„Na Yehovah abi a feti”

Na ini 1999, a regering fu Fransikondre taki dati a Bijkantoro fu wi na ini Fransikondre ben musu pai belasting tapu den bijdrage di den ben kisi fu 1993 te go miti 1996. Wi ben feti gi wi reti na fesi den krutubangi na ini Fransikondre, ma den krutubangi na ini Fransikondre no ben gi wi na okasi fu sori taki den sani di den ben taki fu wi no tru. Baka di wi lasi a krutu-afersi na wan hei krutubangi, dan a regering teki moro leki fo nanga afu milyun euro (6.300.000 Amerkan dala) fu a bankrekening fu a bijkantoro. A wan-enkri fasi fa wi ben o man kisi a moni baka, na te wi ben o tyari a tori go na a Krutubangi fu Europa di e feti gi den reti fu libisma. Ma fosi den ben o luku a tori fu wi, den meki wi kon makandra nanga den afkati fu a regering fu Fransikondre èn wan uma di ben e teki presi gi a Krutubangi fu Europa. Wi ben musu luku efu wi ben man seti a tori fosi a go na krutu.

Wi ben e ferwakti taki a sma di ben e teki presi gi a Krutubangi fu Europa ben o aksi wi fu pai a regering fu Fransikondre pkinso fu a moni di lanti ben wani taki wi pai leki belasting. Ma wi ben e ferstan krin taki Yehovah no ben o feni en bun efu wi ben o pai a regering awinsi wán sensi nomo. Na den brada nanga sisa ben gi bijdrage fu horbaka gi a wroko di wi e du na heri grontapu. Sobun, a regering no ben abi reti tapu den bijdrage di den ben gi (Mat. 22:21). Ma tòg, wi go na a konmakandra fu sori taki wi e lespeki den seti fu a Krutubangi fu Europa.

A konmakandra ben hori na ini wan fu den moi kantoro fu a Krutubangi fu Europa. Wantewante di a konmakandra bigin, a sma di ben e teki presi gi a Krutubangi fu Europa taki dati Yehovah Kotoigi ben musu pai a regering fu Fransikondre pkinso fu a moni di lanti ben wani taki wi pai leki belasting. Ma Yehovah yepi wi nanga en santa yeye èn wi aksi a sma di e teki presi gi a Krutubangi fu Europa: „Yu sabi taki a regering teki fo nanga afu milyun euro fu wi bankrekening kba?”

A sma di ben e teki presi gi a krutubangi no ben feni a sani disi bun èn a atibron. Baka di den afkati fu a regering fu Fransikondre agri taki a regering ben teki moni fu wi, a sma di ben e teki presi gi a krutubangi bigin si sani tra fasi. Baka di a pir’ai gi den afkati, a tapu a konmakandra wantewante. Mi si taki Yehovah ben de nanga wi èn a sorgu taki a konmakandra waka bun. Wi ben breiti srefsrefi di wi ben e drai go baka na oso èn wi no ben man bribi san psa.

Tapu 30 yuni 2011, a ECHR besroiti taki wi wini a krutu-afersi. Den besroiti taki a regering fu Fransikondre no ben mag teki a moni fu wi èn taki den ben musu pai en baka nanga rente! A besroiti disi meki taki wi man anbegi Yehovah fri na ini Fransikondre te nanga a dei fu tide. Wi no ben sabi na fesi taki wi ben o poti a simpel aksi gi na uma, ma a aksi dati ben de leki a ston di ben boro Goliat ede. A kenki a fasi fa a krutu-afersi waka. Fu san ede wi wini a krutu-afersi? Na fu di sani waka soleki fa David ben taigi Goliat. A ben taki: „Na Yehovah abi a feti.”​—1 Sam. 17:45-47.

