Yepi yu Bijbelstudie fu no frede fu tron wan futuboi fu Yehovah

1-2. (a) Fu san ede son Bijbelstudie e frede fu tron anbegiman fu Yehovah? (b) San wi o luku na ini na artikel disi?

YU BEN e frede fu tron wan Kotoigi fu Yehovah? Kande yu ben e frede taki den sma na yu wrokope, den mati fu yu, noso den famiriman fu yu ben o mandi nanga yu. Noso kande yu ben e denki taki noiti yu ben o man gi yesi na den wet fu Yehovah. Efu dati de so, dan yu sabi fa son Bijbelstudie e firi èn fu san ede a kan muilek gi den fu besroiti fu tron wan Kotoigi fu Yehovah.

² Yesus ben sabi taki den sortu sani disi ben kan tapu wan sma fu dini Yehovah (Mat. 13:20-22). Ma a tan pruberi fu yepi den wan di ben e frede fu tron bakaman fu en. Iya, nanga yepi fu den sani di a ben e du a sori den disipel fu en fa den ben kan yepi den sortu sma dati (1) fu kon sabi san ben e tapu den fu go na fesi, (2) fu kon abi moro lobi gi Yehovah, (3) fu poti Yehovah na a fosi presi, èn (4) fu kon sabi san den ben kan du te trawan ben e gens den. Fa wi kan gi leri na a fasi fa Yesus ben e du dati, te wi e gebroiki a Yu kan de koloku fu têgo!-buku fu yepi sma fu teki a besroiti fu tron wan anbegiman fu Yehovah?

YEPI YU BIJBELSTUDIE FU KON SABI SAN E TAPU EN FU DINI YEHOVAH

3. San ben e meki en muilek gi Nikodeimus fu tron wan bakaman fu Yesus?

³ Nikodeimus ben de wan prenspari fesiman fu den Dyu. Ma wan sani ben e meki muilek gi en fu tron wan bakaman fu Yesus. Siksi mun nomo baka di Yesus bigin nanga a diniwroko fu en, Nikodeimus ben si kba taki Yesus ben de a Mesias (Yoh. 3:1, 2). Ma Nikodeimus besroiti fu miti Yesus sondro taki tra sma ben sabi fu dati, fu di a „ben frede den Dyu” (Yoh. 7:13; 12:42). Kande a ben e frede taki a ben o lasi en posisi èn wan tu fu den gudu fu en efu a ben o tron wan disipel fu Yesus.a

4. Fa Yesus yepi Nikodeimus fu kon ferstan san Gado ben e ferwakti fu en?

⁴ Nikodeimus ben sabi a Wet, ma a ben abi yepi fanowdu fu kon ferstan san Yehovah ben e ferwakti fu en. Fa Yesus yepi en? Yesus ben de klarklari fu meki ten gi Nikodeimus, èn a taki nanga en na netiyuru srefi. Yesus ben taki krin san Nikodeimus ben o abi fu du fu man tron wan disipel fu en. A ben musu sori berow fu den sondu fu en, a ben musu dopu na ini watra, èn a ben musu poti bribi na ini a Manpkin fu Gado.​—Yoh. 3:5, 14-21.

5. Fa wi kan yepi wan Bijbelstudie fu kon sabi san e tapu en fu dini Yehovah?

⁵ Awansi wan Bijbelstudie sabi Bijbel bun, tòg a kan abi yepi fanowdu fu kon sabi san e tapu en fu dini Yehovah. Kande a wroko fu en e teki tumsi furu fu en ten, noso kande en famiri no wani taki a tron wan Yehovah Kotoigi. Sobun, meki ten fu yepi a studie fu yu. Kande yu kan aksi en fu go nyan wan sani nanga yu, noso kande un kan go sdon taki tori na wan presi. Te yu e du den sortu sani disi nanga en, dan kande yu o kon sabi en moro bun èn yu o man si sortu problema a abi. Gi yu Bijbelstudie dek’ati fu tyari den kenki kon di de fanowdu. Memre en taki a no yu a musu pruberi fu plisi, ma na Yehovah.

