NASA Photo
TAN NA AI!
Wan bun regering de di man tiri heri grontapu?—San Bijbel e taki?
A no e go bun srefsrefi nanga den regering na grontapu. Srefi na ini kondre pe a gersi leki sani e go bun, yu abi regering pe omeni kruka sani e psa, noso pe verkiezing e hori di no waka na wan reti fasi. Boiti dati, sma no e agri nanga makandra na politiek sei èn wan lo bruya de ini den kondre.
Bijbel e sori taki wán regering de di man tiri heri grontapu bun. Kande yu yere kba fu a regering disi. Na fu a regering disi Yesus Krestes ben taki di a leri den bakaman fu en fa fu begi.
„Fu dati ede un musu begi so: ’Wi Tata na hemel, meki yu nen de santa. Meki yu Kownukondre kon. Meki yu wani pasa na grontapu soleki fa a e pasa na hemel.”—Mateyus 6:9, 10.
San Bijbel e taki fu a Kownukondre dati?
A Kownukondre—wan regering di man tiri heri grontapu bun
A Kownukondre e tiri kmoto fu hemel.
Yesus kari a Kownukondre dati „a Kownukondre fu hemel” (Mateyus 4:17; 5:3, 10, 19, 20). Dati meki a taki: „Mi kownukondre no de fu a grontapu disi” (Yohanes 18:36).
A Kownukondre o kon ini a presi fu den regering di libisma e tiri.
Bijbel e taki:’A kownukondre srefi o broko ala den [libisma] kownukondre disi pisipisi èn a o tyari wan kaba kon na den.’—Danièl 2:44.
A Kownu fu a Kownukondre disi na Yesus Krestes èn noiti wan sma o man puru en.
Bijbel e taki: „A tirimakti fu en o tan fu têgo. Noiti a o kon na wan kba. A kownukondre fu en na wan kownukondre di no o kisi pori.”—Danièl 7:13, 14.
A Kownukondre o tyari freide kon na grontapu èn nowan sma o abi fu frede moro.
Bijbel e taki: „Ibri sma o sdon na ondro en eigi droifibon nanga en eigi figabon. Nowan sma o meki den frede.”—Mika 4:4.
Leri moro fu a Kownukondre
Di Yesus ben de na grontapu, a gebroiki ala ten fu „preiki a bun nyunsu fu a Kownukondre” (Mateyus 9:35). A taki disi tu:
„A bun nyunsu disi fu a Kownukondre o preiki na heri grontapu, so taki sma fu ala kondre kan yere dati, èn dan a kba o kon.”—Mateyus 24:14.
Na ini a ten disi a bun nyunsu fu a Kownukondre e preiki na ini moro leki 240 kondre. Wi e gi yu a kari fu leri moro fu a regering disi èn fu luku sortu bun a regering kan abi gi yu.
Grantangi, luku a felem di nen San na Gado Kownukondre?