STUDIE-ARTIKEL 19
SINGI 22 A Kownukondre seti kaba—Meki a kon!
San wi sabi fu a fasi fa Yehovah o krutu sma na ini a ten di e kon?
„Yehovah . . . no wani taki wan sma lasi libi.”—2 PETR. 3:9.
SAN WI O LERI
Wi kan de seiker taki te Yehovah o krutu sma na ini a ten di e kon, dan a o du san reti èn san fiti.
1. Fu san ede wi kan taki dati wi e libi na ini span ten?
WI E libi na ini span ten! Ibri dei wi e si fa Bijbel profeititori e kon tru. Fu eksempre, wi e si taki „a kownu fu noordsei” nanga „a kownu fu zuidsei” e strei nanga makandra fu di den ala tu wani tiri grontapu (Dan. 11:40). Wi e si taki den futuboi fu Gado e preiki a bun nyunsu fu Gado Kownukondre na heri grontapu èn taki milyunmilyun sma besroiti fu dini Yehovah (Yes. 60:22; Mat. 24:14). Boiti dati, wi e kisi bogobogo yeye n’nyan „na a reti ten”.—Mat. 24:45-47.
2. Fu san wi kan de seiker, ma san wi musu hori na prakseri?
2 Yehovah e tan yepi wi fu ferstan moro bun sortu prenspari sani o psa heri esi (Odo 4:18; Dan. 2:28). Wi kan de seiker taki te a bigi banawtu bigin, dan wi o sabi ala san wi musu sabi fu man tan hordoro èn fu man tan na ini wánfasi na ini a muilek ten dati. Ma te a abi fu du nanga a ten di e kon, dan wi musu hori na prakseri taki wan tu sani de di wi no sabi. Na ini na artikel disi, wi o luku fosi fu san ede wi kenki san wi ben taki fu wan tu fu den sani di o psa. Baka dati wi o luku wan tu fu den sani di wi sabi fu a ten di e kon èn fu a fasi fa Yehovah o du sani.
SAN WI NO SABI
3. Soleki fa wi ben e taki fosi, dan san ben o psa nanga den sma di no ben e bribi na ini Gado, te a bigi banawtu bigin èn fu san ede wi ben e denki so?
3 Fosi, wi ben e taki dati te a bigi banawtu bigin, dan okasi no o de moro gi sma fu poti bribi na ini Gado so taki den kan psa Armagedon libilibi. Wi ben e taki dati fu di wi ben e bribi taki ibri sani di psa na a ten fu a Frudu ben e prenki wan sani di ben o psa na ini a ten fu wi. Fu eksempre, wi ben e taki dati neleki fa nowan sma ben man go na ini na ark baka di Yehovah tapu a doro, na so nowan sma o man poti bribi na ini Yehovah fu man kisi ferlusu te a bigi banawtu bigin.—Mat. 24:37-39.
4. Fu san ede wi no e taki moro dati ala den sani di psa na a ten fu a Frudu o kon tru na wan moro bigi fasi na ini a ten disi? Ferklari dati.
4 Wi abi leti fu taki dati iniwan sani di psa na a ten fu a Frudu e prenki wan sani di o psa na ini a ten di e kon? Nôno. Fu san ede? Fu di Bijbel no e taki dati.a A tru taki Yesus ben agersi „a ten fu Noa” nanga a ten te a Manpkin fu libisma kon. Ma a no ben taki dati ala sani di psa na ini a ten fu Noa, soleki di Gado ben tapu a doro fu na ark, ben o kon tru na wan moro bigi fasi na ini a ten di e kon. Ma disi no wani taki dati wi no man leri wan tu sani fu a tori fu Noa èn fu a Frudu.
5. a) Fa Noa sori taki a ben abi bribi? (Hebr. 11:7; 1 Petr. 3:20) (b) Fu san ede wi kan taki dati a preikiwroko di Noa ben e du, na a srefi leki a preikiwroko di wi e du na ini a ten disi?