Disi no ben de a wan enkri krutu-afersi di wi wini. Awinsi fa makti regering nanga kerki e gens wi, tòg wi wini 1225 krutu-afersi na den moro hei krutubangi di de na ini 70 kondre. Den krutu-afersi di wi wini e horbaka gi a reti di wi abi fu anbegi Yehovah fri, fu du wi preikiwroko, fu weigri fu teki prati na fesa pe sma e gi grani na a kondre, èn fu weigri fu teki brudu.

Fa a du kon taki mi ben man teki prati na wan krutu-afersi na ini Europa, aladi mi ben e dini na a edekantoro fu Yehovah Kotoigi na ini New York, na Amerkankondre?

MI P’PA NANGA M’MA BEN DE FAYAFAYA PREIKIMAN

Mi p’pa nanga m’ma, George nanga Lucille, ben de na ini a di fu 12 klas fu a Gileadskoro. Baka di den klari a skoro, den kisi a toewijzing fu go dini na ini Etiopia pe mi gebore na ini 1956. Den gi mi a nen fu wan fu den den preikiman fu a fosi yarihondro (Tori 21:8). A yari baka dati, a regering no gi wi okasi moro fu anbegi Yehovah fri. Aladi mi ben pkin, tòg mi man memre ete fa mi famiri ben e anbegi Yehovah kibrikibri. Leki pkin boi, a sani disi ben de wan span sani gi mi. A sari taki skowtu dwengi wi fu gwe libi a kondre na ini 1960.

Wi famiri froisi go na Wichita, Kansas, na ini Amerkankondre, ma mi p’pa nanga m’ma noiti no lasi a faya di den ben abi leki zendeling. Den ben leri mi, mi bigi s’sa Judy, nanga mi yongu brada Leslie di gebore tu na ini Etiopia, fu lobi Yehovah èn fu dini en nanga wi her’ati. Mi dopu di mi ben abi 13 yari èn dri yari baka dati, wi famiri froisi go na Arequipa, na ini Peru pe moro preikiman ben de fanowdu.

Na ini 1974 di mi ben abi 18 yari, a bijkantoro fu Peru poti mi nanga fo tra brada leki spesrutu pionier. Wi ben musu preiki na ini kontren pe nowan sma ben preiki ete, dipi na ini a kontren fu den Andes-bergi. Disi ben wani taki tu dati wi ben musu preiki gi den Ingi di e taki a Quechuatongo nanga na Aymaratongo. Wi ben e go na den kontren dati nanga wan bus di wi ben kari „Na Ark”. Wi ben kari en so fu di a ben gersi wan kisi èn wi ben e libi na ini tu. Mi lobi prakseri den ten di mi ben e sori den Ingi drape taki heri esi Yehovah o puru pina, siki, nanga dede (Openb. 21:3, 4). Furu fu den tron anbegiman fu Yehovah.

WI E GO DINI NA A EDEKANTORO

Di Albert Schroeder, di ben de wan memre fu a Tiri Skin fu Yehovah Kotoigi, kon na Peru na ini 1977, dan a gi mi dek’ati fu gi mi nen fu go dini na Betel na a Edekantoro. Mi du dati èn na tapu 17 yuni 1977 mi bigin dini na Betel na ini Brooklyn. Na ini den fo yari baka dati mi ben e wroko na a afdeling di e sorgu taki den gebow fu na organisâsi e tan bun.

Na ini yuni 1978, mi miti Elizabeth Avallone na wan internationaal kongres na ini New Orleans, Louisiana. En p’pa nanga m’ma ben e dini Yehovah nanga den her’ati tu. Di mi miti Elizabeth, a ben e dini leki gewoon pionier fo yari kba èn a ben wani tan du a furuten diniwroko en heri libi langa. Wi kon leri sabi makandra moro bun èn te fu kba wi kon lobi makandra srefsrefi. Wi trow tapu 20 oktober 1979 èn a kon dini na Betel makandra nanga mi.

