Leri fu denki leki Yehovah nanga Yesus

1-2. Fa wi musu lobi Yehovah èn fa Yesus sori dati?

„YU MUSU lobi Yehovah yu Gado nanga yu heri ati, nanga yu heri libi, nanga ala yu krakti èn nanga yu heri frustan” (Luk. 10:27). Yesus sori krin taki disi ben de a moro prenspari komando na ini a Wet di Gado ben gi Moses. Dati meki wi lobi Yehovah nanga ala san wi abi èn nanga a heri fasi fa wi de. Disi abi fu du nanga den sani di wi wani, den firi fu wi, nanga a krakti fu wi. A abi fu du tu nanga a fasi fa wi e gebroiki wi ferstan. A no de fu taki, dati noiti wi o man ferstan dorodoro fa Yehovah e denki. Ma Yesus e denki leki en P’pa. Dati meki te wi e ondrosuku „fa Krestes e denki”, dan dati o yepi wi fu kon ferstan fa Yehovah e denki.​—1 Kor. 2:16.

² Yesus ben lobi Yehovah nanga en heri ferstan. A ben sabi san Gado ben wani taki a du èn a ben abi a fasti besroiti fu du a wani fu en P’pa aladi a ben o pina. Fu di a wani fu en P’pa ben de a moro prenspari sani gi Yesus, meki a sorgu taki no wan-enkri sani puru en prakseri na dati.

3. San na apostel Petrus leri fu Yesus, èn sortu rai a gi den Kresten brada nanga sisa fu en? (1 Petrus 4:1)

³ Petrus nanga den tra apostel ben abi a grani fu de makandra nanga Yesus. Disi yepi den fu kon ferstan fa Yesus ben e denki. Di Petrus skrifi a fosi brifi fu en nanga yepi fu santa yeye, dan a gi den Kresten a rai fu abi a srefi denki leki Krestes so taki dati ben kan gi den krakti. (Leisi 1 Petrus 4:1.) Na ini a tekst disi, Petrus gebroiki wortu di ben abi fu du nanga srudati di ben e go na ini a feti nanga fetsani fu man kibri densrefi. Sobun, efu Kresten e leri fu denki leki Yesus, dan den o man kakafutu gi iniwan tesi di den e kisi èn a grontapu fu Satan no o man abi krakti na den tapu.​—2 Kor. 10:3-5; Ef. 6:12.

4. Fa na artikel disi kan yepi wi fu gi yesi na a rai fu Petrus?

⁴ Wi o poti prakseri na a fasi fa Yesus ben e denki, fu kon si fa wi kan denki leki en. Wi o luku fa wi kan (1) leri fu denki leki Yehovah, fu di disi o yepi wi fu abi a srefi denki leki trawan, (2) fa wi kan leri fu abi sakafasi, èn (3) fa begi kan yepi wi fu de nanga krin ferstan.

LERI FU DENKI LEKI YEHOVAH

5. Fa Petrus sori wan leisi taki a no ben e denki leki Yehovah?

⁵ Wan leisi, Petrus sori taki a no ben e denki leki Yehovah. Yesus ben taigi den apostel fu en taki a ben o abi fu go na Yerusalem pe sma ben o gi en abra na den kerki fesiman drape. Den ben o pina en, èn den ben o kiri en (Mat. 16:21). Petrus ben sabi taki Yesus ben de Mesias di ben o ferlusu a pipel fu Gado. Sobun, a kan taki a ben muilek gi Petrus fu bribi taki Yehovah ben o gi pasi taki sma kiri Yesus (Mat. 16:16). Dati meki Petrus tyari Yesus kon na wan sei èn a taigi en: „Masra, du yusrefi wan bun. A sani disi no o miti yu kwetikweti” (Mat. 16:22). Fu di Petrus no ben e denki leki Yehovah, meki a no ben e agri nanga Yesus.

6. Fa Yesus sori taki a ben e denki leki Yehovah?

⁶ Yesus ben sabi fa a en P’pa ben e denki èn a ben e denki leki en P’pa. Dati meki a taigi Petrus: „Komoto na mi tapu, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki” (Mat. 16:23). Yesus ben sabi taki efu a ben wani du a wani fu Gado, dan a ben o abi fu pina èn dede. Dati meki a no teki a rai fu Petrus, aladi a de krin taki Petrus ben wani pruberi fu yepi en. A sani disi leri Petrus taki a ben musu denki leki Yehovah. Disi na wan prenspari sani di wi srefi musu leri.

