Fa wi kan du a preikiwroko nanga moro prisiri

1. Fa son sma e firi te den musu taki nanga trawan na ini preikiwroko? (Luku a prenki.)

LEKI a pipel fu Yehovah, wi e preiki gi trawan fu di wi lobi wi hemel Papa èn wi wani yepi sma fu tron wan mati fu en. Furu preikiman e prisiri te den de na ini a preikiwroko. Ma trawan no e prisiri na ini a preikiwroko. Fu san ede? Son preikiman e syensyen èn den feni taki den a no bun leriman. Trawan feni en muilek fu go na sma oso sondro taki den kisi wan kari. Tra preikiman e frede taki sma o atibron na den tapu èn son preikiman feni taki sma o meki trobi nanga den. Aladi den brada nanga sisa disi lobi Yehovah, tòg a no makelek gi den fu taki fu a bun nyunsu nanga wan sma. Ma fu di den sabi taki a wroko disi prenspari, meki den abi a gwenti fu preiki gi sma. A no de fu taki dati Yehovah breiti nanga den!

2. Fu san ede yu no musu firi brokosaka efu yu no e prisiri son leisi na ini a preikiwroko?

² A muilek gi yu son leisi fu du a preikiwroko nanga prisiri? Efu na so yu e firi, dan grantangi no firi brokosaka. A fasi fa yu e firi e sori taki yu abi sakafasi èn taki yu no wan taki trawan poti tumsi furu prakseri na yu. A e sori tu taki yu no wani hari taki nanga sma. Èn nowan sma wani taki sma e atibron nanga en, spesrutu te na wan bun sani a wani du gi den. Yu hemel Papa sabi heri bun fa yu e firi èn a wani gi yu a yepi di yu abi fanowdu (Yes. 41:13). Na ini na artikel disi wi o poti prakseri na feifi sani di wi kan du te a preikiwroko no e gi wi prisiri. Wi o luku tu fa wi kan abi moro prisiri na ini a preikiwroko.

MEKI GADO WORTU TRANGA YU

3. San yepi a profeiti Yeremia fu preiki gi trawan?

³ Srefi na ini owruten, den sani di Yehovah ben taigi den futuboi fu en, gi den dek’ati te den ben musu du wan wroko di no ben makelek. Kow luku na eksempre fu a profeiti Yeremia. A ben e frede di Yehovah gi en a wroko fu go preiki. Yeremia taki: „Mi no sabi srefisrefi fa fu taki. Mi na wan boi ete” (Yer. 1:6). Fa a kisi dek’ati fu go preiki? A ben kisi krakti fu den sani di Yehovah ben taigi en. Yeremia e taki: „A boskopu fu Gado de leki wan faya na ini mi ati èn na ini mi bonyo. Mi kon weri fu hori en gi misrefi” (Yer. 20:8, 9). A tru taki Yeremia ben musu preiki na ini wan muilek kontren, ma a boskopu di a ben musu tyari gi den sma gi en a dek’ati di a ben abi fanowdu fu man du a wroko fu en.

4. San na a bakapisi te wi e leisi Gado Wortu èn e denki dipi fu en? (Kolosesma 1:9, 10)

⁴ Te Kresten abi krakti fanowdu, dan den e kisi a krakti dati fu den sani di skrifi na ini Gado Wortu. Di Paulus ben skrifi a brifi gi a gemeente na ini Kolose, dan a taki dati te den brada nanga sisa ben o kon sabi moro bun san na a wani fu Yehovah, dan dati ben o yepi den fu ’abi bun bakapisi nanga ala san den e du’. Na so den ben o ’tyari densrefi na wan fasi di Yehovah feni bun’. (Leisi Kolosesma 1:9, 10.) Wan prenspari sani di den futuboi fu Yehovah e du, na taki den e preiki a bun nyunsu. Sobun, te wi e leisi Gado Wortu èn e denki dipi fu en, dan a bribi di wi abi na ini Yehovah o kon moro tranga èn wi o ferstan moro bun fu san ede a prenspari fu preiki a Kownukondre boskopu gi trawan.