6. Fa yu kan yepi wan Bijbelstudie fu kisi dek’ati fu du san a e leri? (1 Korentesma 16:13)

⁶ Te wan Bijbelstudie de seiker taki Yehovah o yepi en fu du san reti, dan a no o frede fu du san a leri. (Leisi 1 Korentesma 16:13.) Wan Bijbel leriman de leki wan skoromeester noso wan skorojufrow. Te yu e prakseri a ten di yu ben de na skoro, dan sortu skoromeester yu ben lobi moro? Kande a ben de a sma di ben teki en ten fu yepi yu fu kon ferstan taki yu man du den sani di a e ferwakti fu yu. Na so a de tu taki wan bun Bijbel leriman no e leri en studenti nomo san Gado wani taki a du, ma a e yepi en tu fu de seiker taki Yehovah o yepi en fu tyari kenki kon na ini en libi. Fa yu kan tron so wan Bijbel leriman?

YEPI YU BIJBELSTUDIE FU KON ABI MORO LOBI GI YEHOVAH

7. Fa Yesus yepi den sma di ben e arki en fu kon abi moro lobi gi Yehovah?

⁷ Yesus ben sabi taki te wan sma lobi Gado, dan a o wani du san a leri. A ben gwenti leri den disipel fu en sani di ben o yepi den fu kon abi moro lobi gi den P’pa na hemel. Fu eksempre, a teki Yehovah gersi nanga wan man di e gi en pkin bun sani (Mat. 7:9-11). Sonwan fu den sma di ben e arki Yesus, kande no ben abi wan p’pa di ben lobi den so. Prakseri fa den ben musu fu firi di Yesus ferteri na agersitori fu wan lobi p’pa di ben breiti taki a boi fu en di ben du wan lo ogri, ben drai kon baka na oso. Den ben man si a lobi di Yehovah abi gi den pkin fu en na grontapu.​—Luk. 15:20-24.

8. Fa yu kan yepi wan Bijbelstudie fu kon abi moro lobi gi Yehovah?

⁸ Te yu abi a gwenti fu taki fu den moi fasi fu Gado, dan yu kan yepi a Bijbelstudie fu yu fu kon abi moro lobi gi Yehovah. Ibri leisi te yu e studeri, yu musu yepi a Bijbelstudie fu ferstan fa den sani di a leri e sori taki Yehovah lobi wi. Te yu e taki fu a lusu-paiman, dan yepi en fu ferstan san a lusu-paiman abi fu du nanga en (Rom. 5:8; 1 Yoh. 4:10). Te wan Bijbelstudie e ferstan o furu Yehovah lobi en, dan dati kan yepi en fu kon lobi Yehovah moro nanga moro.

9. San yepi wan man di nen Michael fu kenki en libi?

⁹ Luku a tori fu Michael, di e libi na Indonesia. A ben kweki na ini waarheid, ma a no dopu. Di a ben abi 18 yari, dan a go na wan tra kondre fu go wroko leki wan sma di e rèi truck. Bakaten a trow, ma a tan wroko na ini wan tra kondre farawe fu en wefi nanga en umapkin. Na a srefi ten, en wefi nanga en umapkin bigin studeri Bijbel èn den bigin fiti san den ben e leri. Baka di en m’ma dede, Michael drai go baka na a kondre fu en fu sorgu gi en p’pa èn a besroiti fu studeri Bijbel. Di Michael studeri a pisi di nen „Sortu tra sani yu kan leri” na ini les 27 fu a Yu kan de koloku fu têgo!-buku, dan den sani di a leri naki en ati trutru. Di a prakseri fa Yehovah ben musu fu sari fu si fa en Manpkin ben e pina, dan a bigin krei. A kon abi bigi warderi gi a lusu-paiman èn a sani dati yepi en fu kenki en libi èn fu teki dopu.

