1924​—Wán hondro yari psa

DEN BOW WAN RADIO STATION

Moro leki wán yari langa, den brada na Betel ben du muiti fu bow a WBBR radio station na Staten Island, na ini New York City. Baka di den koti den bon di ben e gro tapu a pisi gron, den bow wan bigi oso gi den wrokoman èn wan tra gebow gi den apparatuur di den ben o abi fanowdu gi a radio station. Di a wroko disi ben kba, dan den brada bigin bai den apparatuur di ben de fanowdu fu meki den radio programa fu den. Ma den ben o kisi fu du nanga wan tu problema.

A ben muilek srefsrefi fu seti a moro prenspari antenne gi a station. Na antenne disi di ben langa 91 meter ben musu anga na mindri tu udu postu di ben langa 61 meter. A fosi leisi di den pruberi fu seti en, a no go. Ma den brada ben abi a fertrow taki Yehovah ben o yepi den, èn den ben abi bun bakapisi te fu kba. Calvin Prosser, di ben e yepi tu nanga a wroko disi ben taki: „Efu wi ben abi bun bakapisi a fosi leisi di wi pruberi fu seti en, dan wi ben o man meki bigi taki na wi srefi du en.” Na presi fu dati, den brada gi Yehovah a grani taki den ben man seti na antenne. Ma moro problema ben de ete.

Na a ten dati, a ben de wan nyun sani taki sma ben e meki radio programa èn a no ben makelek fu bai den apparatuur di ben de fanowdu. Ma den brada ben feni wan tweedehands 500-watt transmitter di wan sma drape ben meki. Den no bai wan mikrofon, ma den gebroiki a mikrofon fu wan telefon. Wan neti na ini februari, den brada besroiti fu test luku efu ala den sani disi ben e wroko. Den brada ben musu abi wan programa fu prei na radio, sobun, den singi Kownukondre singi. Wan fu den brada, Ernest Lowe, e ferteri wan lafutori fu san ben psa a dei dati. A taki dati di den ben e singi, dan Brada Rutherford bel den. A ben de na ini Brooklyn, sowan 25 kilometer moro fara, di a yere fa den brada ben e singi na radio.

Brada Rutherford taigi den: „Un tapu nanga a b’bari di unu e meki. Unu e singi leki pus’pusi.” Den brada ben e syen pkinso èn den kiri a transmitter wantewante. Ma now den ben sabi taki a radio ben e wroko èn taki den ben kan bigin meki radio programa.

Tapu 24 februari 1924 di a fosi radio programa fu den brada ben de fu yere na radio, dan Brada Rutherford taki dati na organisâsi ben o gebroiki a radio station „fu du a wroko di Krestes a Kownu ben gi den fu du”. A taki dati a station ben de „fu yepi ala sma fu kon ferstan Bijbel èn fu kon si taki wi e libi na ini wan prenspari ten”.

A fosi radio programa dati ben abi bun bakapisi. Na ini den 33 yari baka dati, WBBR ben e meki radio programa gi a pipel fu Yehovah.

DEN NO BEN FREDE FU KRUTU DEN KERKI FESIMAN

Na ini yuli 1924, den Bijbel Ondrosukuman hori wan kongres na ini Columbus, Ohio. Bijbel Ondrosukuman fu difrenti kondre na heri grontapu kon fu arki lezing na ini Arabiatongo, Ingrisitongo, Fransitongo, Doisritongo, Grikitongo, Hongariatongo, Italiatongo, Litoniatongo, Pôlsutongo, Rosiatongo, den Skandinafiatongo, nanga Ukrainitongo. Sonwan fu den lezing ben de fu yere na radio èn den brada aksi wan koranti drape fu skrifi artikel fu a kongres programa ibri dei.

Tapu fodewroko 24 yuli, moro leki 5000 sma di ben kon na a kongres go na ini a preikiwroko. Den prati sowan 30.000 buku èn den bigin dusundusun Bijbelstudie. A Waktitoren kari a dei disi „a moro prisiri dei fu a kongres”.