7. Fa Petrus sori bakaten taki a ben wani leri fu denki leki Yehovah? (Luku na tapu a kafti.)

⁷ Bakaten, Petrus sori taki a ben wani leri fu denki leki Yehovah. A ten ben doro taki sma di no ben de Dyu èn di no ben besnèi ben e tron Yehovah en pipel tu. Petrus ben musu go preiki gi Kornelius di no ben de wan Dyu. A ben de a foswan fu den sma dati di ben tron Kresten. Den Dyu no ben e moksi nanga sma di no ben de Dyu, sobun, a no e ferwondru wi taki Petrus ben musu kenki a denki fu en fu man preiki gi den sma dati. Di Petrus kon si fa Gado ben e denki fu sma di no de Dyu, dan a bigin denki tra fasi fu den sma disi. Dati meki di Kornelius seni kari en, a „ben de klarklari” fu go na en (Tori 10:28, 29). A preiki gi Kornelius nanga en osofamiri, èn den alamala teki dopu.​—Tori 10:21-23, 34, 35, 44-48.

8. Fa wi kan sori taki wi e denki leki Yehovah? (1 Petrus 3:8)

⁸ Wan tu yari baka dati, Petrus gi den Kresten brada nanga sisa fu en a rai fu „abi a srefi denki”. (Leisi 1 Petrus 3:8.) Wi kan abi a srefi denki leki wi Kresten brada nanga sisa te wi e leri fu denki leki Yehovah, soleki fa a Bijbel e leri wi dati. Fu eksempre, Yesus ben gi den bakaman fu en a rai fu poti a Kownukondre na a fosi presi na ini en libi (Mat. 6:33). Sobun, wan sma na ini yu gemeente ben kan besroiti fu bigin pionier noso fu dini Yehovah furuten na wan tra fasi. Wi no musu taigi a sma disi fu du ensrefi wan bun, ma na presi fu dati, wi musu taki bun sani fu a marki di a wani doro èn wi musu yepi en tu fu doro a marki dati.

ABI SAKAFASI

9-10. Fa Yesus sori taki a ben abi sakafasi?

⁹ A neti fosi den kiri Yesus, a leri Petrus nanga den tra apostel fa fu sori sakafasi. Wan pisi ten na fesi, Yesus ben seni Petrus nanga Yohanes fu go sreka sani gi a lasti leisi di a ben o nyan nanga den fosi a dede. A kan taki den ben musu sorgu tu gi wan beki nanga wan tu duku so taki den ben kan wasi den futu fosi den n’nyan. Ma sortuwan fu den apostel ben o sori sakafasi èn wasi den futu fu den trawan?

¹⁰ Yesus no draidrai fu du a wroko disi. A sori taki a ben abi sakafasi. Den apostel ben musu fu ferwondru fu si fa Yesus ben e du wan sani di futuboi ben gwenti du. Yesus puru en dyakti, a tai wan duku na en bere, a poti watra na ini a beki, dan a bigin wasi den futu (Yoh. 13:4, 5). Yesus wasi den futu fu ala den twarfu apostel. A kan taki a sani disi ben teki wan heri pisi ten. A wasi srefi den futu fu Yudas di ben o tori en bakaten. Ma tòg Yesus teki en ten fu du a wroko disi. Baka dati, a taigi den apostel: „Unu frustan san mi du gi unu? Unu e kari mi: ’Leriman’ nanga ’Masra’, èn unu abi leti, bika na dati mi de tu. Fu dati ede, efu mi wasi un futu aladi mi na Masra nanga Leriman, dan un musu wasi den futu fu makandra tu.”​—Yoh. 13:12-14.

11. Fa Petrus sori taki a ben leri fu sori sakafasi? (1 Petrus 5:5) (Luku a prenki.)

¹¹ Petrus ben leri fu a sakafasi di Yesus ben sori. Baka di Yesus drai go baka na hemel, dan Petrus dresi wan man di ben malengri sensi di a gebore (Tori 1:8, 9; 3:2, 6-8). A no de fu taki dati wan lo sma kon luku a sani disi di psa (Tori 3:11). Ma aladi Petrus ben gro kon na ini wan libimakandra pe sma ben lobi kisi grani, tòg a no ben wani taki sma gi en grani gi a sani di a du. Na presi fu dati, a taigi den sma fu prèise Yehovah nanga Yesus. A ben taigi den: „A man di unu e si dya èn di unu sabi, kon betre baka nanga yepi fu a nen fu Yesus èn fu di wi e bribi na ini a nen disi” (Tori 3:12-16). Bakaten, Petrus skrifi den Kresten taki den ben musu abi sakafasi. Den wortu fu en, e memre wi fa Yesus ben tai wan duku na en bere fu wasi den futu fu den apostel.​—Leisi 1 Petrus 5:5.