YEPI YU BIJBELSTUDIE FU POTI YEHOVAH NA A FOSI PRESI

10. Fa Yesus yepi den fosi disipel fu en fu poti Yehovah na a fosi presi? (Lukas 5:5-11) (Luku a prenki.)

¹⁰ Den fosi disipel ben kon si heri esi taki Yesus ben de a Mesias di Gado ben pramisi, ma den ben abi yepi fanowdu fu poti a diniwroko na a fosi presi na ini den libi. Petrus nanga Andreas ben de disipel wan pisi ten kba di Yesus gi den a kari fu du furuten diniwroko (Mat. 4:18, 19). Den disipel disi ben de fisman èn a bisnis fu den ben e drai bun. Soleki fa a sori, dan den ben e wroko makandra nanga Yakobus nanga Yohanes (Mark. 1:16-20). Di Petrus nanga Andreas „libi den fisinèt fu den”, dan a musu fu de so taki den seti sani fu sorgu gi na osofamiri fu den aladi den ben e wroko makandra nanga Yesus. San meki den poti Yehovah na a fosi presi? A tori na ini Lukas e ferteri wi taki Yesus ben du wan wondru di yepi den fu de seiker taki Yehovah ala ten ben o sorgu gi den efu den ben e poti en na a fosi presi.​—Leisi Lukas 5:5-11.

11. Fa wi kan gebroiki den sani di wi ondrofeni fu tranga a bribi fu wi Bijbelstudie?

¹¹ Wi no man du wondru neleki fa Yesus ben e du dati, ma wi kan ferteri trawan ondrofenitori di e sori fa Yehovah e horbaka gi den wan di e poti en na a fosi presi. Fu eksempre, yu sabi ete fa Yehovah yepi yu di yu bigin go na den konmakandra? Kande yu ben musu taigi a basi fu yu taki yu no ben o man wroko overuur moro, fu di dati ben o tapu yu fu go na den konmakandra. Ferteri a Bijbelstudie fu yu fa yu bribi kon moro tranga di yu si fa Yehovah yepi yu di yu poti en na a fosi presi.

12. (a) Fu san ede a bun fu tyari difrenti preikiman go na wi Bijbelstudie? (b) Fa yu kan gebroiki felem fu yepi yu Bijbelstudie fu poti Yehovah na a fosi presi? Gi wan eksempre.

¹² A bun te tra brada nanga sisa kan ferteri a studenti fu yu fa den tyari kenki kon na ini den libi fu man poti Yehovah na a fosi presi. Sobun, aksi difrenti brada nanga sisa fu go nanga yu na a Bijbelstudie. Aksi den fu ferteri fa den kon na ini waarheid èn san den du fu poti a diniwroko fu Yehovah na a fosi presi. Boiti dati, meki ten fu luku den felem fu den pisi „Sortu tra sani yu kan leri” noso „Tra sani di yu kan luku” makandra nanga yu Bijbelstudie. Den felem disi de fu feni na ini a Yu kan de koloku fu têgo!-buku. Fu eksempre, te yu e studeri les 37 èn te yu e luku a felem Yehovah o gi yu san yu abi fanowdu, dan taki fu a felem èn yepi yu Bijbelstudie fu kon si taki Yehovah o yepi en te a e poti a tru anbegi na a fosi presi na ini en libi.

LERI YU BIJBELSTUDIE SAN FU DU TE TRA SMA E GENS EN

13. Fa Yesus yepi den disipel fu en fu sabi san fu du te sma ben o gens den?

¹³ Yesus ben taigi den bakaman fu en ibri leisi baka taki den ben o kisi gens fu trawan, srefi fu famiriman (Mat. 5:11; 10:22, 36). Syatu fosi Yesus dede, a taigi den disipel fu en taki sma ben o wani kiri den fu di den ben e anbegi Yehovah (Mat. 24:9; Yoh. 15:20; 16:2). A gi den a rai fu luku bun na ini a diniwroko. Fu eksempre, a taigi den fu no hartaki nanga sma di ben e taki ogri fu a bribi fu den èn fu luku bun san den ben e taki èn ben e du.

