Yehovah e trowstu den wan di e firi brokosaka

1. Fa Yehovah e firi te a e luku den futuboi fu en?

SAN Yehovah e si te a e luku den futuboi fu en na grontapu? A e si te wi de koloku èn te wi e sari (Ps. 37:18). Te a e si taki wi e du ala san wi man fu dini en srefi te wi e firi brokosaka, dan a e prisiri srefsrefi. Ma san moro prenspari, na taki a de klarklari fu yepi wi èn fu trowstu wi.

2. San Yehovah e du gi den wan di e firi brokosaka èn fa wi kan kisi wini fu a fasi fa a e yepi wi?

² Psalm 147:3 e sori taki Yehovah e broko en ede nanga den wan di e firi brokosaka, neleki fa wan bun datra e broko en ede nanga wan sma di kisi mankeri. A tekst disi e sori fa Yehovah de klarklari fu yepi de wan di e firi brokosaka. San wi musu du efu wi wani kisi wini fu den someni fasi fa Yehovah e yepi wi? Luku na eksempre disi: Wan koni datra kan du furu fu yepi wan sma di kisi mankeri. Ma efu a sma wani kon betre, dan a musu du soifri san a datra e taigi en. Na ini na artikel disi, wi o luku san Yehovah e taigi den wan di e firi brokosaka èn wi o luku fa den sma disi kan fiti den rai fu en.

YEHOVAH E GI WI A DYARANTI TAKI WI WARTI GI EN

3. Fu san ede son sma e firi leki den no warti noti?

³ A sari fu si taki furu sma na ini a ten disi no lobi trawan. A sani disi kan meki taki den e libi takru nanga trawan èn den kan meki trawan firi leki den no warti noti. Wan sisa di nen Helena e taki: „Mi kweki na ini wan famiri di no ben e sori lobi. Mi p’pa ben de wan ogr’ati man èn ibri dei a ben e taigi mi taki mi no warti noti.” Kande a sani di miti Helen, miti yu tu. Kande sma libi takru tu nanga yu, kande den krutu yu doronomo, noso kande den meki yu firi leki yu no warti noti. Efu dati de so, dan kande a muilek gi yu fu bribi taki wan sma kan lobi yu trutru.

4. San Yehovah e pramisi wi, soleki fa Psalm 34:18 e sori?

⁴ Awinsi trawan ben libi takru nanga yu, tòg yu kan de seiker taki Yehovah lobi yu èn taki yu prenspari gi en. A „de krosbei fu den sma di las’ati”. (Leisi Psalm 34:18). Efu yu e firi „brokosaka”, dan hori na prakseri taki Yehovah si den bun fasi fu yu èn taki a hari yu kon na en (Yoh. 6:44). Fu di yu warti gi en, meki ala ten a de klarklari fu yepi yu.

5. San wi kan leri fu a fasi fa Yesus ben e libi nanga den sma di trawan ben e wiswasi?

⁵ Wi kan kon sabi fa Yehovah e firi te wi e poti prakseri na a eksempre fu Yesus. Di Yesus ben e du a diniwroko fu en na grontapu, dan a ben e poti prakseri na den sma di trawan ben e wiswasi èn a ben e sori sar’ati gi den (Mat. 9:9-12). Wan leisi, wan uma di ben abi wan seryusu siki, fasi den krosi fu Yesus fu di a ben e howpu taki a ben o kon betre baka. Di na uma du dati, dan Yesus trowstu en èn a prèise en fu di a ben abi bribi (Mark. 5:25-34). Yesus sori den srefi fasi fu en P’pa (Yoh. 14:9). Sobun, yu kan de seiker taki yu warti gi Yehovah èn taki a e si den bun fasi fu yu. A e si taki yu abi bribi èn a e si taki yu lobi en.

