Noiti no gwe libi na anbegi fu Yehovah

1. Fa a libi de gi den sma na ini a tru anbegi èn san den no wani du noiti?

NA INI a ten disi sma de di e anbegi Yehovah makandra èn den e du furu bun sani. Den de na ini a tru anbegi di abi milyunmilyun sma di e libi na ini trutru freide èn na ini wánfasi. Den sma di e anbegi Yehovah noiti no wani tapu fu anbegi en. Den wani tu taki so furu sma leki a kan e kon abi freide nanga Yehovah èn nanga trawan.

2. San moi so fu a tru anbegi?

² A moi fu si taki na anbegi fu Yehovah e gi a pipel fu en na okasi fu de na ini freide èn na ini wánfasi, aladi den e libi na ini na ogri grontapu fu Satan pe sma no lobi makandra (1 Yoh. 5:19; Openb. 12:12). A lob’ati Gado fu wi e si fa a grontapu disi e pori sma, ma a e sorgu taki den futuboi fu en abi a dyaranti taki sani o waka bun nanga den. Na so fasi den kan tan dini en nanga prisiri. A Wortu fu Gado e taki dati a tru anbegi na wan presi pe sma kan go „kibri” èn wan „dyari di e kisi furu watra” (Yes. 4:6; 58:11). Fu di Yehovah blesi den wan di de na ini a tru anbegi, meki den de koloku èn den no e frede taki ogri o miti den na ini den muilek lasti dei disi.​—Yes. 54:14; 2 Tim. 3:1.

3. Fa Yesaya kapitel 65 kon tru na ini owruten?

³ Yehovah meki a profeiti Yesaya ferteri fa a libi ben o de gi den wan di de na ini a tru anbegi. Yu kan leisi san a ferteri na ini Yesaya kapitel 65, di ben kon tru fu a fosi leisi na ini 537 Fosi Krestes. Na a ten dati, Dyu di ben abi berow ben kmoto na ini katibo na Babilon èn den drai go baka na a kondre fu den. Yehovah blesi a pipel fu en èn a yepi den fu meki Yerusalem di ben kisi pori, tron wan moi foto baka. A yepi den tu fu seti a tempel baka di ben de a moro prenspari presi pe sma ben e anbegi Yehovah na ini Israel.​—Yes. 51:11; Sak. 8:3.

4. Fa Yesaya 65 kon tru na ini a ten disi?

⁴ A di fu tu leisi di a profeititori fu Yesaya kon tru, ben de na ini 1919 di den disiten anbegiman fu Yehovah kmoto na ini katibo na Babilon a Bigiwan. Baka dati, a tru anbegi bigin seti na heri grontapu. Fayafaya Kownukondre preikiman seti furu gemeente èn den sma na ini den gemeente ben e sori den fasi fu Krestes. Man nanga uma di fosi ben e du ogri sani èn di ben e libi wan morsu libi, ben „kisi nyun fasi fu tron sma di de leki fa Gado wani” (Ef. 4:24). A no de fu taki dati furu fu den blesi di Yesaya ben taki fu den o kon tru na ini a nyun grontapu di e kon. Ma nownow kba wi e kisi furu wini fu di wi de na ini a tru anbegi. Meki wi go luku fa a tru anbegi disi abi krakti na wi tapu èn fu san ede wi no musu gwe libi en noiti.

FA DEN SMA NA INI A TRU ANBEGI E FIRI

5. Soleki fa Yesaya 65:13 e sori, dan fa a libi fu den anbegiman fu Gado de?

⁵ Wi e nyan bun èn wi e kisi krakti baka. A profeititori fu Yesaya e sori krin taki a libi fu den sma di e anbegi Gado de heri tra fasi leki a libi fu den sma di no e du dati. (Leisi Yesaya 65:13.) Yehovah e gi den anbegiman fu en ala san den abi fanowdu fu man tan bun mati fu en. Wi abi en santa yeye, a Wortu fu en, èn sosrefi bogobogo yeye n’nyan so taki wi kan ’nyan, dringi, èn prisiri’. (Luku Openbaring 22:17.) Ma a libi de heri tra fasi gi den wan di no e anbegi Yehovah. Bijbel e taki dati den ’de nanga angri, watra e kiri den, èn den e kisi syen’. Den sma disi no sabi Gado.​—Amos 8:11.