12. Fa wi kan tan du muiti fu sori sakafasi neleki Petrus?

¹² Neleki Petrus, wi kan tan du muiti fu sori sakafasi. Hori na prakseri taki te wan sma abi sakafasi, dan dati no abi fu du nomo nanga den sani di a e taki. A wortu di Petrus gebroiki gi sakafasi, abi fu du nanga a fasi fa wi e denki fu wisrefi èn fu trawan. Wi e du sani gi trawan fu di wi lobi Yehovah èn fu di wi lobi sma. Wi no e du sani gi trawan fu di wi wani taki sma prèise wi. Te wi de klarklari fu dini Yehovah nanga wi brada nanga sisa, srefi te sma no e si san wi e du, dan wi e sori taki wi abi trutru sakafasi.​—Mat. 6:1-4.

„DE NANGA KRIN FERSTAN”

13. San a wani taki fu „de nanga krin ferstan”?

¹³ San a wani taki fu „de nanga krin ferstan”? (1 Petr. 4:7) Te wi de nanga krin ferstan, dan wi o prakseri fa Yehovah e denki fu sani te wi e teki besroiti. Wi o hori na prakseri taki nowan-enkri sani prenspari moro leki a matifasi di a abi nanga Yehovah. Wi no o denki tumsi furu fu wisrefi, èn wi o hori na prakseri taki wi no sabi ala sani. Efu wi de nanga krin ferstan, dan wi o abi a gwenti fu begi Yehovah fu yepi fu kon sabi wi san na a moro bun sani fu du. Na so wi e sori taki wi e fertrow na en tapu.

14. Fa Petrus sori wan leisi taki a no ben e fertrow tapu Yehovah?

¹⁴ A lasti neti fosi Yesus dede, a gi den disipel fu en a warskow disi: „Tideneti un alamala o fadon te unu si san pasa nanga mi.” Petrus ben denki taki a ben tranga èn a piki Yesus: „Awansi ala den trawan o fadon te den si san pasa nanga yu, toku mi no sa fadon noiti!” A neti dati, Yesus taigi wan tu fu den disipel fu en: „Un tan na ai èn begi doronomo” (Mat. 26:31, 33, 41). Efu Petrus ben gi yesi na a rai di Yesus ben gi en wan pisi ten na fesi, dan kande a no ben o frede bakaten fu taki dati en na wan disipel fu Krestes. Na presi fu dati, a taki dati a no ben sabi Yesus, èn a ben e sari srefsrefi taki a ben meki a fowtu dati.​—Mat. 26:69-75.

15. Fa Yesus tan nanga krin ferstan a lasti neti di a ben de na grontapu leki libisma?

¹⁵ Yesus ben e fertrow tapu Yehovah nanga en heri ati. Aladi Yesus no ben abi sondu, tòg a ben abi a gwenti fu begi. A sani dati gi en dek’ati fu du a wani fu Yehovah (Mat. 26:39, 42, 44; Yoh. 18:4, 5). A no de fu taki dati Petrus noiti no fergiti taki Yesus ben begi furu leisi a lasti neti fu en libi na grontapu.

16. Fa Petrus sori taki a ben leri fu de nanga krin ferstan? (1 Petrus 4:7)

¹⁶ Te fu kba, Petrus leri fu begi moro èn fu fertrow moro tapu Yehovah. Di Yesus kisi wan opobaka, dan a gi Petrus nanga den tra apostel a dyaranti taki den ben o kisi santa yeye so taki den ben kan preiki a bun nyunsu. Ma Yesus aksi den fu tan na ini Yerusalem teleki a sani dati psa (Luk. 24:49; Tori 1:4, 5). San Petrus du aladi di a ben e wakti? Petrus nanga den tra Kresten brada nanga sisa „tan begi” (Tori 1:13, 14). Bakaten, di a skrifi a fosi brifi fu en, a gi den Kresten brada nanga sisa a rai fu de nanga krin ferstan, fu tan begi, èn fu fertrow tapu Yehovah. (Leisi 1 Petrus 4:7.) Petrus leri fu fertrow tapu Yehovah èn na so a ben man yepi den brada nanga sisa èn a tranga a bribi fu den.​—Gal. 2:9.

17. San wi musu tan du, awinsi wi e denki taki a makelek gi wi fu du son sani? (Luku a prenki.)

¹⁷ Efu wi wani de nanga krin ferstan, dan wi musu abi a gwenti fu begi Yehovah. Wi e ferstan taki wi musu tan begi Yehovah fu yepi wi, awinsi wi e denki taki a makelek gi wi fu du son sani. Dati meki te wi musu teki prenspari besroiti, dan a prenspari taki wi e begi Yehovah fu yepi wi, èn wi musu abi a fertrow taki a sabi san bun gi wi.

18. San o yepi wi fu denki leki Yehovah?

¹⁸ Wi de nanga tangi taki Yehovah meki wi na so wan fasi taki wi man sori den moi fasi fu en (Gen. 1:26). A no de fu taki dati wi no man sori den fasi fu Yehovah dorodoro (Yes. 55:9). Ma neleki Petrus, wi wani tan du muiti fu denki leki Yehovah, fu sori sakafasi, èn fu de nanga krin ferstan.