6. San yu kan du efu yu e firi leki yu no warti noti?

⁶ San yu kan du efu yu e firi leki yu no warti noti? Leisi Bijbel vers di kan gi yu a dyaranti taki yu warti gi Yehovah, èn denki dipi fu den vers datib (Ps. 94:19). No teki yusrefi gersi nanga trawan èn no tan poti prakseri na san yu no man du. Yehovah noiti no e ferwakti moro fu yu leki san yu man du (Ps. 103:13, 14). Efu sma ben du ogri nanga yu, dan a no yu fowtu. Hori na prakseri taki Yehovah o krutu den sma di e libi takru nanga trawan, ma a e yepi den wan di e firi brokosaka fu di sma du ogri nanga den (1 Petr. 3:12). Luku na eksempre fu Sandra. Di a ben pkin, sma du ogri nanga en. A e taki: „Mi e aksi Yehovah ibri dei fu yepi mi fu si misrefi neleki fa en e si mi.”

7. Fa wi kan gebroiki den sani di wi ondrofeni fu yepi tra sma?

⁷ Noiti no denki taki Yehovah no o man gebroiki yu fu yepi trawan. A gi yu a grani fu wroko makandra nanga en na ini a preikiwroko (1 Kor. 3:9). A musu fu de so taki den sani di yu ondrofeni na ini yu libi e meki en moro makelek gi yu fu ferstan den wan di e pina. Yu kan du furu fu yepi den sortu sma disi. Helen, di wi ben kari kba, kisi yepi fu trawan èn now en srefi man yepi trawan. A e taki: „Mi ben gwenti fu firi leki mi no warti noti. Ma Yehovah meki mi firi taki a lobi mi èn a e gebroiki mi fu yepi trawan.” Helen breiti srefsrefi taki a man dini leki gewoon pionier.

YEHOVAH WANI TAKI WI E BRIBI TAKI A GI WI PARDON

8. Sortu dyaranti wi e kisi na ini Yesaya 1:18?

⁸ Sonwan fu den futuboi fu Yehovah e firi brokosaka fu di den ben du sondu, awinsi na fosi den ben dopu noso baka di den dopu. Ma a bun te wi e hori na prakseri taki Yehovah lobi wi trutru èn taki a sorgu gi a lusu-paiman so taki wi kan kisi pardon fu den sondu fu wi. A no de fu taki dati a wani taki wi teki a kado disi di a gi wi. Yehovah e gi wi a dyaranti taki baka te wi „seti sani kon reti baka”c nanga en, a o gi wi pardon nanga en heri ati. (Leisi Yesaya 1:18.) Wi de nanga tangi trutru taki wi lob’ati P’pa, Yehovah, no e memre den fowtu di wi ben meki. Na a srefi ten, Yehovah noiti e fergiti den bun sani di wi du.​—Ps. 103:9, 12; Hebr. 6:10.

9. Fu san ede wi no musu tan prakseri den sondu di wi ben du fosi?

⁹ Efu yu e sari fu den sani di yu du na ini a ten di psa, dan poti prakseri na san yu e du now èn san yu o man du na ini a ten di e kon. Luku na eksempre fu na apostel Paulus. A ben ferfolgu den Kresten na wan ogr’ati fasi èn a ben winsi taki a no ben du dati. Ma a ben sabi taki Yehovah ben gi en pardon (1 Tim. 1:12-15). A de so taki a ben e tan prakseri den sondu di a ben du fosi? A no de fu taki dati Paulus weigri fu du dati neleki fa a no ben e tan prakseri den sani di a ben du fu man tron wan Fariseiman di ben abi biginen (Fil. 3:4-8, 13-15). Na presi fu dati, Paulus tan du a diniwroko fu en fayafaya èn a ben e luku go na fesi. Neleki Paulus, yu no man kenki san psa kba. Ma now yu kan prèise Yehovah èn yu kan meki taki a breiti nanga yu. Boiti dati, yu kan prakseri a moi tamara di a pramisi yu.

10. San wi kan du efu wi ben du hati sani nanga trawan?

¹⁰ Kande yu e firi brokosaka fu di yu ben du hati sani nanga trawan. San kan yepi yu? Du san yu man fu seti sani kon bun baka. No fergiti fu aksi pardon gi a sani di yu du (2 Kor. 7:11). Efu yu du hati sani nanga sma, dan aksi Yehovah fu trowstu den sma disi. A kan yepi yu nanga den sma dati fu tan dini en èn fu kon abi wan korostu firi.