5. Fa wi kan leisi èn studeri Bijbel moro bun?

⁵ Efu wi wani kisi wini trutru fu Gado Wortu, dan wi no musu hasti wisrefi te wi e leisi Bijbel, te wi e studeri, èn te wi e denki dipi fu den sani di wi leisi. Teki yu ten te yu e leisi. Efu yu leisi wan vers di muilek fu ferstan, dan teki a ten fu ondrosuku en. Gebroiki a buku Ondrosuku Bijbel moro fini​—Gi Yehovah Kotoigi, fu leri moro fu a vers dati. Te yu e teki a ten fu studeri, dan yu o de seiker taki den sani di yu e leri fu Gado Wortu na tru tori (1 Tes. 5:21). O moro yu e bribi san Bijbel e leri, o moro yu o lobi fu prati san yu leri nanga trawan.

SREKA BUN GI A PREIKIWROKO

6. Fu san ede wi musu sreka bun gi a preikiwroko?

⁶ Efu yu sreka bun gi a preikiwroko, dan yu no o frede tumsi fu taki nanga tra sma. Yesus ben yepi den disipel fu en fu sreka bun, fosi a seni den go na ini a preikiwroko (Luk. 10:1-11). Fu di den disipel ben e du san den ben leri fu Yesus, meki den ben man du furu bun sani èn den ben e prisiri trutru.​—Luk. 10:17.

7. Fa wi kan sreka gi a preikiwroko? (Luku a prenki.)

⁷ Fa wi kan sreka gi a preikiwroko? Wi musu prakseri san wi wani taki èn baka dati wi musu taki en nanga wi eigi wortu. Wan tra sani di kan yepi wi, na te wi e prakseri tu noso dri fasi fa sma na ini wi kontren ben kan piki wan aksi di wi poti gi den èn wi kan prakseri tu fa wi ben o piki a sma. Te wi e du disi, dan wi no o frede fu taki nanga sma, wi o de rustig èn wi o man taki switi nanga den.

8. Soleki fa na agersitori fu Paulus e sori, dan fu san ede wi kan taki dati Kresten de leki prapi fu kleidoti?

⁸ Na apostel Paulus ben taigi den Kresten brada nanga sisa fu en sortu frantwortu den abi na ini a preikiwroko. A taigi den: „Wi abi a gudu disi na ini prapi fu klèidoti” (2 Kor. 4:7). San na a gudu disi? A gudu disi na a wroko di wi abi fu preiki a Kownukondre boskopu di kan kibri sma libi (2 Kor. 4:1). San na den prapi fu kleidoti? Den prapi fu kleidoti na den futuboi fu Gado di e preiki a bun nyunsu gi trawan. Na ini a ten fu Paulus, bisnisman ben e gebroiki prapi fu tyari prenspari sani soleki nyan, win nanga moni go na tra presi. Na so a de tu taki Yehovah gi wi a frantwortu fu preiki a bun nyunsu di prenspari srefsrefi. Sobun, Yehovah kan gi wi a krakti di wi abi fanowdu fu tan preiki a bun nyunsu.

BEGI YEHOVAH FU GI YU DEK’ATI

9. San wi kan du te wi e frede libisma? (Luku a prenki.)

⁹ Son leisi wi kan frede libisma. San kan yepi wi fu no frede libisma moro? Poti prakseri na san den apostel begi Gado di sma taigi den taki den no musu preiki moro. Den no ben frede èn den no stop preiki. Na presi fu dati, den begi Yehovah fu yepi den so taki den ben man ’tan taki fu a wortu fu en sondro frede’. Wantewante Yehovah piki a begi fu den (Tori 4:18, 29, 31). Te wi e frede son leisi fu preiki gi sma, dan wi musu begi Yehovah tu fu yepi wi. Aksi Yehovah fu yepi yu fu kon abi moro lobi gi libisma so taki yu no e frede fu ferteri sma a bun nyunsu.

