ Te yu gi yusrefi abra na Yehovah, dan yu no e teri yusrefi moro. Disi wani taki dati yu no o feti moro baka sani di yu sabi taki Yehovah no feni bun (Mat. 16:24). Sobun, te wan tesi e miti yu, dan yu no abi fu denki tumsi langa san yu musu du bika yu besroiti na fesi kba san yu o du. Yu o tan gi yesi na Yehovah. Yu o du ala san yu man fu du san Yehovah wani. Yu o de leki Yob. Aladi hebi tesi ben e miti en, tòg a taki sondro fu degedege: „Mi o tai hori na Gado”!​—Yob 27:5.

8. Te yu e prakseri san yu pramisi Yehovah di yu gi yusrefi abra na en, dan fa dati o yepi yu fu kakafutu gi tesi?

⁸ Te yu e prakseri san yu pramisi Yehovah di yu gi yusrefi abra na en, dan dati o gi yu a krakti fu kakafutu gi tesi. Fu eksempre, yu ben o sori lobifiri gi wan sma te yu sabi taki a sma dati trow kba? Kwetikweti! Yu pramisi Yehovah kba taki yu no o du a sani dati noiti. Efu yu no e gi pasi taki den sortu firi disi opo kon na ini yu ati, dan yu no o abi fu feti fu rutu den puru bakaten. Yu ’no o teki a pasi’ fu „den ogri sma”.​—Odo 4:14, 15.

9. Te yu e prakseri san yu pramisi Yehovah di yu gi yusrefi abra na en, dan fa dati kan yepi yu tu fu tan poti na anbegi fu Yehovah na a fosi presi na ini yu libi?

⁹ Ma fa a de efu wan sma wani gi yu wan wroko di o meki en muilek gi yu fu go na ala den Kresten konmakandra? Yu ben o sabi kba san fu du. Langa ten fosi a sma ben wani gi yu a wroko, yu ben besroiti kba taki yu no ben o teki so wan wroko. Sobun, yu no o prakseri fu teki a wroko, dan baka dati yu o luku fa yu o poti Yehovah na a fosi presi na ini yu libi. Te wi e denki dipi fu na eksempre fu Yesus, dan dati kan yepi wi. A ben abi a fasti besroiti fu du san en Papa ben wani. Neleki Yesus yu musu weigri fu du iniwan sani di yu sabi taki a Gado fu yu no feni bun, èn yu musu du dati sondro fu degedege.​—Mat. 4:10; Yoh. 8:29.

10. Fa Yehovah o yepi yu fu ’tan waka na Yesus baka’, baka te yu dopu?

¹⁰ Den besroiti di yu e teki te tesi nanga problema miti yu kan sori efu yu abi a fasti besroiti fu ’tan waka na Yesus baka’. Èn yu kan de seiker taki Yehovah o yepi yu fu tan waka na Yesus baka. Bijbel e taki: „Unu kan frutrow Gado. A no o meki unu kisi tesi di hebi moro leki san unu man tyari. Ma te tesi miti unu, a o yepi unu, so taki unu man horidoro.”​—1 Kor. 10:13.

FA YU KAN TAN WAKA BAKA YESUS?

11. San na wan fu den moro bun fasi fa yu kan tan waka na Yesus baka? (Luku a prenki.)

¹¹ Yesus ben e dini Yehovah nanga en heri ati èn a ben e tan begi Yehovah (Luk. 6:12). Fu taki en leti, wan fu den moro bun fasi fa yu kan tan waka baka Yesus baka te yu dopu, na te yu e tan du sani di o tyari yu moro krosibei na Yehovah. Bijbel e taki: „Efu a de so taki wi go na fesi kaba, dan meki wi tan go na fesi na a srefi fasi” (Fil. 3:16). Ten na ten yu o yere den ondrofenitori fu brada nanga sisa di besroiti fu du moro na ini a diniwroko fu Yehovah. Kande den go na a Skoro gi Kownukondre Preikiman, noso kande den froisi go tan na wan kontren pe moro preikiman de fanowdu. Efu a situwâsi fu yu e gi pasi taki yu du wan fu den sani disi, dan a ben o bun fu du en. A pipel fu Yehovah e angri fu du moro gi en (Tori 16:9). Ma fa a de te yu no man du dati? No denki taki Yehovah no e warderi den sani di yu e du gi en. San prenspari, na taki yu e tan horidoro (Mat. 10:22). No fergiti taki Yehovah e prisiri nanga yu te yu e du ala san yu man. Dati na wan prenspari fasi fa yu kan tan waka baka Yesus baka te yu dopu.​—Ps. 26:1.

12-13. San yu kan du te yu e si taki yu e lasi prisiri na ini a diniwroko fu Yehovah? (1 Korentesma 9:16, 17) (Luku a faki „Tan horidoro na ini a streilon”.)

¹² Ma san yu musu du efu yu feni taki yu no e begi kmoto fu yu ati moro, noso taki a preikiwroko no e gi yu prisiri moro leki fosi? San yu musu du efu a no e gi yu prisiri moro fu leisi Bijbel? Efu na so yu e firi baka te yu dopu, dan no denki taki a yeye fu Gado gwe libi yu. Yu na wan sondu libisma, sobun, den firi fu yu kan kenki ten na ten. Efu yu e si taki yu no e dini Yehovah so fayafaya moro leki fosi, dan prakseri na eksempre fu na apostel Paulus. Aladi a ben e pruberi fu de leki Yesus, toku a ben sabi taki son leisi a no ben o firi fu du san a ben musu du. (Leisi 1 Korentesma 9:16, 17.) A ben taki: „Efu mi e [preiki a bun nyunsu] aladi mi no wani, toku a frantwortu de na mi tapu fu du a wroko.” Sobun, Paulus ben e tan du a diniwroko fu en, awinsi fa a ben e firi na a momenti dati.