5 Di Noa yere a boskopu fu Yehovah di ben de leki wan warskow, dan a bow na ark fu sori taki a ben abi bribi. (Leisi Hebrewsma 11:7; 1 Petrus 3:20.) Na so a de tu taki sma di yere a bun nyunsu fu Gado Kownukondre musu du san den leri fu sori taki den abi bribi (Tori 3:17-20). Petrus kari Noa „wan preikiman fu retidu” (2 Petr. 2:5). Ma soleki fa wi si na ini na artikel na fesi, dan wi no sabi efu Noa ben seti sani fu preiki gi ibri sma na heri grontapu fosi a Frudu kon. Na ini a ten disi wi e meki muiti fu preiki gi sma na heri grontapu èn wi e du dati fayafaya. Ma awinsi fa wi e meki muiti, tòg wi no o man preiki gi ibri sma fosi a kba kon. Fu san ede?
6-7. Fu san ede wi no o man preiki a bun nyunsu gi ala sma na grontapu fosi a kba kon? Ferklari dati.
6 Prakseri san Yesus ben taki fu a preikiwroko fu wi. A ben taki dati a bun nyunsu ben o preiki „gi sma na heri grontapu, so taki sma fu ala kondre kan yere dati” (Mat. 24:14). Na ini a ten disi, a profeititori dati kon tru na wan moro bigi fasi. A Kownukondre boskopu e preiki na ini moro leki 1000 tongo. Èn nanga a yepi fu a website fu wi, jw.org, bun furu sma na heri grontapu kan kon sabi a bun nyunsu fu Gado Kownukondre.
7 Ma Yesus ben taigi den disipel fu en tu taki den no ben o „kaba preiki na ala den foto”, noso taki den no ben o preiki gi ala sma, fosi Yesus kon (Mat. 10:23; 25:31-33). A sani disi di Yesus taki abi fu du tu nanga a ten fu wi. Na ini a ten disi, milyunmilyun sma e libi na presi pe wi no man preiki fri. Boiti dati, hondrohondro beibi e gebore ibri miniti. Wi e du ala san wi man fu preiki a bun nyunsu gi sma fu „ala kondre, lo, [nanga] tongo” (Openb. 14:6). Ma san wi sabi, na taki wi no o man preiki a bun nyunsu gi ibri sma na heri grontapu fosi a kba kon.
8. San wi ben kan aksi wisrefi te a abi fu du nanga a fasi fa Yehovah o krutu sma na ini a ten di e kon? (Luku den prenki.)
8 Ma now wi ben kan aksi wisrefi a sani disi: Fa a de nanga den sma di kande no o kisi na okasi fu yere a bun nyunsu fosi a bigi banawtu bigin? Fa Yehovah nanga en Manpkin di a gi a frantwortu fu krutu libisma, o krutu den sma disi? (Yoh. 5:19, 22, 27; Tori 17:31) A thema tekst fu na artikel disi e taki dati Yehovah „no wani taki wan sma lasi libi”. Na presi fu dati, a wani taki „ala sma musu kisi na okasi fu sori berow” (2 Petr. 3:9; 1 Tim. 2:4). Aladi wi sabi den sani disi, tòg Yehovah no taigi wi ete fa a o krutu sma di noiti no kisi na okasi fu kon sabi a bun nyunsu. A no de fu taki dati Yehovah no abi fu ferteri wi san a du kba noso san a o du.
Fa Yehovah o krutu den wan di kande no o kisi na okasi fu yere a bun nyunsu fosi a bigi banawtu bigin? (Luku paragraaf 8)c
9. San Yehovah meki wi kon sabi na ini Bijbel?
9 Na ini a Wortu fu en, Yehovah meki wi kon sabi wan tu fu den sani di a o du. Fu eksempre, Bijbel e taigi wi taki Yehovah o gi „sma di no du san reti” wan opobaka. Disi na den sma di no kisi na okasi fu kon sabi a bun nyunsu so taki den ben kan kenki den fasi fu den (Tori 24:15; Luk. 23:42, 43). Ma a sani disi e meki tra prenspari aksi opo kon.