10. Fa Yehovah e yepi wi fu de en Kotoigi? (Yesaya 43:10-12)

¹⁰ Yehovah teki wi leki en Kotoigi èn a pramisi taki a o gi wi dek’ati. (Leisi Yesaya 43:10-12.) Poti prakseri na fo fasi fa a o du dati. A foswan, na taki Yesus de nanga wi awinsi o ten wi e preiki a bun nyunsu (Mat. 28:18-20). A di fu tu, na taki Yehovah gi son engel a frantwortu fu yepi wi (Openb. 14:6). A di fu dri, na taki Yehovah e gi wi en santa yeye di e yepi wi fu memre den sani di wi leri (Yoh 14:25, 26). A di fu fo, na taki Yehovah gi wi brada nanga sisa di e horbaka gi wi. Fu di Yehovah nanga den brada nanga sisa fu wi e yepi wi, meki wi kan tan preiki a bun nyunsu sondro fu frede.

WI MUSU FITI WISREFI ÈN WI MUSU ABI WAN BUN DENKI FU SMA

11. Fa wi kan feni moro sma te wi de na ini a preikiwroko? (Luku a prenki.)

¹¹ Yu e firi brokosaka fu di yu no man feni furu sma na den oso? Efu dati de so, dan aksi yusrefi: ’Pe den sma di e tan na ini mi kontren de nownow?’ (Tori 16:13) ’Den de na wroko noso den go na foto fu bai sani?’ Efu dati de so, dan yu denki taki yu o man feni moro sma te yu e du stratiwroko? Wan brada di nen Joshua e taki: „Mi feni okasi fu preiki gi sma te mi ben e waka psa den wenkri pe sma lobi bai sani, noso na presi pe sma lobi parkeer den wagi.” Boiti dati, en nanga en wefi Bridget feni moro sma na oso te den ben e go preiki fosi neti tapu èn te sonde bakadina.​—Ef. 5:15, 16.

12. Fa wi kan kon sabi san sma e bribi noso nanga san den e broko den ede?

¹² Efu na a bigin a sma no wani arki a boskopu, dan pruberi fu kon sabi san a e bribi noso nanga san a e broko en ede. Te Joshua nanga Bridget e bigin wan takimakandra, dan den e gebroiki na aksi na fes’sei fu wan fu den traktaat fu wi. Fu eksempre, te den e gebroiki a traktaat di nen Fa yu e si a Bijbel?, dan den e taki: „Son sma e si Bijbel leki wan buku di e kon fu Gado, ma tra sma no feni taki dati de so. Fa yu e prakseri fu a tori?” Te den bigin a takimakandra na so wan fasi, dan nofo tron a sma wani taki go doro.

13. Fa wi kan abi bun bakapisi na ini a preikiwroko awinsi sma no e arki wi? (Odo 27:11)

¹³ Wi kan abi bun bakapisi na ini a preikiwroko awinsi sma no e arki wi. Fu san ede wi kan taki dati? Fu di wi du san Yehovah nanga en Manpkin taigi wi fu du. Wi go preiki (Tori 10:42). Awinsi wi no feni nowan sma fu preiki gi, noso awinsi sma no wani arki a boskopu fu wi, tòg wi kan de nanga prisiri fu di wi sabi taki wi P’pa na hemel breiti nanga wi.​—Leisi Odo 27:11.