11. San wi kan leri fu a profeiti Yona? (Luku a prenki na tapu a .)

¹¹ De klarklari fu leri fu den fowtu fu yu, èn meki Yehovah gebroiki yu na iniwan fasi fa a feni bun. Luku na eksempre fu a profeiti Yona. Na presi taki a go na Ninefei soleki fa Yehovah ben taigi en, a lowe go na a westsei fu Tarsis. Yehovah pir’ai gi Yona èn Yona leri fu a fowtu fu en (Yona 1:1-4, 15-17; 2:7-10). Ma Yehovah no tapu fu gebroiki Yona leki en profeiti. Gado taigi en ete wan leisi fu go na Ninefei, èn disi leisi Yona no draidrai fu gi yesi. Yona ben e sari taki a ben trangayesi Yehovah, ma disi no tapu en fu du san Yehovah ben aksi fu en.​—Yona 3:1-3.

YEHOVAH E TROWSTU WI NANGA YEPI FU EN SANTA YEYE

12. Fa Yehovah e trowstu wi te wan ogri sani psa nanga wi? (Filipisma 4:6, 7)

¹² Te wan ogri sani psa nanga wi, dan Yehovah e trowstu wi nanga yepi fu en santa yeye. Luku na eksempre fu Ron nanga Carol. Wan tumsi sari sani miti den. A manpkin fu den kiri ensrefi. Den e taki: „Wi ben psa hebi tesi kba, ma disi ben hebi srefsrefi. Furu neti wi no ben man sribi èn wi begi Yehovah fu yepi wi. Wi firi a freide di Filipisma 4:6, 7 e taki fu en.” (Leisi en.) Efu yu e sari fu di wan ogri sani miti yu, dan taigi Yehovah krin fa yu e firi. Yu kan taki nanga en o langa yu wani (Ps. 86:3; 88:1). Aksi Yehovah ibri leisi baka fu gi yu en santa yeye. Noiti a no o weigri fu gi yu dati.​—Luk. 11:9-13.

13. Fa a santa yeye fu Yehovah kan yepi wi fu tan anbegi en getrow? (Efeisesma 3:16)

¹³ Oiti yu ben de na ini wan muilek situwâsi di swaki yu so te taki yu no ben e firi fu du noti? Santa yeye kan gi yu krakti baka fu tan dini Yehovah getrow. (Leisi Efeisesma 3:16.) Luku san ben miti wan sisa di nen Flora. En nanga en masra ben e dini leki zendeling di en masra du hurudu. A sani disi meki taki den broko trow. Flora e taki: „Mi ben e sari srefsrefi èn heri dei mi ben e prakseri nomo san a ben du nanga mi. Mi begi Yehovah fu gi mi en santa yeye so taki mi ben kan hordoro. Yehovah trowstu mi èn aladi a ben hebi na a bigin, tòg mi kisi misrefi baka èn a yepi mi fu hordoro.” Flora e firi taki na Gado yepi en fu kon abi wan moro tranga bribi èn a de seiker taki a o yepi en ibri leisi te tesi miti en. Flora e taki dati den wortu na Psalm 119:32 e sori krin fa Yehovah yepi en. A vers e taki: „Mi o prisiri fu hori den wet fu yu, bika yu opo mi ati fu ferstan den.”

14. San wi musu du so taki a yeye fu Gado kan abi moro krakti na wi tapu?

¹⁴ Baka te yu aksi Yehovah fu gi yu en santa yeye, dan san yu musu du? Du sani di o meki a santa yeye abi moro krakti na yu tapu. Go na den konmakandra èn preiki gi trawan. Leisi Gado Wortu ibri dei fu furu yu ferstan nanga den prakseri fu Yehovah (Fil. 4:8, 9). Te yu e leisi bijbel, dan poti prakseri na den sma na ini Bijbel di ben kisi tesi èn di ben e denki dipi fu a fasi fa Yehovah yepi den fu hordoro. Sandra di wi ben kari kba ben abi en muilek fu di a ben kisi furu problema na ini en libi. A e taki: „A tori fu Yosef naki mi ati trutru. A ben kisi furu tesi èn sma ben du ogri nanga en. Tòg a no meki den sani dati pori a matifasi di a ben abi nanga Yehovah.”​—Gen. 39:21-23.