Den brada nanga sisa na ini a fosi Spanyorotongo gemeente pe wi go dini na ini Brooklyn, sori furu lobi gi wi. Na ini den yari di psa, wi dini na ini dri gemeente di gi wi dek’ati fu tan wroko na Betel. Wi de nanga tangi taki den brada nanga sisa fu den gemeente disi èn sosrefi den mati nanga famiriman fu wi, yepi fu sorgu gi wi p’pa nanga m’ma di ben kon owru kba.

MI BIGIN WROKO NA A KANTORO GI KRUTU-AFERSI

Mi skreki di mi kisi a toewijzing na ini yanuari 1982 fu go dini na a Kantoro gi krutu-afersi na Betel. Dri yari baka dati, den brada aksi mi efu mi ben wani go na universiteit fu tron wan afkati. Di mi ben de na universiteit e teki leri fu tron afkati, dan mi no ben man bribi taki furu reti na ini Amerkankondre nanga tra kondre meki fu di Yehovah Kotoigi wini difrenti krutu-afersi. Den leriman na universiteit ben e taki finfini fu den krutu-afersi disi.

Na ini 1986 di mi ben abi 30 yari, mi tron fesiman fu a Kantoro gi krutu-afersi. Mi no ben man bribi taki Betel ben gi mi so wan bigi frantwortu, fu di mi ben yongu èn fu di furu sani ben de di mi no ben sabi. Boiti dati, mi ben sabi taki a toewijzing fu mi no ben o makelek.

Mi tron afkati na ini 1988, ma mi no ben sabi taki a skoro ben abi so furu krakti na mi tapu èn tapu mi matifasi nanga Yehovah. Te wan sma kisi hei skoroleri dan a kan bigin meki bigi èn a kan bigin denki taki a bun moro trawan. Ma Elizabeth yepi mi fu du den sani baka di ben meki taki mi kon abi wan bun matifasi nanga Yehovah. Baka wan pisi ten, a bribi fu mi kon tranga baka. Mi ondrofeni taki fu abi furu koni a no a moro prenspari sani na ini a libi. San e meki taki wan sma de koloku trutru, na te a abi wan bun matifasi nanga Yehovah èn te a e sori lobi gi den Kresten brada nanga sisa fu en.

MI OPO TAKI GI A BUN NYUNSU SO TAKI WI MAN PREIKI FRI

Baka di mi klari universiteit, mi bigin poti prakseri na san na afdeling ben abi fanowdu na Betel, fu man du a wroko fu wi. Boiti dati, mi ben e luku tu san wi ben musu du fu kibri na organisâsi fu Yehovah èn fu sorgu taki wi ben man preiki a bun nyunsu fri. Mi ben lobi a wroko fu mi, ma a ben abi en tyalensi tu fu di sani ben e kenki esi na ini na organisâsi fu wi. Fu eksempre, na ini a ten di psa wi ben e aksi wan bijdrage gi den buku fu wi. Ma na ini 1990, den brada ben aksi a Kantoro gi krutu-afersi rai fa fu tapu nanga a sani disi di wi ben e du omeni yari kba. Baka dati sma ben kan kisi den buku fu na organisâsi sondro fu gi wan bijdrage. A sani disi meki a wroko na Betel èn na ini a preikiwroko moro makelek. Boiti dati, wi no ben abi fu pai belasting na lanti. Son sma ben denki taki a kenki disi ben o meki taki wi no o abi nofo moni fu druk den buku fu wi èn taki furu sma no ben o kisi na okasi fu kon leri sabi Yehovah. Ma wan tra sani psa. Moro sma kon na ini waarheid sensi 1990 èn now ala sma kan kisi leri fu Bijbel sondro fu pai. Mi si den bigi kenki di na organisâsi tyari kon èn fa den ben abi bun bakapisi. Disi ben kan psa soso nanga yepi fu Yehovah èn nanga yepi fu den rai di wi e kisi fu a srafu di de fu fertrow.​—Eks. 15:2; Mat. 24:45.