14. Fa wi kan yepi wan Bijbelstudie fu sabi san fu du te a e kisi gens? (2 Timoteyus 3:12)

¹⁴ Wan fasi fa wi kan yepi wan Bijbelstudie fu sabi san fu du te a e kisi gens, na te wi e ferteri den san den kan ferwakti fu sma na wrokope, fu mati, èn fu famiriman. (Leisi 2 Timoteyus 3:12.) Son sma na wrokope kande o spotu a Bijbelstudie fu di a e pruberi fu du san Bijbel e leri. Tra sma, srefi famiriman, kande no o agri nanga san a e leri fu Bijbel. Wi musu meki den Bijbelstudie fu wi kon sabi den sani disi frukfruku kba. Disi o yepi den fu sabi san den musu taki noso du te trawan e gens den.

15. San kan yepi wan Bijbelstudie te a e kisi gens fu en famiri?

¹⁵ Efu yu Bijbelstudie e kisi gens fu en famiri, dan meki a prakseri fu san ede sonwan fu den famiriman fu en e mandi. Kande den feni taki sma kori yu, noso kande den e denki takru fu Yehovah Kotoigi. Srefi den famiri fu Yesus no ben breiti nanga san a ben e du (Mark. 3:21; Yoh. 7:5). Leri yu Bijbelstudie fu abi pasensi èn fu sori lespeki gi trawan, srefi gi den famiriman fu den.

16. Fa wi kan yepi wan Bijbelstudie fu ferteri trawan na wan lespeki fasi fu a bribi fu en?

¹⁶ Awinsi famiriman wani sabi moro fu a bribi fu wi, tòg a bun te wan Bijbelstudie no e ferteri den tumsi furu wantewante. Efu a e du dati, dan den famiriman fu en kan kon weri èn kande den no o wani taki moro nanga en fu den tori dati. Sobun, gi a Bijbelstudie fu yu dek’ati fu taki syatu nanga trawan fu a bribi fu en. Na so den famiriman o wani sabi moro fu Bijbel wan tra leisi (Kol. 4:6). Kande a kan aksi den famiriman fu en fu go na jw.org. Disi o yepi den fu kon sabi moro fu Yehovah Kotoigi te den wani dati, èn den srefi kan bepaal o furu den wan kon sabi.

17. Fa yu kan yepi wan Bijbelstudie fu piki den aksi di trawan abi fu Yehovah Kotoigi? (Luku a prenki.)

¹⁷ Kande yu kan gebroiki den artikel tapu jw.org di nen „Aksi di furu sma abi”, fu yepi yu Bijbelstudie fu kon sabi fa fu gi simpel piki te famiriman noso sma na wrokope e poti aksi gi en (2 Tim. 2:24, 25). Boiti dati, no fergiti fu poti prakseri na a pisi di nen „Son sma e taki” na ini a Yu kan de koloku fu têgo!-buku. Gi a Bijbelstudie dek’ati fu oefen fa a o ferklari gi sma san a e bribi now. Efu a de fanowdu, yepi en fu ferklari sani moro bun. Te yu e meki ten fu oefen nanga en, dan a o man ferteri trawan moro bun fu san ede a e bribi wan sani noso fu san ede a no e bribi wan sani.