6. San Yoèl 2:21-24 e taki fu wan tu fu den blesi di Yehovah gi wi?

⁶ Na ini a profeititori fu en, Yoèl e taki fu prenspari sani soleki karu, win, nanga olèif-oli, fu sori taki Yehovah e gi a pipel fu en ala san den abi fanowdu, sosrefi rai fu Bijbel (Yoèl 2:21-24). A e du dati nanga yepi fu Bijbel, den buku fu wi, a website fu wi, den gemeente konmakandra, den kring konmakandra, nanga den kongres. Wi kan kisi wini fu den sani disi ibri dei èn na so wi o firi taki wi nyan bun èn taki wi kisi krakti baka.

7. San e meki wi firi bun na ini wi ati? (Yesaya 65:14)

⁷ Wi o de tevrede. A pipel fu Gado kan „bari fu prisiri” fu di den de nanga tangi gi san Yehovah e du gi den. (Leisi Yesaya 65:14.) Den tru tori nanga den pramisi na ini Gado Wortu e gi wi dek’ati. Boiti dati wi abi wan trutru howpu fu di Krestes dede gi wi. Den sani disi e meki wi firi bun na ini wi ati. Te wi e taki fu den sani disi nanga wi Kresten brada nanga sisa, dan dati e gi wi prisiri trutru.​—Ps. 34:8; 133:1-3.

8. San na tu prenspari sani fu a tru anbegi?

⁸ Tu prenspari sani fu a tru anbegi, na a lobi nanga a wánfasi di de na mindri a pipel fu Gado. Te wi e luku fa den futuboi fu Gado „de wán trutru”, dan dati e yepi wi fu ferstan fa a libi o de na ini a nyun grontapu pe sma o abi moro lobi nanga wánfasi (Kol. 3:14). Wan dopu sisa e ferteri san a si di a miti Yehovah Kotoigi fu a fosi leisi. A e taki: „Mi no ben sabi fa fu de koloku, mi no ben de koloku srefi na ini mi eigi famiri. A fosi leisi di mi si fa sma ben e sori trutru lobi gi makandra, na di mi miti Yehovah Kotoigi.” Efu wan sma wani de koloku trutru, dan a musu kon na ini a tru anbegi. Awinsi san a grontapu disi e denki fu Yehovah en futuboi, den abi wan bun nen na Yehovah èn na ala sma di e anbegi en.​—Yes. 65:15.

9. San no o de moro, soleki fa Yesaya 65:16, 17 e pramisi?

⁹ Den o firi bun èn den no o broko den ede. Yesaya 65:14 e taki dati den wan di no wani kon na ini a tru anbegi e ’bari fu di den ati e hati, iya, den e bari krei fu di den lasi-ati krinkrin’. Ma fa a de nanga ala den sani di meki taki a pipel fu Gado e pina èn e sari? Te fu kba wi „no o prakseri” den sani dati moro èn „[Gado] no o si moro fa [wi] e pina”. (Leisi Yesaya 65:16, 17.) Yehovah o tyari wan kba kon na den problema fu wi èn te fu kba wi no o memre srefi fa den problema dati ben e meki wi firi.

10. Fu san ede yu breiti taki yu de na ini na organisâsi fu Yehovah? (Luku a prenki.)

¹⁰ Srefi na ini a ten disi wi e firi moro bun te wi de na den Kresten konmakandra pe wi no abi fu poti prakseri na den problema fu na ogri grontapu disi di e gi wi stress. Te wi e sori den fasi di a yeye fu Gado e meki sma kisi, soleki lobi, prisiri, freide, switifasi, nanga a safr’ati, dan wi e yepi wi brada nanga sisa tu fu no broko den ede (Gal. 5:22, 23). Wi breiti srefsrefi taki wi de na ini na organisâsi fu Yehovah. Den sma di e tan na ini a tru anbegi o si fa Gado o meki „nyun hemel nanga wan nyun grontapu” soleki fa a pramisi.