Tapu freida 25 yuli, di Brada Rutherford ben e hori wan lezing, dan a leisi wan dokumenti di ben e krutu den kerki-fesiman. A dokumenti ben taki dati den politiekman, den kerki fesiman, nanga den bisnisman ben e „tapu sma fu leri den tru tori fu a Kownukondre di Gado o gebroiki fu blesi libisma”. A dokumenti ben taki moro fara taki den man disi „ben e horbaka gi a Volkenbond èn taki den ben feni taki ’Gado ben e gebroiki na organisâsi dati fu tiri grontapu’”. Den Bijbel Ondrosukuman ben o abi dek’ati fanowdu fu preiki a boskopu disi gi den sma.

Bakaten, wan artikel na ini A Waktitoren taki dati a kongres na ini Colombus tranga a bribi fu a grupu brada nanga sisa disi di ben de fayafaya. A kongres ben gi den dek’ati fu preiki aladi den ben e kisi gens. Leo Claus di ben de na a kongres, e taki: „Baka a kongres wi ben de fayafaya fu prati a boskopu na ini a kontren fu wi.”

Na ini oktober, den Bijbel Ondrosukuman prati milyunmilyun kopi fu a traktaat De geestelijkheid aangeklaagd. A traktaat disi ben abi a boskopu di Brada Rutherford ben leisi fu krutu den kerki-fesiman. Na ini a pkin foto Cleveland, Oklahoma, Frank Johnson ben kba prati den traktaat 20 miniti fosi tra preikiman ben o kon teki en nanga wagi. A no ben man tan wakti den na strati, fu di wan tu man fu a foto no ben lobi a wroko di a ben e du èn den ben e suku en. Dati meki Brada Johnson besroiti fu go kibri na ini wan kerki krosbei. Di a si taki a kerki ben leigi, dan a libi kopi fu a traktaat disi na ini a Bijbel fu a domri èn na ibri sdonpresi. A du disi es’esi. Fu di a ben abi pkinso ten ete, meki a go na ete tu kerki èn drape a du a srefi sani.

Frank hasti ensrefi go baka na a presi pe a ben musu miti den brada. A go kibri baka wan tankstation aladi a ben e tan luku efu den man di ben e suku en ben e kon. Den man disi rèi psa, ma den no si en. Syatu baka di den gwe, dan den tra brada nanga sisa di ben e preiki krosbei, kon teki Frank èn den rèi gwe.

Wan fu den brada e taki: „Di wi ben e gwe libi a kontren drape, dan wi rèi psa den dri kerki. Sowan 50 sma ben e tnapu na dorosei fu ibriwan fu den kerki. Wan tu fu den sma ben e leisi a traktaat, trawan ben e hori en na loktu fu sori a domri. A no de fu taki dati wi ben kmoto fu drape biten. Wi taigi wi Gado Yehovah tangi taki a ben yepi wi fu kon sabi fa fu prati a boskopu sondro taki den feanti fu wi ben kisi wi.”

DEN BIJBEL ONDROSUKUMAN NA INI TRA KONDRE E PREIKI SONDRO FREDE

Den Bijbel Ondrosukuman na ini tra kondre, ben e preiki sondro frede tu. Na a noordsei fu Fransikondre, Józef Krett ben preiki gi Pôlsusma di ben kon wroko drape na ini den mijn. A brada disi ben musu hori wan lezing di ben nen „Heri esi den dedewan o kisi wan opobaka”. Di den brada nanga sisa prati den kari gi den sma fu a foto, dan wan priester fu a kontren drape warskow den sma fu en kerki fu no go na a lezing. Ma na a sani disi meki taki moro leki 5000 sma go arki a lezing èn srefi a priester ben de drape. Brada Krett aksi a priester fu ferklari fu san ede a ben e bribi den sani di a ben e bribi, ma a weigri fu du dati. Baka a lezing, Brada Krett gi den sma ala den buku di a ben abi na en fu di den ben e angri trutru fu kon sabi Gado Wortu moro bun.​—Amos 8:11.