14. Fu san ede wi kan de nanga prisiri te wan tra preikiman feni wan sma na ini wi kontren di wan sabi moro?

¹⁴ Wi kan de nanga prisiri tu te wan tra preikiman feni wan sma na ini wi kontren di wani sabi moro. Wan leisi, A Waktitoren ben agersi a wroko di wi e du nanga a suku di sma e suku wan pkin di lasi. Furu sma e du muiti fu feni a pkin disi èn den e suku na a wan presi baka a trawan. Te wan sma feni a pkin, dan a no en w’wan e prisiri, ma ala sma di ben e suku e prisiri. Na so a de tu taki ala sma na ini a gemeente e yepi fu feni nyun disipel. Wi abi ala sma na ini a gemeente fanowdu fu preiki a bun nyunsu gi ala sma na ini a kontren èn wi alamala e prisiri te wan sma di wani sabi moro e kon na den komakandra.

SORI MORO LOBI GI YEHOVAH NANGA TRA SMA

15. San o yepi wi fu du a preikiwroko nanga moro prisiri? (Mateyus 22:37-39) (Luku a prenki tapu a .)

¹⁵ Te wi e tan hori na prakseri taki a preikiwroko na wan moi fasi fa wi kan sori taki wi lobi Yehovah nanga tra sma, dan dati o yepi wi fu du a preikiwroko nanga moro prisiri. (Leisi Mateyus 22:37-39.) Prakseri fa Yehovah o breiti te a e si taki wi e du a wroko di a gi wi. Prakseri tu fa sma o breiti te den e bigin studeri Bijbel nanga wi. Boiti dati, no fergiti taki den wan di e arki a boskopu fu wi èn e besroiti fu dini Yehovah o man libi fu têgo.​—Yoh. 6:40; 1 Tim. 4:16.

16. Fa wi kan de nanga prisiri na ini a preikiwroko awinsi wi no man kmoto na ini wi oso? Gi wan tu eksempre.

¹⁶ Yu na wan sma di no man kmoto na ini yu oso fu di yu e siki noso fu wan tra reide ede? Efu dati de so, dan luku san yu man du fu sori taki yu lobi Yehovah nanga tra sma. Na a ten fu a COVID-19 siki di ben panya na heri grontapu, Samuel nanga en wefi Dania no ben man kmoto na ini den oso. Na ini den muilek pisi ten dati den ben e preiki gi sma nanga yepi fu telefon, den ben e skrifi brifi gi sma èn den ben e hori Bijbelstudie nanga yepi fu Zoom. Samuel ben e preiki gi den sma di a ben e miti na a poli pe a ben e kisi datrayepi fu di a ben abi kanker. Samuel e taki: „Te hebi tesi e miti wi, dan wi kan frede, wi kan kon weri èn a kan muilek gi wi fu hordoro. Dati meki wi musu de nanga prisiri te wi e du wi diniwroko gi Yehovah.” Na ini a srefi pisi ten disi, Dania fadon èn a no ben man kmoto na bedi dri mun langa. Baka dati a ben musu gebroiki wan rolstoel siksi mun langa. Dania e taki: „Mi e pruberi fu du ala san mi man na ini a situwâsi fu mi. Mi ben man preiki gi wan at’oso zuster di ben kon yepi mi na oso èn sosrefi gi sma di ben e tyari sani kon na wi oso. Nanga yepi fu telefon, mi ben abi bun takimakandra tu nanga wan uma di ben e wroko na ini wan bedrijf di e seri apparaat gi den at’oso.” Aladi Samuel nanga Dania no ben man du so furu na ini a situwâsi fu den, tòg den ben e du ala san den man èn dati ben e gi den prisiri.

17. Fa wi kan kisi wini efu wi e du den sani di kari na ini na artikel disi?

¹⁷ Pruberi fu du ala den sani di kari na ini na artikel disi. Wi kan agersi ibriwan fu den sani dati nanga den sani di wi abi fanowdu te wi wani meki wan kuku. Te wi e gebroiki ala den sani dati fu meki a kuku, dan a kuku o switi. Na so a de tu taki te wi e du ibriwan fu den sani di kari na ini na artikel disi, dan wi no o tweifri na wisrefi èn wi no o frede sma. Na presi fu dati wi o du a preikiwroko nanga moro prisiri.