10. Sortu tra aksi e opo kon?
10 A de so taki ala den sma di o dede na a ten fu a bigi banawtu o dede fu ala ten èn taki howpu no o de gi den fu kisi wan opobaka? Bijbel e sori krin san o psa nanga den sma di ben e gens Yehovah krinkrin. Yehovah nanga den legre fu en o pori den sma disi èn den no o kisi wan opobaka (2 Tes. 1:6-10). Ma fa a de nanga tra sma, fu eksempre, den wan di o dede fu di den kon siki, fu di den kisi mankeri, noso fu di tra sma kiri den? (Preik. 9:11; Sak. 14:13) A kan taki sonwan fu den sma disi de na ini a grupu fu den „sma di no du san reti” èn di o kisi wan opobaka na ini a nyun grontapu? Fu taki en leti, wi no sabi.
SAN WI SABI
11. San o bepaal fa Gado o krutu sma na Armagedon?
11 Te a abi fu du nanga a ten di e kon, dan a tru taki wi sabi difrenti sani. Fu eksempre, wi sabi taki a fasi fa sma ben libi nanga den salfu brada fu Krestes o bepaal sortu krutu den o kisi (Mat. 25:40). Den o kisi krutu leki skapu fu di den horbaka gi den salfuwan èn gi Krestes. Wi sabi tu taki sonwan fu den salfu brada fu Krestes o de na grontapu ete baka te a bigi banawtu bigin. Den o go na hemel syatu fosi Armagedon bigin. Solanga wan tu fu den brada fu Krestes de ete na grontapu, ret’ati sma o abi na okasi fu horbaka gi den èn gi a wroko di den e du (Mat. 25:31, 32; Openb. 12:17). Fu san ede a prenspari fu sabi den sani disi?
12-13. San son sma o du te den si taki „Babilon a Bigiwan” kisi pori? (Luku den prenki.)
12 Srefi baka te a bigi banawtu bigin, a kan taki son sma di e si taki „Babilon a Bigiwan” kisi pori, o memre taki Yehovah Kotoigi ben taki fu a sani disi langa ten kba. Yu denki taki sonwan fu den sma di e si taki „Babilon a Bigiwan” kisi pori, o poti bribi na ini Yehovah?—Openb. 17:5; Esek. 33:33.
13 Na dati ben psa na ini Egepte na a ten fu Moses. Memre taki „furu sma fu tra kondre” gwe libi Egepte makandra nanga den Israelsma (Eks. 12:38). Kande sonwan fu den sma disi bigin poti bribi na ini Yehovah di den si taki den Tin Rampu kon na tapu a pipel, soleki fa Moses ben taki. Efu wan srefi sortu sani ben o psa baka te Babilon a Bigiwan kisi pori, dan wi ben o mandi taki den sma dati kisi ferlusu syatu fosi Armagedon kon? Kwetkweti! Wi wani de leki wi P’pa na hemel di de „wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki”.b—Eks. 34:6.
Baka te a bigi banawtu bigin, a kan taki son sma di e si taki „Babilon a Bigiwan” kisi pori, o memre taki Yehovah Kotoigi ben taki fu a sani disi langa ten kba. (Luku paragraaf 12-13)d
14-15. A de so taki a ten te wan sma dede noso a presi pe a e tan o bepaal efu a o kisi têgo libi? Ferklari dati. (Ps. 33:4, 5)
14 Ma son leisi, a kan taki wan sma e taki: „A ben o moro bun efu a famiriman fu mi dede fosi a bigi banawtu, so taki howpu kan de gi en fu kisi wan opobaka.” A no de fu taki dati den sma di e taki so e suku a bun fu a famiriman fu den. Ma a no a ten te a sma dede o bepaal efu a o kisi wan opobaka. Yehovah na a moro bigi Krutuman. Ala ten a e krutu sma na wan reti fasi. (Leisi Psalm 33:4, 5.) Wi kan abi a fertrow taki „a sma di e krutu heri grontapu” o du san reti.—Gen. 18:25.