Wi no wini den krutu-afersi na den krutubangi fu di wi abi bun afkati, ma wi wini den fu di a pipel fu Yehovah e tyari densrefi na wan bun fasi. Mi si wan eksempre fu dati di dri brada fu a Tiri Skin, makandra nanga den wefi, ben go wan spesrutu kongres na Cuba na ini 1998. Den ben sori swit’fasi nanga lespeki gi den lantiman èn a sani disi ben de wan krin beweisi gi den lantiman taki wi no e teki sei na ini politiek.

Ma son leisi, a wan-enkri fasi fa wi ben kan kisi a reti fu preiki, ben de fu opo taki gi a bun nyunsu na fesi krutubangi (Fil. 1:7). Fu eksempre, omeni yari langa den regering fu Europa nanga Zuid-Korea ben e weigri fu lespeki a reti di wi abi fu no go na ini a legre. Dati meki sowan 18.000 brada na ini Europa èn moro leki 19.000 brada na ini Zuid-Korea ben musu go na straf’oso fu di den konsensi no ben e gi den pasi fu go na ini a legre.

Ma na tapu 7 yuli 2011, a Krutubangi fu Europa di e feti gi den reti fu libisma, teki wan besroiti na ini a tori disi. A krutu-afersi disi ben nen Bayatyan teige Armeinia. A Krutubangi fu Europa ben taki dati ala kondre na ini Europa ben musu sorgu taki den sma di no wani go na ini a legre fu a bribi fu den ede, musu kisi okasi fu du wan tra wroko gi a kondre. Baka dati a Krutubangi fu Zuid-Korea teki wan srefi sortu besroiti tapu 28 yuni 2018. Efu awinsi wan tu fu den brada fu wi nomo ben besroiti fu go na ini a legre, dan den lantiman no ben o teki den prenspari besroiti disi.

A Kantoro gi krutu-afersi na a edekantoro èn na den bijkantoro na heri grontapu e wroko tranga fu feti gi a reti di wi abi fu anbegi Yehovah fri èn fu preiki a bun nyunsu fu a Kownukondre. A de wan grani fu opo taki gi wi brada nanga sisa di e kisi gens fu lanti. Awinsi wi no wini wan krutu-afersi na fesi Krutubangi, tòg wi sabi taki wi ben man preiki gi den granman, den kownu, nanga den trakondre sma (Mat. 10:18). Den krutuman, den sma di e teki presi gi lanti, den nyunsuman, nanga ala tra sma di de na den krutu-afersi fu wi musu poti prakseri na ala den Bijbeltekst nanga ala den dokumenti di wi e gebroiki na den krutu-afersi. Den wan di abi wan krin ati e kon leri sabi suma na den Yehovah Kotoigi èn den e kon sabi taki den sani di den e bribi e kmoto fu Bijbel. Sonwan fu den sma disi tron wi brada nanga sisa.

GRANTANGI YEHOVAH!

Na ini den 40 yari di psa, mi ben abi a grani fu wroko makandra nanga den bijkantoro na heri grontapu na ini difrenti krutu-afersi. Boiti dati, wi ben musu go na fesi wan tu hei lantiman nanga krutubangi fu feti gi den reti fu wi. Mi abi furu lobi nanga lespeki gi den brada nanga sisa di e wroko makandra nanga mi na a Kantoro gi krutu-afersi na a edekantoro èn na den bijkantoro na heri grontapu. Mi kisi furu blesi na ini mi libi èn mi de koloku trutru.

Na ini den 45 yari di psa, Elizabeth horbaka gi mi na ini bun ten èn na ini muilek ten. Mi abi furu warderi gi en fu di a horbaka gi mi aladi a abi wan siki di e meki taki a no abi furu krakti.

Mi nanga Elizabeth ondrofeni taki a no nanga wi eigi krakti wi ben man du ala den sani di wi ben man du. Soleki fa David ben taki, dan na „Yehovah e gi en pipel krakti” (Ps. 28:8). Iya, „na Yehovah abi a feti”.