11. Fa a tru anbegi di Gado seti abi krakti na wi tapu soleki fa Yesaya 65:18, 19 e sori?

¹¹ Wi o de nanga tangi èn wi o prisiri. Yesaya e ferteri moro fara fu san ede wi abi ala reide fu ’breiti srefisrefi èn fu prisiri’ na ini a tru anbegi. Na Yehovah seti a tru anbegi disi. (Leisi Yesaya 65:18, 19.) Dati meki wi kan ferstan fu san ede Yehovah e gebroiki wi fu yepi sma fu gwe libi den organisâsi fu a grontapu disi, di no e yepi den fu kon sabi den tru tori fu Bijbel. Wi breiti nanga den blesi di wi e kisi fu di wi de na ini waarheid èn wi e angri fu ferteri sma fu den sani dati.​—Yer. 31:12.

12. Fa den pramisi di skrifi na Yesaya 65:20-24 e meki yu firi èn fu san ede?

¹² Wi breiti tu nanga a howpu di wi abi fu di wi de na ini a tru anbegi. Prakseri ala den sani di wi o si èn du na ini a nyun grontapu fu Gado. Bijbel e pramisi: „Noiti moro a o de so, taki wan nyunyun pikin . . . libi wan tu dei nomo. Sma o libi bun langa.” Wi o ’bow oso èn wi srefi o tan na ini. Wi o prani droifidyari èn wi srefi o nyan fu en’. Wi no o „wroko tranga fu soso” fu di ’Yehovah o blesi’ wi. A e pramisi taki wi o libi wan koloku libi sondro fu frede taki ogri o miti wi. Bijbel e taki dati ’fosi wi kari en’ a o sabi kba san wi abi fanowdu èn a o „gi ala libisani san den e angri fu kisi”.​—Yes. 65:20-24; Ps. 145:16.

13. Soleki fa Yesaya 65:25 e sori, dan sortu kenki sma o tyari kon na ini den libi te den e bigin dini Yehovah?

¹³ Den o lobi freide èn ogri no o miti den. A santa yeye fu Gado yepi furu sma di ben e du ogri sani fosi fu tyari bigi kenki kon na ini den libi. (Leisi Yesaya 65:25.) Den du tranga muiti fu tapu nanga den takru fasi fu den (Rom. 12:2; Ef. 4:22-24). A no de fu taki dati den futuboi fu Gado na sondu sma ete, èn fu dati ede wi o tan meki fowtu. Ma Yehovah tyari „ala sortu sma” kon na wan di lobi en èn di lobi makandra èn fu dati ede den abi trutru freide nanga wánfasi (Tit. 2:11). Na almakti Gado w’wan ben man du a wondru disi.

14. Fa na ondrofenitori fu wan brada e sori taki Yesaya 65:25 e taki san tru?

¹⁴ A tru taki sma man kenki den fasi fu den? Luku na ondrofenitori disi. Wan yonguman di ben koti strafu difrenti leisi kba di a ben abi 20 yari, ben e libi wan yayolibi èn a ben e du ogri-ati sani. A ben koti strafu fu di a ben f’furu oto, a ben go f’furu na sma oso, èn a ben du tra seryusu ogri. A ben lobi feti. Di a kon yere den tru tori fu Bijbel fu a fosi leisi èn a bigin go na den konmakandra fu Yehovah Kotoigi, dan a besroiti san a ben o du nanga en libi. A ben o anbegi Yehovah makandra nanga den tra futuboi fu en. Baka di a dopu, a ben gwenti prakseri Yesaya 65:25 fu di a ben feni taki a tekst dati ben abi fu du nanga en. A ben de leki wan lew fu di a ben e du ogri sani, ma a kon de leki wan pkin skapu now fu di a lobi suku freide.

