Sani e kon diri moro nanga moro na heri grontapu​—San Bijbel e taki?

„A de so baka taki a no e go bun kwetikweti nanga na ekonomia fu grontapu”, na so a presidenti fu a Wereldbank-groep taki na ini wan raportu di ben skrifi na ini yuni 2022. „Disi leisi sani e kon diri srefisrefi èn den sma di e firi en moro hebi, na den wan di e libi na ini den pôti kondre, fu di den no abi nofo moni fu bai sani.”

„A prijs fu oli nanga nyanyan kren heri esi èn disi meki taki a libi moro muilek gi den pôti kondre”, na so na Internationaal Monetair Fonds skrifi.

Bijbel e yepi wi fu frustan fu san ede den sortu moni problema disi de, fa wi kan horidoro èn sortu howpu wi abi taki wan lusu o kon fu ala ten.

Sani ben o kon diri „na ini den lasti dei”

• Na ini Bijbel skrifi taki wi e libi now „na ini den lasti dei”.​—2 Timoteyus 3:1.

• Yesus ben taki dati „sma o si kefalek ogri sani”, noso sani ben o pasa di ben o meki sma kon frede. Den sani disi ben o pasa na ini a ten fu wi (Lukas 21:11). Sma e frede fu di den sani e kon diri moro nanga moro. Sma e broko den ede fu di den no sabi fa den libi o waka èn efu den o man sorgu gi den osofamiri.

• A buku Openbaring ben taki kaba taki nyanyan ben o kon moro diri na ini a ten disi. „Dan mi yere wan sten. . . . A taki: ’Wán kilo aleisi gi wán dei moni, nanga dri kilo groto gi wán dei moni.’”​—Openbaring 6:6.

Efu yu wani sabi moro fu „den lasti dei”, nanga a profeititori di skrifi na ini a buku Openbaring, dan yu kan luku a felem di nen Grontapu kenki sensi 1914 èn yu kan leisi na artikel di nen „Suma na den fo man na tapu den asi?”

Fa ala moni problema o kon na wan kaba

• „Den o bow oso èn den srefi o tan na ini. Den o prani droifidyari èn den srefi o nyan fu en. Den no o bow oso, dan wan tra sma go tan na ini. Den no o prani sani, dan wan tra sma nyan fu dati.”​—Yesaya 65:21, 22.

• „Furu nyanyan o kon de na grontapu. Srefi na tapu den ede fu den bergi nyanyan o de pasa marki.”​—Psalm 72:16.

• „Sma fufuru sani fu den mofinawan tyari gowe èn den pôti sma e geme. Dati meki mi o opo du wan sani now”, na so Yehovah taki.”​—Psalm 12:5.a

A no langa moro, dan Gado o tyari wan kaba kon na a takru ekonomia situwâsi. A no o du dati na ini wán kondre nomo, ma na heri grontapu. Efu yu wani sabi fa a o du dati, dan leisi na artikel di nen „Libisma o man seti na ekonomia na wan eerlijk fasi?”

Ma srefi nownow kaba Bijbel kan yepi yu fu sabi san fu du te sani e kon diri. Fa a kan yepi yu? A e gi wi bun rai di o yepi wi fu gebroiki wi moni na wan koni fasi (Odo 23:4, 5; Preikiman 7:12). Efu yu wani sabi moro, dan leisi den artikel di nen „Meki muiti fu no lasi den sani di yu abi fanowdu fu tan na libi” nanga na artikel „Gebroiki yu moni nanga koni​—Fa yu kan du dati?”.