Brada Claude Brown ben go na Afrika fu go preiki a bun nyunsu na ini a kondre di wi sabi now leki Gana. Den lezing di a ben hori èn den buku di a ben libi gi furu fu den sma drape, yepi fu panya a waarheid es’esi na ini a kondre dati. John Blankson di ben e studeri fu tron wan apotheker, ben go arki wan fu den lezing fu Brada Brown. Heri esi a kon si taki a ben feni a waarheid. John e taki: „A waarheid meki mi firi so koloku èn mi ben e taki fu en nanga furu fu den sma di mi ben e miti na a skoro pe mi ben e kisi leri fu tron apotheker.”

Wan dei, John go na wan Anglikan kerki fu taki nanga a priester fu a leri di e taki dati Gado na dri sma na ini wán. John ben du disi fu di a ben kon si taki a leri dati no ben e kruderi nanga Bijbel. A priester yagi en gwe èn a bari: „Yu a no wan Kresten, yu na fu Didibri. Gwe fu dyaso!”

Di John doro oso, a skrifi wan brifi gi a priester fu gi en wan kari fu kon na wan konmakandra fu sori den sma drape fu san ede den kan bribi na ini a leri di e taki dati Gado na dri sma na ini wán. A priester taigi John fu go na a kantoro fu a hoofdmeester fu a skoro pe a ben e kisi leri fu tron apotheker. A hoofdmeester aksi en efu trutru na en ben skrifi a brifi gi a priester.

John piki en: „Iya, meneer, na mi.”

A hoofdmeester taigi John taki a ben musu skrifi ete wan brifi fu aksi a priester pardon. Dati meki John skrifi:

„Priester, a leriman fu mi taigi mi fu skrifi wan brifi fu aksi yu pardon èn mi de klarklari fu du dati efu yu o agri taki yu e leri sma falsi leri.”

A hoofdmeester no ben man bribi san mi skrifi èn a aksi mi: „Blankson, na disi yu wani skrifi gi a priester?”

„Iya, Meneer. Na dati nomo mi kan skrifi gi en.”

„Den o puru yu na skoro. Efu na so yu e taki nanga wan priester fu wan kerki di lanti e horbaka gi, dan mi no denki taki yu o man tan wroko dyaso.”

„Ma Meneer, . . . te yu e gi wi les èn wi no man ferstan son sani, dan wi e poti aksi gi yu tòg?”

„Iya, dati tru.”

„Wel, Meneer, na precies dati psa. A man ben e leri wi sani fu Bijbel èn mi poti wan aksi gi en. Efu a no man piki na aksi, dan fu san ede mi musu skrifi wan brifi fu aksi en pardon?”

Den no puru Blankson fu a skoro. Èn a no ben seni a brifi tu fu aksi a priester pardon.

DEN BIJBEL ONDROSUKUMAN BEN DE FAYAFAYA FU GO DORO NANGA A WROKO

Disi na san A Waktitoren ben taki fu a wroko di na organisâsi ben du a yari dati: „Wi kan agri nanga David di ben taki: ’Yu o gi mi krakti fu go na feti’ (Ps. 18:39). A yari disi gi wi furu dek’ati fu di wi si fa Yehovah yepi wi nanga a wroko . . . Den getrow futuboi fu en e preiki a bun nyunsu nanga prisiri.”

Moro lati a yari dati, den brada besroiti fu bow ete wan radio station. A radio station dati bow na ini Chicago, na Amerkankondre. Den kari a nyun station disi WORTU. Disi leisi den brada ben e gebroiki wan 5.000-watt transmitter fu panya a Kownukondre boskopu na ini wan moro bigi kontren. A boskopu dati doro srefi te na Kanada.

Na ini 1925, Yehovah yepi den brada fu kon ferstan wan tu moi sani fu Openbaring kapitel 12. Den nyun sani di den brada nanga sisa ben kon sabi, meki taki sonwan fu den tapu fu dini Yehovah. Ma furu trawan ben breiti fu ferstan moro bun san ben psa na ini hemel èn fa dati ben o abi krakti tapu a pipel fu Gado na grontapu.