15. Fu san ede wi wani gi trawan wan kari fu kon tu na ini a tru anbegi, èn fa wi kan du dati?

¹⁵ Yesaya 65:13 e bigin nanga den wortu disi: „A Moro Hei Masra Yehovah taki.” Na a kba fu vers 25 den wortu disi skrifi: „Na so Yehovah taki.” Den pramisi fu en e kon tru ala ten (Yes. 55:10, 11). A tru anbegi seti kba. Yehovah seti wan famiri fu anbegiman di de tra fasi leki iniwan tra famiri. Fu di wi de na ini a famiri fu en, meki wi abi freide èn wi no e frede taki ogri o miti wi na ini a grontapu disi di lai nanga ogridu (Ps. 72:7). Dati meki wi wani yepi so furu sma leki wi man fu tron anbegiman fu Yehovah. Wi kan du disi te wi e du muiti fu meki disipel.​—Mat. 28:19, 20.

FA WI KAN YEPI SMA FU KON NA INI A TRU ANBEGI

16. San kan yepi sma fu kon na ini a tru anbegi?

¹⁶ Ibriwan fu wi kan du wan sani fu hari sma kon na ini a tru anbegi. Dati meki wi musu teki na eksempre fu Yehovah. A no e dwengi sma fu kon na ini na organisâsi fu en. Na presi fu dati a e „hari sma kon” na en na wan switi fasi (Yoh. 6:44; Yer. 31:3). Te ret’ati sma e kon sabi den moi fasi fu Yehovah, dan noti kan tapu den fu kon moro krosbei na en. Fa den moi fasi fu wi èn a fasi fa wi e tyari wisrefi kan yepi wi fu hari sma kon na ini a tru anbegi?

17. Fa wi kan hari sma kon na ini a tru anbegi?

¹⁷ Wan fasi fa wi kan hari sma kon na ini a tru anbegi, na te wi e sori switifasi gi den Kresten brada nanga sisa fu wi. Te nyun sma e kon na den gemeente konmakandra fu wi, dan wi wani taki den firi neleki den nyun sma di ben kon na den konmakandra na ini Korente fu owruten. Den sma dati ben taki: „Gado de trutru na un mindri” (1 Kor. 14:24, 25; Sak. 8:23). Dati meki wi musu tan gi yesi na a rai di Bijbel e gi fu „libi bun nanga tra sma”.​—1 Tes. 5:13.

18. San kan hari sma kon na a organisâsi fu wi?

¹⁸ Ala ten wi musu pruberi fu si wi Kresten brada nanga sisa soleki fa Yehovah e si den. Dati meki wi no musu tan poti prakseri na den swakifasi fu den. Na presi fu dati wi musu poti prakseri na den bun fasi fu den, fu di den no o abi den swakifasi fu den moro te fu kba. Efu wi abi pkinpkin trobi, dan wi kan lusu den trobi dati nanga lobi efu ala ten wi e ’sori switifasi gi makandra èn efu wi abi sari-ati nanga makandra’. Wi musu ’gi makandra pardon tu nanga wi heri ati’ (Ef. 4:32). Na so sma di wani firi a lobi dati tu o wani kon na ini a tru anbegi.a

TAN NA INI A TRU ANBEGI

19. (a) Soleki fa a faki „Den gwe ma den kon baka” e sori, dan san son sma taki baka di den drai kon baka na ini a tru anbegi? (b) San wi musu besroiti fu du? (Luku a prenki.)

¹⁹ Wi e warderi a tru anbegi di Yehovah seti gi wi. A moi moro leki oiti bifo èn noiti ete so furu anbegiman fu Yehovah ben de na ini. Meki wi tan sori taki wi e warderi a tru anbegi di Yehovah seti gi wi. Iniwan sma di wani kisi krakti baka, di de tevrede, di no wani bruya, èn di wani abi a dyaranti taki sani o waka bun nanga en, musu kon na ini a tru anbegi èn a no musu gwe libi en noiti. Ma hori na prakseri taki Satan e du ala san a man fu kori wi so taki wi gwe libi a tru anbegi disi (1 Petr. 5:8; Openb. 12:9). Wi no musu meki a kisi wi. Meki wi du tranga muiti fu sorgu taki a tru anbegi e tan moi, e tan krin, èn e tan wan presi pe freide de.