Suma o kibri grontapu?

Furu sma e broko den ede te den e si fa libisma e pori grontapu èn fa den e du ogri nanga den meti èn nanga den busi. Sabiman di e ondrosuku a gron, den meti, noso tra sani na grontapu e taki dati noiti ete a pasa taki libisma du so furu ogri, taki te fu kaba difrenti sortu meti nanga bon o dede gwe èn taki sani no o waka bun gi den difrenti libisani di de na grontapu.

Yu denki taki libisma o man pori grontapu trutru? Noso wan ten o kon taki den o man libi na sowan fasi taki den no e pori a grontapu?

Yu denki taki libisma o man tyari wan kenki kon?

Furu sabiman denki taki libisma man kibri grontapu èn taki den man sorgu en bun. Son ondrosukuman feni taki efu libisma wani du a sani disi, dan den musu kenki wan lo sani na a srefi ten. San musu kenki?

Sma musu sorgu moro bun gi a gron, den busi, den swampu nanga den se.
Den musu gebroiki difrenti sortu fasi fu prani gron èn den musu du difrenti sortu sani fu meki stroom.
Den musu kenki a fasi fa sma e meki nyanyan èn e prati en. Na so fasi den kan nyan moro furu gruntu nanga froktu èn den no o nyan someni meti nanga fisi moro. Dan den no o nyan so furu nyanyan èn den no o frumorsu en.
Den musu frustan taki a no te wan sma abi furu gudu, dan dati o gi den wan bun libi.

San yu denki? Yu denki taki tiriman, bisnisman nanga tra sma o wani wroko makandra na a fasi disi? Noso yu denki taki dati no o man, fu di son sma gridi, den e denki densrefi nomo èn den no e broko den ede nanga san o pasa nanga a grontapu?—2 Timoteyus 3:1-5.

Howpu de

Bijbel e gi wi a dyaranti taki wi no abi fu frede taki grontapu o pori gowe. A e sori wi fu san ede libisma no man kibri grontapu èn sortu sani musu kenki trutru. A e fruteri wi tu fa a kenki disi o pasa.

Fu san ede libisma wawan no o man kibri grontapu? Yehovaha Gado meki grontapu èn a gi libisma a frantwortu fu sorgu gi grontapu (Genesis 1:28; 2:15). Libisma ben o man sorgu bun gi grontapu, soso te den ben o arki a Mekiman fu den èn te den ben o du san a taki (Odo 20:24). Ma den no du dati. Den no gi yesi na Yehovah èn den go du san densrefi wani (Preikiman 7:29). Libisma wawan no man sorgu gi grontapu èn awinsi den e du son sani bun, noiti den o man meki taki ala sani waka bun.—Odo 21:30; Yeremia 10:23.

Sani di musu kenki. Gado o puru den libisma di e pori grontapu (Openbaring 11:18). A no o seti sani fu kenki den tiriman nanga tra organisâsi na grontapu di e pori grontapu, ma a o puru den fu poti tra sma na den presi (Openbaring 21:1). Dati meki, Yehovah e taki: „Luku, mi e meki ala sani kon nyun.”—Openbaring 21:5.

Fa Gado o tyari a kenki disi kon? Yehovah o poti a hemel regering di a e kari Gado Kownukondre, na a presi fu den libisma regering. Gado Kownukondre di abi Yesus Krestes leki tiriman, o tiri a heri grontapu.—Danièl 2:44; Mateyus 6:10.

Gado Kownukondre o leri libisma fa den musu libi na a fasi fa Gado wani. Te libisma e frustan san a Mekiman fu den wani èn te den e gi yesi na en, dan den o man sorgu bun gi den sani di Gado meki na grontapu (Yesaya 11:9). Bijbel e sori fa a regering fu Gado o meki taki ala sma di e tan na grontapu o prisiri fu a libi èn den no e du sani di o pori a grontapu. Disi na san Gado Kownukondre o du:

A o sorgu taki ala sma abi nyanyan.—Psalm 72:16.
A o sorgu taki ala sani na grontapu o kon bun baka.—Yesaya 35:1, 2, 6, 7.
A o sorgu taki libisma luku den meti bun èn den meti no o du ogri nanga libisma.—Yesaya 11:6-8; Hosea 2:18.
A o sorgu taki nowan rampu o de.—Markus 4:37-41.

Sabi taki dyonsro Gado Kownukondre o tyari den kenki disi kon. Efu yu wani sabi moro, dan leisi na artikel di nen: „O ten Gado Kownukondre o bigin tiri grontapu?”

a Yehovah na a nen fu Gado.—Psalm 83:18.

San wi kan du fu sori lespeki gi a grontapu fu wi?

Te wi e bribi taki Gado Kownukondre o tyari wan lusu kon gi ala den problema fu grontapu, dan nownow kaba wi kan du san wi man fu sori taki wi e lespeki grontapu. Fu eksempre, wi kan sorgu taki wi no e frumorsu sani. Wi kan gi yesi tu na den wet di lanti poti fu no trowe sani somaar, ma fu gebroiki den baka.—Yohanes 6:12, 13; Romesma 13:1, 5.

Brett na wan man di ben e gi rai na sma fosi fa den kan sorgu taki den no e pori grontapu. Fu di a sabi a sistema di e meki taki meti, bon, nanga tra libisani man libi nanga makandra, meki dati yepi en fu frustan taki wan Mekiman de èn taki en o sorgu taki grontapu no kisi pori. Leisi na ondrofenitori fu Brett.
Wan fasi fa Yehovah Kotoigi e sori lespeki gi a Mekiman fu den, na taki te den e du bigi bow-wroko, den e wroko nanga sistema di bun gi grontapu. Efu yu wani si den sani di den du kaba, dan luku a felem di nen Milieuvriendelijk bouwen eert Jehovah.

Bijbeltekst di e taki fu grontapu

Genesis 2:15: „Yehovah Gado teki a man èn a poti en na ini a dyari fu Eden fu wroko a gron èn fu sorgu a dyari.”

San dati wani taki? Gado gi libisma a frantwortu fu sorgu gi grontapu fu wi.

Genesis 1:28: „Gado blesi den. Dan a taigi den: ’Meki pikin èn kon furu, teleki unu kon lai na grontapu èn basi ala sani na grontapu. Basi den fisi na ini se, den meti di e frei na loktu, nanga ibri meti di e kroipi na gron.’”

San dati wani taki? Libisma kisi a wroko fu sorgu gi den meti.

Yesaya 45:18: „Yehovah na a Mekiman fu hemel, a tru Gado, a Mekiman fu grontapu, a sma di seti en leki fa a de èn a sma di poti en steifi na en presi. A no meki en fu soso, ma a seti en fu sma libi na tapu. A taki: ’Mi na Yehovah, èn nowan trawan no de.’”

San dati wani taki? A prakseri di Gado abi gi grontapu no kenki. Den sma di o libi grontapu, na den wan di o du san Gado ben abi na prakseri sensi a bigin.

Psalm 37:29: „Na den reti-ati sma o kisi grontapu èn fu têgo den o tan libi drape.”

San dati wani taki? Den wan di e du san Gado wet taki o kisi na okasi fu libi fu têgo na grontapu.

Psalm 98:6-8: „Bari fu prisiri gi Yehovah di de Kownu. Meki a se nanga ala den sani di de na ini bari leki dondru. Iya, meki grontapu nanga ala den sma di e libi drape bari leki dondru tu. Meki den liba naki anu. Meki ala den bergi bari fu prisiri.”

San dati wani taki? Te Gado o tiri grontapu, dan ala sani o go bun nanga a gron èn nanga den meti.