18. Fa yu kan gi wan Bijbelstudie dek’ati fu go na ini a preikiwroko makandra nanga a gemeente? (Mateyus 10:27)

¹⁸ Yesus ben gi den disipel fu en a komando fu preiki a bun nyunsu gi sma. (Leisi Mateyus 10:27.) Te wan Bijbelstudie e bigin preiki oso fu oso, dan a o ondrofeni fa Yehovah e yepi en èn a o leri fu fertrow moro na En tapu. Fa yu kan yepi wan Bijbelstudie fu poti en leki marki fu go na ini a preikiwroko? Te wan bigi preikiwroko o du na ini a kontren fu yu, dan yepi a Bijbelstudie fu yu fu kon si san a musu du fu man tron wan preikiman. Ferteri en taki nofo tron a moro makelek fu bigin nanga a preikiwroko na den sortu okasi disi. Wan tra marki di a kan poti, na fu bigin hori lezing na den mindriwiki konmakandra. Te a e suku fu doro den marki dati, dan a o leri fu ferklari moro bun gi trawan san a e bribi.

SORI YU BIJBELSTUDIE TAKI YU ABI A FERTROW TAKI A WANI PLISI YEHOVAH

19. Fa Yesus sori den disipel fu en taki a ben abi a fertrow taki den ben wani plisi Yehovah, èn fa wi kan teki na eksempre fu en?

¹⁹ Fosi Yesus opo go na hemel, a ben taigi den disipel fu en taki den ben o de makandra baka wan dei. Den no ben e ferstan san Yesus ben e bedoel di a taki dati den ben o go na hemel. Ma tòg Yesus ben de seiker taki den ben wani plisi Yehovah (Yoh. 14:1-5, 8). A ben sabi taki den ben abi ten fanowdu fu ferstan son sani, soleki a howpu fu libi na hemel (Yoh. 16:12). Neleki Yesus, wi kan sori den Bijbelstudie fu wi taki wi abi a fertrow taki den wani plisi Yehovah.

20. Fa wan sisa na ini Malawi sori taki a ben abi a fertrow taki a Bijbelstudie fu en wani plisi Yehovah?

²⁰ Yu musu tan howpu taki a Bijbelstudie fu yu wani du san bun. Luku na eksempre fu Chifundo, wan sisa na ini Malawi. A ben bigin studeri a Yu kan de koloku fu têgo!-buku nanga wan yongu uma di nen Alinafe. A yongu uma disi ben de wan Lomsusma. Di den klari les 14, dan Chifundo aksi a Bijbelstudie efu a fiti taki sma e gebroiki popki na ini na anbegi fu den. Alinafe atibron èn a taki: „Na mi srefi musu bepaal dati!” Chifundo ben denki taki Alinafe ben o stop a studie. Ma a hori pasensi èn a tan studeri nanga Alinafe. A ben abi a fertrow taki Alinafe ben o ferstan te fu kba taki a no fiti fu gebroiki popki na ini na anbegi. Wan tu mun baka dati, di den ben e luku les 34, dan Chifundo poti na aksi disi gi en: „Fa den sani di yu leri fu Bijbel èn fu a tru Gado, Yehovah, yepi yu te nanga now?” Chifundo e ferteri san Alinafe piki en: „A kari someni moi sani, èn wán fu den na taki den Kotoigi no e du sani di Bijbel no feni bun.” Syatu baka dati, Alinafe tapu fu gebroiki popki na ini na anbegi fu en èn a teki dopu.

21. Fa wi kan yepi a Bijbelstudie fu wi fu teki a besroiti fu dini Yehovah?

²¹ Aladi Yehovah na a sma di „e meki sani gro”, tòg wi kan yepi wan Bijbelstudie fu go na fesi (1 Kor. 3:7). Wi no e leri en nomo san Gado wani taki a du, ma wi e du moro leki dati. Wi e yepi en fu kon lobi Yehovah nanga en heri ati èn wi e gi en dek’ati tu fu poti Yehovah na a fosi presi. Boiti dati, wi e leri en taki a kan de seiker taki Yehovah o yepi en te tra sma e gens en. Te wi e sori a Bijbelstudie fu wi taki wi abi a fertrow taki a wani plisi Yehovah, dan dati e gi en dek’ati fu teki a besroiti fu tron wan anbegiman fu Yehovah.