15 Wi kan ferstan tu fu san ede a no a ten te wan sma dede noso a presi pe a e tan o bepaal efu a o kisi têgo libi. Yehovah noiti ben o krutu milyunmilyun sma leki „bokoboko”, soso fu di den e libi na ini kondre pe noiti den no kisi na okasi fu kon sabi a Kownukondre boskopu (Mat. 25:46). A ret’ati Krutuman fu heri grontapu e broko en ede moro nanga den sma dati leki fa wi e du dati. Wi no sabi fa Yehovah o du sani na a ten fu a bigi banawtu. Kande wan tu fu den sma disi o kisi na okasi fu kon leri sabi Yehovah, fu poti bribi na ini en, èn fu teki a sei fu en te a o meki sma na heri grontapu kon sabi a nen fu en.—Esek. 38:16.
Yu denki taki sonwan fu den sma di o si taki „Babilon a Bigiwan” kisi pori, o poti bribi na ini Yehovah?
16. San wi kon sabi fu Yehovah? (Luku a prenki.)
16 Fu di wi e studeri Bijbel, meki wi kon sabi taki Yehovah lobi libisma. A gi a Manpkin fu en leki srakti-ofrandi so taki wi alamala kan abi a howpu fu libi fu têgo (Yoh. 3:16). Wi alamala e firi a lobi fu Yehovah (Yes. 49:15). A sabi a nen fu ibriwan fu wi. Fu taki en leti, a sabi wi so bun taki awinsi wi dede, a kan meki wi baka fu di a sabi iniwan pkinpkin sani fu wi èn sosrefi ibri sani di wi ben sabi (Mat. 10:29-31). A no de fu taki dati wi abi bun reide fu de seiker taki wi lob’ati P’pa o krutu ibri sma na a yoisti fasi fu di a koni, fu di a lobi retidu, èn fu di a abi sar’ati.—Yak. 2:13.
Wi kan abi a fertrow taki Yehovah o krutu ibri sma na a yoisti fasi fu di a koni, fu di a lobi retidu, èn fu di a abi sar’ati (Luku paragraaf 16)
17. Fu san wi o taki na ini a tra artikel?
17 Now di wi e ferstan den sani disi moro bun, dan wi e si taki a preikiwroko fu wi prenspari srefsrefi. Fu san ede wi kan taki dati? Èn san e meki taki wi e tan preiki a bun nyunsu fayafaya? Na ini a tra artikel, wi o luku den piki tapu den aksi disi finfini.
SINGI 76 Fa yu e firi?
a Efu yu wani sabi fu san ede a kenki disi tyari kon, dan luku na artikel „Na so yu ben wani en” na ini A Waktitoren fu 15 maart 2015, blz. 7-11.
b Baka te Babilon a Bigiwan kisi pori, dan ala den futuboi fu Yehovah o abi fu sori efu den lobi Gado trutru te Gog fu Magok o kon feti nanga a pipel fu Yehovah. Iniwan sma di e horbaka gi a pipel fu Gado baka te Babilon a Bigiwan kisi pori, o abi fu sori tu efu den lobi Yehovah trutru.
c SAN WI E SI TAPU A PRENKI: Dri prenki di e sori fu san ede a kan taki wi no o man preiki gi ala sma na heri grontapu: (1) Wan uma di e libi na ini wan kondre pe sma mag abi wán spesrutu bribi nomo, (2) wan trowpaar di e libi na ini wan kondre pe a regering no e gi pasi taki wi preiki a bun nyunsu gi sma, èn (3) wan man di e libi na ini wan farawe kontren pe wi no man doro so makelek.
d SAN WI E SI TAPU A PRENKI: Wan yongu uma di gwe libi waarheid e memre san a ben leri fu a pori di „Babilon a Bigiwan” o kisi. A e kenki prakseri èn a e drai go baka na en p’pa nanga m’ma di de Kotoigi. Efu den sortu sani disi e psa, wi wani de leki wi P’pa na hemel di abi sar’ati nanga swit’fasi èn wi wani prisiri taki a sma di ben sondu drai kon baka na a tru Gado.