¹³ Dati meki a fasi fa yu e firi no musu tapu yu fu du san yu musu du. Teki a besroiti fu du san bun, awinsi yu no e firi fu du dati. Te yu e tan du san bun, dan te fu kba den firi fu yu kan kenki. Teleki dati psa, a bun fu tan studeri, tan begi, tan go na den konmakandra, èn tan preiki a bun nyunsu. Den sani disi o yepi yu fu tan waka baka Yesus baka te yu dopu. Te den brada nanga sisa fu yu e si fa yu e tan dini Yehovah, dan dati o de wan deki-ati gi den.​—1 Tes. 5:11.

„TAN ONDROSUKU . . . TAN BUWEISI”

14. San yu musu tan ondrosuku, èn fu san ede? (2 Korentesma 13:5)

¹⁴ Baka te yu dopu, a prenspari taki yu e tan ondrosuku yusrefi. (Leisi 2 Korentesma 13:5.) Ten na ten a bun fu luku efu yu abi a gwenti fu begi ibri dei, fu leisi èn studeri Bijbel, fu go na den konmakandra, èn fu teki prati na a preikiwroko. Pruberi fu kisi moro wini nanga prisiri fu den sani disi. Fu eksempre, aksi yusrefi: ’Mi kan ferklari den prenspari Bijbel tru tori gi sma? Fa mi kan du a diniwroko fu mi nanga moro prisiri? Mi e taigi Yehovah krin san de na tapu mi ati te mi e begi en, èn den begi fu mi e sori taki mi e fertrow dorodoro tapu Yehovah? Mi gwenti go na den Kresten konmakandra? San mi kan du fu poti moro prakseri na den konmakandra èn fu teki prati na den?

15-16. Te yu e luku na ondrofenitori fu a brada, dan fa yu musu kakafutu gi tesi?

¹⁵ A ben o bun tu fu kon sabi sortu swakifasi yu abi. Wan brada di nen Robert e ferteri wan ondrofenitori di e tyari a sani dati kon na krin. A e taki: „Di mi ben abi sowan 20 yari, dan mi ben e wroko na wan presi wan tu dei na ini a wiki. Wan dei baka wroko, wan dame di ben e wroko drape tu aksi mi fu go nanga en na en oso. A taigi mi taki wi ben o de wi w’wan èn taki a ben wani abi seks nanga mi. Na a bigin mi taigi en wan tu sani fu sori en taki mi no ben o man, ma mi no taki krin. Ma te fu kba mi taigi en taki mi no wani èn mi taigi en tu fu san ede.” Robert kakafutu gi a tesi disi, èn dati bun. Ma bakaten a prakseri san miti en èn a no ben tevrede nanga a fasi fa sani ben waka. A e taki: „Mi ben e draidrai èn mi no ben taigi a dame krin taki mi no wani abi seks nanga en, neleki fa Yosef ben du dati nanga a wefi fu Potifar (Gen. 39:7-9). Fu taki en leti, mi ben ferwondru taki a ben muilek so gi mi fu taigi a dame taki mi no wani. Ma a sani di psa yepi mi fu kon si taki mi ben musu tranga a matifasi di mi abi nanga Yehovah.”

¹⁶ Yu o kisi wini te yu e ondrosuku yusrefi neleki fa Robert ben ondrosuku ensrefi. Awinsi yu ben man kakafutu gi tesi, toku a bun fu aksi yusrefi: ’O langa a teki fosi mi taki ’no’?’ Efu yu feni taki yu musu wroko ete na yusrefi, dan no las’ati. Na presi fu dati yu kan prisiri fu di yu sabi now taki yu abi wan swakifasi. Begi Yehovah fu yepi yu nanga a swakifasi disi èn du sani di o yepi yu fu gi yesi na en nanga yu heri ati.​—Ps. 139:23, 24.

17. Fa a sani di miti Robert ben abi krakti tapu a nen fu Yehovah?

¹⁷ Ma wi kan leri ete wan sani fu na ondrofenitori fu Robert. A e taki: „Baka di mi weigri fu du san a dame fu mi wrokope ben aksi fu mi, dan a taki: ’Yu psa a test!’ Mi aksi en san a ben wani taki nanga dati. A taigi mi taki wan mati fu en di ben de wan Kotoigi fosi, ben taigi en taki ala yongu Kotoigi e libi wan dobru libi èn taki efu okasi ben de, den no ben o draidrai fu du san no bun. Dati meki a dame disi taigi en mati taki a ben o test luku efu mi ben de so tu. Di a taki a sani dati, dan mi ben breiti srefisrefi taki mi ben hori Yehovah nen hei.”

18. San yu o du baka te yu dopu? (Luku a faki „Tu artikel di yu o lobi.”)

¹⁸ Te yu gi yusrefi abra na Yehovah èn te yu dopu, dan yu e sori taki yu wani santa en nen awinsi san e psa. Èn yu kan de seiker taki Yehovah sabi gi sortu tesi nanga problema yu e kakafutu. A o blesi a muiti di yu e meki fu tan gi yesi na en. Yu kan de seiker taki a o gebroiki en santa yeye fu gi yu a krakti di yu abi fanowdu fu man du dati (Luk. 11:11-13). Yu kan abi a fertrow taki Yehovah o yepi yu fu tan waka baka Yesus baka te yu dopu.