YEHOVAH E TROWSTU WI NANGA YEPI FU WI BRADA NANGA SISA

15. Fu suma wi kan kisi trowstu èn fa den kan du dati? (Luku a prenki.)

¹⁵ Te wi e firi brokosaka, wi brada nanga sisa kan ’trowstu wi trutru’ (Kol. 4:11). Wán fu den fasi fa Yehovah e sori taki a lobi wi trutru na taki a gi wi Kresten brada nanga sisa. Den kan trowstu wi te den e meki ten gi wi èn te den e arki wi te wi e taigi den fa wi e firi. Kande den e leisi wan Bijbel tekst gi wi fu gi wi dek’ati, noso kande den e begi nanga wid (Rom. 15:4). Son leisi, wan brada noso wan sisa kan memre wi fa Yehovah e denki èn dati kan yepi wi fu no las’ati. Tra fasi fa wi Kresten brada nanga sisa gwenti yepi wi te wi e firi brokosaka, na taki den e gi wi n’nyan so taki wi e firi moro bun.

16. San wi musu du son leisi fu man kisi yepi fu trawan?

¹⁶ Son leisi a de fanowdu taki wi e aksi trawan fu yepi wi. Wi brada nanga sisa lobi wi èn den wani yepi wi (Odo 17:17). Ma kande den no sabi fa wi e firi noso san wi abi fanowdu (Odo 14:10). Efu yu e firi brokosaka, dan yu kan taki nanga bun mati fu ferteri den fa yu e firi. Taigi den san den kan du fu yepi yu. Kande yu kan taki nanga wan noso tu owruman di yu man taki fri nanga den. Son sisa feni trowstu di den taki nanga wan tra lepi sisa.

17. San na wan tu problema di kan tapu wi fu kisi dek’ati èn san wi kan du?

¹⁷ Abi demakandra nanga yu brada nanga sisa. Kande yu e firi brokosaka so te taki yu no wani de makandra nanga trawan. A kan tu taki son leisi yu brada nanga sisa no e ferstan fa yu e firi, noso kande den taigi yu wan hati sani (Yak. 3:2). Tòg yu no musu hori yusrefi aparti fu yu brada nanga sisa, fu di Yehovah kan gebroiki den fu gi yu dek’ati. Wan owruman di nen Gavin e firi brokosaka doronomo fu di a depressief. A e taki: „Nofo tron mi no wani taki nanga den mati fu mi èn mi no wani de makandra nanga den.” Tòg Gavin e du muiti fu de makandra nanga den brada nanga sisa fu en. Èn nofo tron a e firi moro bun te a e du dati. Wan sisa di nen Amy e taki: „Den sani di miti mi e meki taki mi feni en muilek fu fertrow sma. Ma mi e leri fu lobi mi brada nanga sisa èn fu fertrow den neleki fa Yehovah e du dati. Mi sabi taki Yehovah breiti te mi e du dati, èn mi srefi e firi bun tu.”

DEN SANI DI YEHOVAH PRAMISI WI KAN TROWSTU WI

18. San wi kan ferwakti na ini a ten di e kon èn san wi kan du now?

¹⁸ Heri esi, Yehovah o puru iniwan sani di e meki wi firi brokosaka èn a o tyari wan kba kon tu na iniwan pen di wi abi (Openb. 21:3, 4). Na a ten dati, den sari sani di wi ondrofeni no o ’abi krakti na wi tapu moro’ (Yes. 65:17). Soleki fa wi si, dan nownow kba Yehovah e ’tai den soro di e hati wi’. Kisi wini fu den sani di Yehovah seti fu gi yu trowstu èn fu tyari ferlekti kon gi yu. No tweifri noiti taki „a e broko en ede nanga [yu]”.​—1 Petr. 5:7.